ފޯރިގަދަ ކެމްޕޭނަކަށް ފަހު ވޯޓުލުމުގެ ސިލްސިލާ ނިމިގެން ދިޔަ އެމެރިކާގެ އިންތިހާބު 51 ޕަސެންޓުން ކުރީގެ ރައީސް ޑޮނާލްޑް ޓްރަމްޕް ކާމިޔާބު ކުރައްވައިފިއެވެ.
ވަގުތީ ނަތީޖާ އާއެކު ޓްރަމްޕް ކާމިޔާބީ އިއުލާން ކުރައްވާފައި ވާއިރު މިހާރުގެ ނައިބު ރައީސް ކަމަލާ ހެރިސް އަދި ބަލިގަބޫލެއް ނުކުރައްވައެވެ.
ޓްރަމްޕްގެ ކާމިޔާބީ އާއެކު އެކި ގައުމުތަކުގެ ވެރިން ޓްރަމްޕަށް މަރުހަބާ ވިދާޅުވަމުން ގެންދަވާ އިރު، ޓްރަމްޕްގެ އެންމެ ގާތް ބިލިއަނަރު އަދި ދުނިޔޭގެ އެންމެ މުއްސަނދި މަހުޖަނު އެލޮން މަސްކް ބުނެފައި ވަނީ، މި ކާމިޔާބީއާއެކު އެމެރިކާ އާ އުސްމިންތަކަކަށް ދާނެ ކަމަށެވެ. އެއާއެކު އޭނާ ވަނީ ކާމިޔާބު ސްޕޭސް ޕްރޮގްރާމް 'ސްޕޭސް އެކްސް' ގެ ފޮޓޯ ހިއްސާ ކޮށްފައެވެ. މަސްކުގެ ހުވަފެނަކީ ޓްރަމްޕްގެ ވެރިކަމުގައި މާސް އާ ހަމައަށް ދިޔުމެވެ.
ޓްރަމްޕްގެ ކާމިޔާބީ އާއެކު ރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް ވަނީ މަރުހަބާ ވިދާޅުވެފައެވެ. އަދި ޓްރަމްޕްގެ ކާމިޔާބީ އާއެކު ރާއްޖެ އާއި އެމެރިކާ އާ ދެމެދު އޮތް ގުޅުން އިތުރަށް ބަދަހި ކުރެއްވުމަށް އުއްމީދު ކުރައްވާ ކަމަށާއި، ދުނިޔޭގެ ސުލްހައާއި ހަމަޖެހުމަށް މަސައްކަތް ކުރުމަށް އެދިވަޑައިގެންފައި ވެއެވެ.
