ރާއްޖޭގެ ކުރީގެ މަޝްހޫރު ވިޔަފާރިވެރިޔާ މުހައްމަދު މަނިކު (ކުވާ މޮހޮދޭ) ނިޔާވެއްޖެ އެވެ.
ކުވާ މޮހޮދޭއަކީ މިނިސްޓާ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓް، ޑރ. މަރްޔަމް މާރިޔާގެ ބައްޕާފުޅުގެ އިތުރުން ކުރީގެ ގަދަރުވެރި ވިޔަފާރިވެރިއެކެވެ.
ކުވާ މޮހޮދޭ ނިޔާވުމުގެ ހިތާމައިގައި ބައިވެރިވެ ރައީސް ޑރ. މުހައްމަދު މުއިއްޒު ވަނީ އޭނާގެ އާއިލާއަށް ތައުޒިޔާ ވިދާޅުވެފައެވެ.
އެގޮތުން އެމަނިކުފާނު އެކްސްގައި ހިއްސާ ކުރެއްވި ޕޯސްޓެއްގައި ވިދާޅުވީ، ކުވާ މޮހޮދޭ އަކީ، ވިޔަފާރީގެ ދާއިރާއިން ބޮޑެތި ޚިދުމަތްތަކެއް ގައުމަށް ކޮށްދެއްވާފައިވާ، ދަރުމަވެރި އެތައް އެހީތަކެއް ވަކިވަކި ފަރުދުންނަށާއި ޖަމާޢަތްތަކަށް ފޯރުކޮށްދެއްވާފައިވާ އިހްސާންތެރިއެއް ކަމަށެވެ.
"ގިނަ ބަޔަކު ދަންނަ ރަޙްމަތްތެރި ސާދާ މިޒާޖެއްގެ ވެރިއެކެވެ. ހިދުމަތްތެރި ދަރީންތަކެއްގެ ބައްޕައެއް," ރައީސްގެ ޕޯސްޓުގައި ވިދާޅުވިއެވެ.
އޭނާގެ މައްޗަށް ކަށު ނަމާދު ކުރުން އޮންނާނީ މިރޭ އިޝާ ނަމާދަށް ފަހު އިސްލާމީ މަރުކަޒުގަ އެވެ.
