މާލެ އަދި ވިލިމާލޭގެ މަގުތައް ތަރައްގީ ކުރުމަށްޓަކައި ފީސިބިލިޓީ ސްޓަޑީ ހެދުމުގެ މަސައްކަތް ފަށައިފިއެވެ.
މިކަން އިއުލާނުކުރަމުން ކޮންސްޓްރަކްޝަން މިނިސްޓްރީ އިން ބުނީ މާލެ އަދި ވިލިމާލޭގެ މަގުތައް ތަރައްގީ ކުރުމަށް ފީސިބިލިޓީ ސްޓަޑީ ހެދުމަށް ޗައިނާ ސަރުކާރުން އައްޔަންކުރި އެކްސްޕާޓް ޓީމް 3 ނޮވެމްބަރުގައި ގައި ރާއްޖެ އައިސްފައިވާކަމަށާއި، މިހާރު އެ މަސައްކަތް ފަށާފައިވާކަމަށެވެ.
މީގެއިތުރުން ކޮންސްޓްރަކްޝަން މިނިސްޓްރީ އިން ބުނީ މި މަހުގެ 5 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށް ޗައިނާ ސަރުކާރުން އައްޔަނުކުރި އެކްސްޕާޓު ޓީމުން ސްޓޭކްހޯލްޑަރުންގެ މަޝްވަރާތަކާއި، ސައިޓް ސާވޭތަކުގެ އިތުރުން ޑޭޓާ އެއްކުރުމުގެ މަސައްކަތް ކުރިއަށް ގެންދާނެ ކަމަށެވެ.
މަގުތައް ހަދާނެ ޑިޒައިން އަދި މަގުތައް ހެދުމުގައި އަމަލު ކުރާނެ މައިގަނޑު އަސާސްތައް ކަނޑައެޅިގެންދާނީ ފީސިބިލިޓީ ސްޓަޑީއަށް ބިނާކޮށްގެން ކަމަށްވެސް ކޮންސްޓްރަކްޝަން މިނިސްޓްރީ އިން ވަނީ ބުނެފައެވެ.
މާލެ އަދި ވިލިމާލޭގެ މަގުތައް ތަރައްގީ ކުރުމަށްޓަކައި ދިވެހި ސަރުކާރާއި ޗައިނާ ސަރުކާރާއި ދެމެދު ލެޓާ އޮފް އެކްސްޗޭންޖުގައި ސޮއިކޮށްފައިވަނީ ޗައިނާގެ ބެއިޖިންގައި ބޭއްވުނު ރަސްމިއްޔާތެއްގައެވެ. މި މަޝްރޫއަކީ ޗައިނާ ސަރުކާރުގެ ހިލޭ އެހީގެ ދަށުން ކުރިއަށް ގެންދާ މަޝްރޫއެކެވެ.
ރައީސް ޑރ. މުހައްމަދު މުއިއްޒު މި އަހަރުގެ ކުރީކޮޅު ޗައިނާއަށް ކުރެއްވި ރަސްމީ ދަތުރުފުޅުގައި ރާއްޖޭގެ ތަރައްގީގެ މަޝްރޫއުތަކަށް އެހީވުމަށްޓަކައި ވެވުނު ފަހުމުނާމާއާއި ގުޅިގެން ތަރައްގީގެ މަޝްރޫއުތަކަށް ހިލޭއެހީގެ ގޮތުގައި 130 މިލިއަން ޑޮލަރު ހަމަޖައްސަވާދެއްވުމަށް ނިންމެވިކަން އެމަނިކުފާނު ވަނީ އިއުލާނު ކުރައްވާފައެވެ.
