އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގްގެ ދައުރު މި މަހު ހަމަވާތީ، އެ ކޮމިޝަންގެ މެންބަރުކަމަށް އިސްލާމިކް މިނިސްޓްރީގެ ކުރީގެ ޕާމަނަންޓް ސެކްރެޓަރީ އަބްދުލްހަސީބު އިސްމާއީލް އައްޔަންކުރަން ފެންނަ ކަމަށް ރައްޔިތުންގެ މަޖިލީހުން މިއަދު ރުހުން ދީފިއެވެ.
ހަސީބުގެ ނަން ރައީސް ޑރ. މުހައްމަދު މުއިއްޒު ރައްޔިތުންގެ މަޖިލީހަށް ފޮނުއްވީ މިދިޔަ މަހުގެ މެދުތެރޭގައެވެ. އޭނާގެ ނަމާ އެކު އިލެކްޝަންސް ކޮމިޝަންގެ މެންބަރުކަމަށް ނަން ހުށަހެޅި އެހެން ބޭފުޅުންގެ ނަންތައް ވެސް ފޮނުއްވިއެވެ.
މިނިވަން މުއައްސަސާތަކުގެ ކޮމިޓީން ހަސީބުގެ ނަން ދިރާސާކޮށް އޭނާ އަށް ރުހުންދިނުމަށް ވަނީ ނިންމައިފައެވެ.
އެހެންވެ، މިވަގުތު އީސީގެ އެސިސްޓަންޓް ޑިރެކްޓަރުގެ މަގާމު ފުރުއްވަމުން ގެންދަވާ ހަސީބަށް ރުހުންދޭން ރިޔާސަތުން މިއަދު ހުށަހެޅުމުން ވޯޓުގައި ބައިވެރިވި 67 މެންބަރުން ވެސް ވަނީ އޭނާ އަށް ރުހުންދޭން ފެންނަ ކަމަށް ފާސްކޮށްފައެވެ.
ގާނޫނު ބަޔާންކުރާ ގޮތުން އިލެކްޝަންސް ކޮމިޝަންގެ މެންބަރުކަން އަދާކުރެއްވޭނީ އެންމެ ގިނަވެގެން ވެސް ފަސް އަހަރުގެ ދެ ދައުރަށެވެ. ފުއާދުގެ މެންބަރުކަމުގެ މުއްދަތު ހަމަވާނީ މި މަހުގެ 24 ވަނަ ދުވަހުގައެވެ.
