އިލެކްޝަންސް ކޮމިޝަނާއި (އީސީ) އެންޓި-ކޮރަޕްޝަން ކޮމިޝަންގެ (އޭސީސީ) ވެރިން އައްޔަންކުރުމުގެ ބާރު ސީދާ ރައީސުލްޖުމްހޫރިއްޔާ އަށް ދޭ ގޮތަށް ސަރުކާރުން ހުށަހެޅި އިސްލާހު އިތުރަށް ދިރާސާކުރުމަށް މިނިވަން މުއައްސަސާތަކުގެ ކޮމިޓީ އަށް ފޮނުވާލައިފިއެވެ.
މިދިޔަ މަހުގެ ފަހުކޮޅު ސަރުކާރުގެ ފަރާތުން ހުށަހެޅި އިސްލާހުތައް މަޖިލީހުން ފާސްވެ ގާނޫނަކަށް ވެއްޖެ ނަމަ، އީސީ އާއި އޭސީސީގެ މެންބަރުންގެ ތެރެއިން ދެ ކޮމިޝަނުގެ ރައީސުންނާއި ނައިބު ރައީސުން އައްޔަންކުރުމުގެ ބާރު ސީދާ ރައީސުލްޖުމްހޫރިއްޔާ އަށް ލިބޭނެއެވެ. އެކަމަކު އެ މަގާމުތަކަށް އައްޔަންކުރެވޭނީ ރައީސް ރައްޔިތުންގެ މަޖިލީހަށް ހުށަހަޅުއްވާ ނަންތަކުގެ ތެރެއިން ރުހުންލިބޭ ނަންތަކަށެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ދެ އިސްލާހު ބަލައިގަތުމަށް ފެނޭތޯ ރިޔާސަތުން ވޯޓަށް އެހުމުން، އޭސީސީގެ ވެރިން އައްޔަންކުރުމުގެ ބާރު ރައީސުލްޖުމްހޫރިއްޔާ އަށް ދިނުމުގެ އިސްލާހު ބަލައިގަތީ ވޯޓުގައި ބައިވެރިވި 65 މެންބަރުންގެ ތެރެއިން 60 މެންބަރުންގެ ވޯޓުންނެވެ. އަދި އީސީގެ ވެރިން އައްޔަންކުރުމުގެ ބާރު ރައީސުލްޖުމްހޫރިއްޔާ އަށް ދިނުމުގެ އިސްލާހު ބަލައިގަތީ ވޯޓުގައި ބައިވެރިވި 66 މެންބަރުންގެ ތެރެއިން 60 މެންބަރުންގެ ވޯޓުންނެވެ.
އެހެންކަމުން ރިޔާސަތުން ވަނީ އެ އިސްލާހުތައް އިތުރަށް ދިރާސާކުރުމަށްޓަކައި މިނިވަން މުއައްސަސާތަކުގެ ކޮމިޓީ އަށް ފޮނުވާލައިފައެވެ.
އީސީ އާއި އޭސީސީގެ ގާނޫނުގައިވާ ގޮތުން، އެ ދެ ކޮމިޝަންގެ ރައީސުންނާއި ނައިބު ރައީސުންގެ ގޮތުގައި އައްޔަންކުރާނީ ދެ ކޮމިޝަންގެ ވެސް ޖަލްސާއެއްގައި މެމްބަރުންގެ ތެރޭގައި ނަގާ ވޯޓަކުން ހޮވޭ މެމްބަރެކެވެ. ހަމަ އެހެންމެ ދެ ކޮމިޝަންގެ ރައީސުން އިސްތިއުފާ ދެއްވާ ނަމަ، އިސްތިއުފާގެ ސިޓީ ހުށަހަޅަން ޖެހޭނީ ކޮމިޝަނަށެވެ. ނައިބު ރައީސުން އިސްތިއުފާގެ ސިޓީ ހުށަހަޅަން ޖެހޭނީ ކޮމިޝަންތަކުގެ ރައީސުންނަށެވެ
އެކަމަކު މި އިސްލާހު ގާނޫނަކަށް ވެއްޖެ ނަމަ އިލެކްޝަންސް ކޮމިޝަނާއި އެންޓި-ކޮރަޕްޝަން ކޮމިޝަންގެ ރައީސުންނާއި ނައިބު ރައީސުން އިސްތިއުފާގެ ސިޓީ ހުށަހަޅަން ޖެހޭނީ ސީދާ ރައީސުލްޖުމްހޫރިއްޔާ އަށެވެ.
