ގެދޮރުބިނާކުރުމަށް 5 ޕަސެންޓް އިންޓްރެސްޓްގައި ލޯނު ދޫކުރާ "ހިޔާވަހި ފައިނޭންސިން" ޕްރޮގްރާމް އިފްތިހާހު ކޮށްފިއެވެ.
ހިޔާވަހި ފައިނޭންސިން ޕްރޮގްރާމް އިފްތިތާހު ކޮށްދެއްވީ އެކަމަށްޓަކައި މިއަދު ރަސްމިއްޔާތުގައި ރައީސް ޑރ. މުހައްމަދު މުއިއްޒުއެވެ.
ބޯހިޔާވަހިކަމަށް ހާއްސަކޮށް ލޯނު ދޫކުރުމަށް އެކުލަވާލާފައިވާ މި ލޯން ސްކީމް ޕްރޮގްރާމްގެ ދަށުން ރާއްޖޭގެ ހުރިހާ ސަރަހައްދުތައް ހިމެނޭހެން ބޯހިޔާވަހިކަމަށް ލޯނު ދޫކުރުމަށް ސަރުކާރުން ވަނީ ނިންމާފައެވެ.މި ޕްރޮގްރާމްގެ ދަށުން 3 ލޯނު ސްކީމަކަށް ލޯނު ދޫކުރުމަށް ވަނީ ނިންމާފައިވެއެވެ.
އެގޮތުން އަތޮޅު ތެރެއަށް ހާއްސަކޮށް ދޫކުރާ ލޯނު ސްކީމްގެ ދަށުން 1 މިލިއަން ރުފިޔާއާ ހަމައަށް ލޯނު ދޫކުރުމަށް ހަމަޖެހިފައިވެއެވެ. އަދި ހައުސިން ޑިވެލޮޕްމެންޓް ފައިނޭންސިން ކޯޕަރޭޝަން މެދުވެރިކޮށް މި ލޯނުތައް ދޫކުރުމަށް ހަމަޖެހިފައި ވާއިރު، މި ލޯނުގެ ދަށުން އެއްވެސް އިކުއިޓީއެއް ދައްކާކަށް ނުޖެހެއެވެ.
ދެވަނަ ލޯނު ސްކީމްއަކީ ސަރުކާރުން އާބަން ސެންޓަރުތަކުގެ ގޮތުގައި ކަނޑައަޅާ ރަށްތަކަށް ހާއްސަކޮށް ދޫކުރާ ލޯނު ސްކީމްއެވެ. މި ސްކީމްގެ ދަށުން 3 މިލިއަން ރުފިޔާއާ ހަމައަށް ލޯނު ދޫކުރުމަށް ނިންމާފައިވެއެވެ.
ތިންވަނަ ލޯނު ސްކީމްއަކީ މާލެ ސަރަހައްދަށް ހާއްސަކޮށް ދޫކުރުމަށް ހަމަޖެހިފައިވާ ލޯނު ސްކީމްއެކެވެ. މި ސްކީމްގެ ދަށުން 6 މިލިއަން ރުފިޔާއާ ހަމައަށް ލޯނު ދޫކުރުމަށް ވަނީ ހަމަޖެހިފައެވެ. މި ލޯނު ސްކީމްގެ ދަށުން 600 އަކަފޫޓަށްވުރެ ކުޑަ 2 ބިން ނުވަތަ ގިނަ ބިން އެއްކޮށްލައިގެން ލޯނަށް ހުށަހަޅާ ފަރާތްތަކަށް އިތުރު ކުރާ ކޮންމެ ބިމަކަށް 6 މިލިއަން ރުފިޔާގެ އިތުރުން 1 މިލިއަން ރުފިޔާ ދޭ ގޮތަށް ވަނީ ހަމަޖެހިފައެވެ.
އާބަން ސެންޓަރުތައް އަދި މާލެއަށް ހާއްސަކޮށް ކުރިއަށް ގެންދާ ލޯނު ސްކީމްތައް ކުރިއަށް ގެންދާނީ އިސްލާމިކް ބޭންކް އަދި ބޭންކް އޮފް މޯލްޑިވްސް މެދުވެރިކޮށެވެ. އަދި އަލަށް ކުރެވޭ އިމާރާތްތަކަށާއި، ނުނިމި ހުރި އިމާރާތްތައް ނިންމުމަށް، މި ޕްރޮގްރާމްގެ ދަށުން ދޫކުރާ ލޯނުތައް ދޫކުރާނީ 5 ޕަސެންޓް ޕްރޮފިޓް މާޖިންގައި އިސްލާމިކް ޝަރީއާގެ އުސޫލުތަކާ އެއްގޮތްވާ ގޮތުގެ މަތިން ކަމަށާއި އެޕްލިކޭޝަންއަށް އެދުމަށް ހަމަޖެހިފައި ވަނީ ހިޔާވަހި ޕޯޓަލް މެދުވެރިކޮށް ކަމަށް ހައުސިން މިނިސްޓްރީއިން ބުނެއެވެ.
