ހުޅުމާލެ ފޭސް 1 ލަކުޑި ޖެޓީ ކައިރީގައި ހުރި ދަބަސްތަކެއް ބަަލައިފާސްކޮށް ބަނގުރާ ދަޅުތަކެއް ފުލުހުންގެ ބެލުމުގެދަށަށް ގެންގޮސްފިއެވެ.
އެކަމާ ގުޅިގެން ފުލުހުން ބުނީ ލަކުޑި ޖެޓީ ކައިރީގައި ހަވާލުވާނެ މީހަކު ނެތް ދަބަސްތަކެއް ހުރިކަމަށް ނޮވެމްބަރު 3 ވަނަ ދުވަހު ލިބުނު މައުލޫމާތަކާ ގުޅިގެން ފުލުހުން ގޮސް އެ ދަބަސްތައް ބަލައިފާސްކުރި އިރު 228 ދަޅު ބަނގުރާ ފެނިފައިވާ ކަމަށެވެ.
މި މައްސަލައާއި ގުޅިގެން މިހާތަނަށް މީހަކު ހައްޔަރުކޮށްފައި ނުވާއިރު ފުލުހުން ދަނީ މި މައްސަލަ ތަހުގީގު ކުރަމުންނެވެ.
ހުސްވި މަހުވެސް ފުލުހުން ވަނީ ބަނގުރާ ފުޅިތަކެއް އަތުލައިގަނެފައެވެ. ގދ. ގައްދޫ ބޭރުގައި އޮތް ސަފާރީއެއް ބަލާ ފާސްކޮށް އެފަހަރު ވަނީ 1224 ދަޅު ބަނގުރަލާއި 124 ފުޅި ބަނގުރާ ފުލުހުން ހޯދާފައެވެ.
ގައްދޫ ޕޮލިސް ސްޓޭޝަނާއި ޑްރަގް ނާކޮޓިކްސް އިންޓެލިޖެންސް ގުޅިގެން ކުރިއަށް ގެންދިޔަ މި އޮޕަރޭޝަންގައި ދެ މީހަކާއި ސުވާލުކޮށްފައި ވެއެވެ.
