ފިހާރައަކުން ވަގަށް ނަގާފައިވާ 67 ސިނގިރޭޓް ކާޓެން އާއެކު މީހަކު ހައްޔަރު ކޮށްފިއެވެ.
މި މައްސަލައާ ގުޅިގެން ހައްޔަރު ކޮށްފައި ވަނީ ށ. ފޭދޫ، ހިރުދުމާގެ، އަހަމްދު ލުޖައިން (24އ)އެވެ،
ފުލުހުން ބުނީ މި މަހުގެ 2 ވަނަ ދުވަހު ފަތިހު 5:40 ހާއިރު ފުލުހުން ޕެޓްރޯލް ކުރަމުން ދިޔަ އިރު އޮލިމްޕަސް ކައިރިން ދިޔަ މީހަކާ މެދު ތުހުމަތު ކުރެވިގެން ހުއްޓުވާ، އޭނާ ގެންގުޅުނު ދަބަސް ތަކާއި ކޮތަޅުތައް ބަލާ ފާސްކުށް 67 ކާޓެން ސިނގިރޭޓު ފެނިފައިވާ ކަމަށެވެ.
އިތުރަށް ފުލުހުން ބުނީ މިހާތަނަށް ބެލިބެލުމުން މި ތަކެއްޗަކީ އޯޝަން ނޯޓިސް ޕްރައިވެޓް ލިމިޓެޑުން އޭނާ ވަގަށް ނަގާފައިވާ ތަކެތިކަން އެގިފައި ވާކަމަށެވެ.
ފުލުހުން ބުނީ އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން 5 ދުވަހަށް ބަންދު ކުރުމަށް އަމުރު ކޮށްފައި ވާކަމަށެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
