ޕްރައިވެޓް އިންޝުއަރަންސް ކުންފުނިތަކުން ދޭ ހިދުމަތަށް ގެނައި ބަދަލަކާ ގުޅިގެން އެ އިންޝުއަރަންސްގެ ދަށުން ޑޮކްޓަރަށް ދައްކާ ފަރާތްތަކުން އަމިއްލަ އަތުން ފައިސާ ދައްކަން ޖެހޭނެ ކަމަށް އޭޑީކޭގެ ޗީފް މެޑިކަލް އޮފިސަރު ޑރ. އަބްދުﷲ ނިޔާފު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ނިޔާފު ވިދާޅުވީ، ޕްރައިވެޓް އިންޝުއަރެންސް ދޭ ގިނަ ކުންފުނިތަކުން ކޭޝްލެސް ސާވިސް ހުއްޓާލަން ނިންމައި އެ ހޮސްޕިޓަލަށް އަންގަމުން އަންނަ ކަމަށެވެ. އަދި މި ބަދަލު ގެނެސްފައި ވަނީ ޕްރައިވެޓް އިންޝުއަރެންސް އޮތް ނަމަ، އެ އިންޝުއަރެންސްގެ ލިމިޓް ހަމަވުމުން ނޫން ގޮތަކަށް އާސަންދަ ދޫނުކުރަން ނިންމި ނިންމުމާ ގުޅިގެން ކަމަށް ނިޔާފް ވިދާޅުވިއެވެ.
މިއާއެކު ދެން ޑޮކްޓަރަށް ދައްކާއިރު ޕްރައިވެޓް އިންޝުއަރަންސް އޮތް ނަމަވެސް އަމިއްލަ އަތުން ފައިސާ ދައްކަން ޖެހިދާނެ ކަމަށް ނިޔާފް ވިދާޅުވިއެވެ.
ޕްރައިވެޓް އިންޝުއަރެންސްގެ ލިމިޓް ހަމަނުވާ ނަމަ، ހިދުމަތް ހޯދަންދާ މީހާގެ އަތުން އެ ހިދުމަތަށްވާ ފުރިހަމަ އަގު ނަގާނެ ކަމަށާއި އެ ފައިސާ ހޮސްޕިޓަލަށް ދެއްކުމުން، ބިލެއް ދޭނެ ކަމަށް ނިޔަފް ވިދާޅުވިއެވެ. އެ ބިލު ޖެހެނީ ޕްރައިވެޓް އިންޝުއަރެންސް ހިދުމަތްދޭ ތަނަށް ހުށަހަޅައިގެން، ޑޮކްޓަރަށް ދެއްކުމަށް ހޭދަކުރި ފައިސާ އަނބުރާ ހޯދަން ކަމަށް އޭނަ ވިދާޅުވިއެވެ. ޕްރައިވެޓް އިންޝުއަރެންސް ދޭ މީހުންގެ އެންގުމަށް އެ ބަދަލު ގެނެސް ހިދުމަތް ދެމުން އައި ނަމަވެސް އިމަޖަންސީ ފަރުވާ ހޯދުމަށް އަންނަ ފަރާތްތަކަށް މިހާރެކޭ އެއްގޮތަށް ބިލިންގެ ކުރިން ހިިދުމަތް ދޭނެ ކަމަށް ވެސް ނިޔާފު ވިދާޅުވިއެވެ.
މި ބަދަލުތަކުގެ ތެރެއިން ޕްރައިވެޓް އިންޝުއަރަންސް ލިމިޓް ހަމަވުމުން އާސަންދައިން ހިދުމަތް ދޭ ގޮތަށް ބަދަލު ގެނައުމަށް އެންގީ މިދިޔަ ބުރާސްފަތި ދުވަހުއެވެ. އެއާއެކު އެ ބަދަލާ އެއްގޮތަށް ހިދުމަތް ފޯރުކޮށް ދިނުމަށް ގޮން ޖެހުންތަކެއް ހުރި ކަމަށް ނިޔާފް ފާހަގަ ކުރެއްވިއެވެ. އޭގެ އެންމެ ބޮޑު އެއް ޗެލެންޛަކަށް ވެފައި ވަނީ މެމޯ ހެއްދުމުގައި މަސައްކަތް ކުރާ މުވައްޒަފުން ޓްރެއިން ކުރުމަށް ކަމަށާއި އަދި ހިދުމަތް ދިނުމުގައި ވެސް މިހާރު ކަސްތަކެއް އުޅޭނެ ކަމަށް ނިޔާފް ވިދާޅުވިއެވެ.
އެގޮތުން ކޮންމެ މީހަކަށް މެމޯ ހެއްދުމަށް އައުމުން ފުރަތަމަ ޕްރައިވެޓް އިންޝުއަރަންސްގެ ލިމިޓްގައި ބާކީ ހުރި މިންވަރެއް ބަލަން ޖެހޭ ކަމަށާއި އެ އަދަދު ހާމަކޮށް ފައިސާ ދައްކަން ޖެހޭނި އެމީހަކު އަމިއްލަ އަށް ކަމަށާއި އަދި ހޮސްޕިޓަލުން ދޫކުރާ ބިލާ އެކު އެ އިންޝުއަރަންސް ކުންފުންޏަކަށް ހުށަހެޅުމުން ފައިސާ އަނބުރާ ލިބޭނެ ކަމަށް ބުނެ ދޭން ޖެހޭ ކަމަށް ނިޔާފް ވިދާޅުވިއެވެ. ހަމައެއާއެކު ޕްރައިވެޓް އިންޝުއަރަންސްގެ ލިމިޓް ހަމަވުމެފައިވާ ނަމަ އެ ފަރާތަކަށް އާސަންދައިން ހިދުމަތް ދެވޭނެ ކަމަށާއި ނިޔާފް ވިދާޅުވިއެވެ.
މީގެ އިތުރުން ޑޮކްޓަރަށް ދައްކައި ދޭ ބޭސް ސިޓީއަށް ބިލް ކުރުމުގައި ވެސް އަމަލު ކުރާނީ މިގޮތަށް ކަމަށް ނިޔާފް ވިދާޅުވިއެވެ.
އޭޑީކޭ ހޮސްޕިޓަލުން ހިދުމަތް ހޯދުމަށް ދާ ފަރާތްތަކުން ހިދުމަތް ލިބުމުގައި ލަސްތަކެއް ހުރި ކަން ފާހަގަ ކޮށް އަންނަނީ ޝަކުވާ ކުރަމުންނެވެ.
