ވެރިކަންކުރާ މައި ޕާޓީ، ޕީއެންސީ އިން އަނެއްކާވެސް އެ ޕާޓީގެ އެތެރޭގެ އިންތިހާބު ފަސްކޮށްފިއެވެ.
ޕީއެންސީއިން އެންމެ ފުރަތަމަ އިންތިހާބު ބާއްވަން ނިންމީ މިދިޔަ އޮކްޓޯބަރު މަހުގެ 19 ވަނަ ދުވަހު ނަމަވެސް ފަހުން ވަނީ އިންތިހާބު ބާއްވާ ތާރިހު މި މަހުގެ 9 ވަނަ ދުވަހަށް ފަސްކޮށްފައެވެ.
ޕީއެންސީން ބުނީ، މިމަހުގެ 9 ވަނަ ދުވަހު ބޭއްވުމަށް ހަމަޖެހިފައިވާ އެޕާޓީގެ ދާއިރާތަކުގެ މަގާމުތަކުގެ އިންތިހާބު ބާއްވާ ތާރީހު މިމަހުގެ 23 ވާ ހޮނިހިރު ދުވަހަށް މިހާރު ފަސްކޮށްފައިވާ ކަމަށެވެ. އިންތިހާބު ފަސްކޮށްފައިވަނީ ޖުމްހޫރީ ދުވަސް ކަމަށްވާ ނޮވެމްބަރު 11 ވާ ހޯމަ ދުވަހާއި ގުޅިގެން މިމަހުގެ 10 ވާ އާދިއްތަ ދުވަސް އެއީ ރަސްމީ ބަންދު ދުވަހެއްގެ ގޮތުގައި ރައީސް، ޑރ. މުހައްމަދު މުއިއްޒު ހަމަޖެއްސެވުމާއި ގުޅިގެން އެ ހަފްތާ ބަންދުގައި ގިނަ ބަޔަކު ރަށުން ބޭރަށް ދަތުރު ކުރުމަށް ހަމަޖެހިފައިވާތީ ކަމަށް އެ ޕާޓީން ވަނީ ބުނެފައެވެ. އެހެންކަމުން މިމަހުގެ 9 ވާ ހޮނިހިރު ދުވަހު ވޯޓުލުމުގައި މެންބަރުންނަށް ތަކުލީފުތައް ކުރިމަތިވާނެތީ، ކެނޑިޑޭޓުންނާއި މެންބަރުންގެ އެދުމުގެ މަތިން މި ތާރިހު ފަސްކުރަން ނިންމީކަމަށް އެ ޕާޓީން ވަނީ ބުނެފައެވެ.
މީގެ އިތުރުން އެ ޕާޓީން ބުނީ ދާއިރާތަކުގެ އިންތިހާބުގެ ވޯޓު ނަގާ ތާރީހު ބަދަލުވުމާއި ގުޅިގެން އިންތިހާބު ބާއްވަން ޖެހޭ ދާއިރާތަކާއި ރަށްރަށް އަދި ކެނޑިޑޭޓުންގެ ނަންތައް އަދި ވޯޓު ލެވޭ މީހުންގެ ލިސްޓު މިމަހުގެ 10 ގައި އާންމު ކުރާނެކަމަށެވެ.
