ހައްޖާއި އުމްރާގެ ހިދުމަތް ދޭއިރު އިސްކަން ދޭންވާނީ ވިޔަފާރިއަކަށް ވުރެ ބޮޑަށް އެކަމުން ލިބޭ ދަރުމައާއި ހެޔޮ ސަވާބަށްކަމުގައި ނައިބު ރައީސް ހުސައިން މުހައްމަދު ލަތީފް ވިދާޅުވެއްޖެއެވެ.
ދިވެހިރާއްޖޭގައި ބާއްވާ ފުރަތަމަ ހައްޖު، އުމްރާ ކޮންފަރެންސް ފެށުމުގެ ގޮތުން މިއަދު ހެނދުނު އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވި ރަސްމިއްޔާތު ޝަރަފުވެރި ކޮށްދެއްވަމުން ނައިބު ރައީސް ވިދާޅުވީ ރާއްޖޭގައި ފުރަތަމަ ފަހަރަށް ހައްޖާއި އުމްރާ ކޮންފަރެންސެއް ބޭއްވޭކަމީ މިކަމަށް އަދުގެ ސަރުކާރުން މިމަސައްކަތް ހަރުދަނާކުރުމަށް ކުރާ މަސައްކަތުގެ އަލިގަދަ ހެއްކެއް ކަމުގައެވެ.
ހައްޖުވެރިންނާއި އުމްރާވެރިންނަށް ހިދުމަތް ދިނުމަށް ހޭދަކުރާ ވަގުތަކީ ގެއްލިގެންދާނެ ވަގުތެއް ނޫންކަން ފާހަގަކުރައްވަމުން އެމަނިކުފާނު ވިދާޅުވީ މި ހިދުމަތް ދޭ ފަރާތްތަކަށް ސަރުކާރުގެ ފުރިހަމަ އެއްބާރުލުން ލިބޭނެކަމަށެވެ. އިތުރަށް ނައިބު ރައީސް ވަނީ މި ކޮންފަރެންސްގެ ތެރެއިން އިސްލާމިކް މިނިސްޓްރީ އާއި، މޯލްޑިވްސް ހައްޖު ކޯޕަރޭޝަނާ އަދި އެހެނިހެން ކުންފުނިތައް އެއްތަންވެ މަޝްވަރާކޮށް މިހާރު ހުރި މައްސަލަތަކަށް ހައްލު ހޯދޭނެކަމަށް އުންމީދު ކުރައްވާކަމަށެވެ.
މީގެ އިތުރަށް އެ މަނިކުފާނު ވިދާޅުވީ ހައްޖު ފަންޑު ތަރައްގީކޮށް އައު ވިސްނުންތަކެއް ވިސްނައި ހައްޖުގެ އަގު ތިރިކުރުމަށް ސަރުކާރުން ގެންގުޅޭ ސިޔާސަތަށް އަވަސް ހައްލެއް ލިބިގެން ދާނެކަމަށް ޔަގީންކުރައްވާ ކަމަށެވެ. އަދި ހައްޖާއި އުމްރާގެ އަޅުކަމުގެ މުހިންމުކަމާއެކު މި ދެ އަޅުކަމާއި ގުޅިފައިވާ އިންތިޒާމްތައް ހަމަޖައްސުމުގައި ވީހާ ލުއިފަސޭހަކޮށް އަޅުކަން އަދާކުރެވޭނެ ފެންވަރު ރަނގަޅު ހިދުމަތްތަކެއް ފޯރުކޮށްދިނުމަކީ ރައީސުލްޖުމްހޫރިއްޔާ ވަރަށް ބޮޑު އިސްކަމެއް ދެއްވާކަމެއްކަމުގައި ނައިބު ރައީސް ފާހަގަކުރެއްވިއެވެ.
ހައްޖު، އުމްރާ ކޮންޕަރެންސަކީ ރައީސް ޑރ. މުހައްމަދު މުއިއްޒުގެ މެނިފެސްޓޯގައިވާ، ދިވެހިރާއްޖެއިން މީހުން ހައްޖާއި އުމްރާއަށް ގެންދިއުމުގެ ނިޒާމު އިތުރަށް ހަރުދަނާކުރުމަށްޓައި މަޝްވަރާކުރުމުގެ މަގުސަދުގައި އެއް ދުވަހުގެ މުއްދަތަށް ބާއްވާ ކޮންފަރެންސްއެކެވެ.
