ނޫސްވެރިކަމުގެ ދާއިރާއިން ލައިފްޓައިމް އެޗީވްމަންޓް އެވޯޑް ނޫސްވެރިކަމުގެ ދާއިރާގައި ގިނަ ދުވަސްތަކެއް ވަންދެން މަސައްކަތް ކުރެއްވި ދެ ބޭފުޅަކަށް ދެއްވައިފިއެވެ.
ރޭ، އުމަރު ޒާހިރު އޮފީސް ބިލްޑިންގުގައި ބޭއްވި، “11 ވަނަ ނޫސްވެރިކަމުގެ އެވޯޑް”ހަފުލާގައި ލައިފްޓައިމް އެޗީވްމަންޓް އެވޯޑް ލިބިވަޑައިގެންނެވި ދެ ބޭފުޅުންނަކީ "އާފަތިސް" ނޫހުގެ ކުރީގެ އެޑިޓަރު އަހުމަދު ޒާހިރު (ފެއަރީ ޒާހިރު) އަދި ދައުރު ނޫހުގެ އެޑިޓަރު މޫސާ ލަތީފަށެވެ.
ނޫސްވެރިކަމުގެ ދާއިރާއިން ގައުމީ އިނާމުވެސް ލިބިވަޑައިގެންފައިވާ އަހުމަދު ޒާހިރާ މި ދާއިރާގައި މަސައްކަތް ކުރައްވަން ފެއްޓެވީ 1990 ވަނަ އަހަރުގައެވެ. އޭރު އާފަތިސް ނޫހުން ޒާހިރުގެ ލިޔުންތައް ފެނިގެން ދިޔައިރު އޭނާ ވަނީ ހަވީރު ނޫހުގައިވެސް މަސައްކަތް ކުރައްވާފައެވެ.
އުމުރުން އެންމެ 16 އަހަރުގެ މޫސަ ލަތީފު ނޫސްވެރިކަމުގެ ދާއިރާއަށް ނުކުމެ ވަޑައިގަތީ "ހަވީރު" ނޫހުން 1987 ވަނަ އަހަރެވެ. އުމުރުން 30 އަހަރުގައި މޫސައަށް ވަނީ ނޫސްވެރިކަމުގެ ރޮނގުން ގައުމީ އިނާމު ހާސިލުކުރައްވާފައެވެ. މީގެ އިތުރުން މި އަހަރު މޫސައަށް ވަނީ ޝަރަފުވެރިކަމުގެ ގައުމީ އިނާމު ވެސް ހާސިލުކުރައްވާފައެވެ.
ރޭ ބޭއްވި ހަފްލާގައި ނޫސްވެރިކަމުގެ ދާއިރާއިން ތަމްރީނު ދިނުމާއި ނޫސްވެރިން ބިނާކުރާ ފަރާތްތަކުގެ އަގުވަޒަންކުރުމުގެ އިނާމު މޯލްޑިވްސް ޖާނަލިސްޓް އެސޯސިއޭޝަނުގެ އިތުރުން ޝަމްއާން ޝާކިރު ވަނީ ދީފައެވެ.
