ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު މުރައިދޫގޭގައި މި ވަގުތު މަސައްކަތްކުރަމުން ދަނީ އެންމެ ހަތަރު މުވައްޒަފުންކަން މަޖިލީހުގެ އިދާރާއިން މިއަދު ބުނެފިއެވެ.
'ދަ ޕްރެސް'ގެ ފަރާތުން މިދިޔަ ޖުލައި މަހުގެ ފަހުކޮޅު ހުށަހެޅި އާރުޓީއައިގެ މުއްދަތު އިތުރުކުރުމަށް ފަހު މަޖިލީހުގެ އިދާރާއިން ދިން ޖަވާބުގައި އޭރު ބުނީ، މަޖިލީހުގެ އިމްތިޔާޒުތަކާއި ބާރުތަކުގެ ގާނޫނުގެ ދަށުން މަޖިލީހުގެ ރައީސަށް ހިމާޔަތާއި ރައްކާތެރިކަން ލިބިވަޑައިގެންފައި ވާތީ، މަޖިލީހުގެ ރައީސްގެ ރަސްމީ ގެކޮޅުގައި މަސައްކަތްކުރާ މުވައްޒަފުންގެ އަދަދު ހާމަކުރުމާ މެދު ސަލާމަތީ ހިދުމަތްތަކާ ބެހޭ ކޮމިޓީން އަދަދު ހާމަކުރުމާ މެދު ގޮތެއް ނިންމާނެ ކަމަށެވެ.
އެ ކޮމިޓީން މި މަހުގެ 14 ވަނަ ދުވަހު ހެނދުނު ބޭއްވި ބައްދަލުވުމުގައި ފުރަތަމަ ނިންމީ މުރައިދޫގޭގައި މަސައްކަތްކުރާ މުވައްޒަފުންގެ މައުލޫމާތު ސިއްރުކުރުމަށެވެ. އެކަމަކު ރައީސް ޑރ. މުހައްމަދު މުއިއްޒުގެ އެދިވަޑައިގެންނެވުމުގެ މަތިން އިތުރު ބައްދަލުވުމެއް ބާއްވައި، ކޮމިޓީން އޭރު ނިންމި ނިންމުން އަނބުރާ ގެންގޮސް މައުލޫމާތު ހާމަކުރަން ނިންމީއެވެ.
ބައްދަލުވުމާ ގުޅޭގޮތުން އިތުރު ތަފްސީލެއް ހޯދުމަށް އެ ދުވަހު ތަކުރާރުކޮށް 'ދަ ޕްރެސް' އިން ސުވާލުކުރުމުން ނުދެއްވި ނަމަވެސް، އިތުރު ބައްދަލުވުމެއް ބާއްވަނީ ރައީސް އަންގަވައިގެންތޯ ސުވާލުކުރުމުން، ސަލާމަތީ ހިދުމަތްތަކާ ބެހޭ ކޮމިޓީގެ ނައިބު މުގައްރިރު އަދި އިނގުރައިދޫ ދާއިރާގެ މެންބަރު، ޕީއެންސީގެ ޕާލިމެންޓްރީ ގްރޫޕުގެ ލީޑަރު އިބްރާހީމް ފަލާހު ވަނީ އެކަން ދޮގުކުރައްވައިފައެވެ.
މަޖިލީހުގެ އިދާރާއިން ދިން ޖަވާބުގައި ވާ ގޮތުން މަޖިލީހުގެ ރައީސްގެ ރަސްމީ ގެކޮޅުގައި މަސައްކަތްކުރާ ބައެއް މަގާމުތަކަށް ބަދަލު ގެނެސްފައިވެއެވެ. އެ ބަދަލުތަކަކީ:
- އާންމު ހިދުމަތުގެ އޮފިސަރުގެ މަގާމުގެ ރޭންކު ޖީއެސް-3 އިން ޖީއެސް-4 އަށް ބަދަލުކުރުން
- ހައުސްކީޕަރު މަގާމުގެ ރޭންކު އެސްއެސް-2 އިން އެސްއެސް-3 އަށް ބަދަލުކުރުން
- ކިޗަން ހެލްޕަރުގެ މަގާމުގެ ނަން އެސިސްޓަންޓް ހައުސްކީޕަރަށް ބަދަލުކުރުން
- ޑިރެކްޓަރު ޖެނެރަލްގެ މަގާމު އުފެއްދުން
- އެސިސްޓަންޓް މެއިންޓަނެންސް އޮފިސަރުގެ މަގާމު އުނިކުރުން
- ސީނިއާ އިލެކްޓްރިކަލް އެންޑް މެއިންޓަނެންސް އޮފިސަރުގެ ރޭންކް އެސްއެސް-4 އިން އެމްއެސް-2 އަށް ބަދަލުކުރުން
ހަމަ އެއާއެކު މަޖިލީހުގެ ރަސްމީ ގެކޮޅަށް އައްޔަންކުރި މުވައްޒަފުންގެ ތަފްސީލު ވެސް މި ޖަވާބުގައި ހިމަނާފައިވެއެވެ. އެއީ:
- ޗީފް އޮފް ސްޓާފް: ތަޖުރިބާކާރު ނޫސްވެރިޔާ މުންޑޫ އާދަމް ހަލީމް
- ޑިރެކްޓަރު ޖެނެރަލް: އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ)
- ސީނިއާ އިލެކްޓްރިކް އެންޑް މެއިންޓަނެންސް އޮފިސަރު: އަލީ ސާޖިދު
- އާންމު ހިދުމަތްތަކުގެ އޮފިސަރު: އިސްމާއީލް ތޯރިގު
މުވައްޒަފުންގެ މުސާރައިގެ ތަފްސީލު:
ޗީފް އޮފް ސްޓާފް ފިޔަވައި އެހެން މުވައްޒަފުންނަށް އިތުރު ގަޑީގެ ފައިސާ ލިބެއެވެ.
މުރައިދޫގޭގައި ހިނގި މަރާމާތުތަކާ ބެހޭގޮތުން ސުވާލުކުރުމުން ދިން ޖަވާބުގައި ރައްޔިތުންގެ މަޖިލީހުގެ އިދާރާއިން ބުނީ، މުރައިދޫގޭގެ މަރާމާތާ ގުޅޭ އެއްވެސް މައުލޫމާތެއް އެ އިދާރާގައި ނެތް ކަމަށެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މުރައިދޫގެ އަށް ބަދަލުވެވަޑައިގަތީ މިދިޔަ ޖުލައި މަސް ނިމުނުކޮޅުގައެވެ. އަދި މުރައިދޫގޭގެ ޗީފް އޮފް ސްޓާފަކަށް ތަޖުރިބާކާރު ނޫސްވެރިޔާ އާދަމް ހަލީމް އައްޔަންކޮށް، ޑިރެކްޓަރު ޖެނެރަލް ކަމަށް މަޝްހޫރު ފުޓްބޯޅަ ކުޅުންތެރިޔާ އަލީ އަޝްފާގު ވަނީ އައްޔަންކޮށްފައެވެ.
މަޖިލީހުގެ ރައީސް ހުންނެވުމަށް މުރައިދޫގެ ހާއްސަކުރީ މެއި 6، 2021 ގައި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލައާ ގުޅިގެން ދައުލަތުގެ އިސްވެރިންގެ ސަލާމަތީ ކަންކަން ވަރުގަދަ ކުރުމަށް ގާނޫނަށް ގެނައި އިސްލާހާއެކުއެވެ. އެއަށް ފަހު އުއްތަމަ ފަނޑިޔާރަށް ވެސް ވަނީ ރަސްމީ ގެކޮޅެއް ހަމަޖައްސައިދީފައެވެ.
