ރީތީގެ ރާނީ ހޮވުމަށް ދުނިޔޭގެ ފެންވަރުގައި ބާއްވާ "މިސް ޔުނިވާސް" މުބާރާތުގައި ދިވެއްސަކު ބައިވެރިވުން ސަރުކާރުން ކުށްވެރިކޮށްފިއެވެ.
މިކަމާ ގުޅިގެން ނެރުނު ނޫސް ބަޔާނުގައި ޔޫތު މިނސިްޓްރީއިން ބުނީ ދިވެހިންގެ ދިނާއި ސަގާފަތާ ނުގުޅޭ ހަރަކާތްތަކާއި މުބާރާތްތައް ބޭއްވުމާއި އަދި އެކިއެކި ފަރާތްތައްކުން ބާއްވާ އެފަދަ މުބާރާތްތަކާއި ހަރަކާތްތަކުގައި ދިވެހިން ބައިވެރިވުމަކީ، ދިވެހި ސަރުކާރުން ބަލައިގަންނާނެ ކަމެއް ނޫން ކަމުގައެވެ.
އެފަދަ ކަންކަމަކީ، ދިވެހިން ގަބޫލު ކުރާ އާންމު އަހުލާގީ މިންގަނޑުތަކާއި އުސޫލުތަކާވެސް ހިލާފު ކަންކަމަށް ވާއިރު، ރާއްޖޭ ތަމްސީލު ކުރުމުގެ ނަމުގައި ދިވެއްސަކު އެފަދަ ހަރަކާތަކަށް ދިއުން، ދިވެހި ސަރުކާރުން ކުށްވެރި ކުރާ ކަމަށް ޔޫތު މިނިސްޓްރީއިން ވަނީ ބުނެފައެވެ. އަދި އެ ހަރަކާތުގައި ބައިވެރިވުމަށް މަސައްކަތް ކުރަމުންދާ ފަރާތުން އެކަން ހުއްޓާލުމަށް ވެސް ގޮވާލާފައިވެއެވެ.
ޔޫތު މިނިސްޓްރީއިން ބުނީ ރާއްޖެ ތަމްސީލު ކުރުމުގެ ނަމުގައި އެފަދަ އެއްވެސް ހަރަކާތެއްގައި ދިވެއްސަކު ބައިވެރި ކުރުމަކީ ސަރުކާރުން ކުރާނޭ ކަމެއް ނޫން ކަމަށެވެ. އެހެންކަމުން އެއީ ސަރުކާރުން ކުރުވާ ކަމެއްކަން ދޭހަވާ ގޮތަށް މައުލޫމާތު ނުފެތުރުމަށް ޔޫތު މިނިސްޓްރީއިން ވަނީ އެދިފައެވެ.
ޔޫތު މިނިސްޓްރީގެ ބަޔާނުގައި އިތުރަށް ބުނީ އެފަދަ ކަންކަމުގައި ދިވެހިން ބައިވެރި ނުވުމަށް އެންމެހާ ރައްޔިތުންނަށް ގޮވާލާ ކަމަށެވެ.
އިންޑިއާގައި ހުންނަ މެކްސިކޯގެ އެމްބަސީން އިއްޔެ ކުރި ޓްވީޓެއްގައި ބުނެފައި ވަނީ، މިސް ޔުނިވާސް 2024 ގައި ރާއްޖެ ތަމްސީލް ކުރާ ޝައިނާ ނަސީމްއަށް މެކްސިކޯއަށް ދިއުމަށް ވިސާ ހަމަޖައްސައިދީފައިވާ ކަމަށެވެ.
