ހާލުކޮޅު ގޯސްވެ މަޖިލީހުގެ ރައީސް، އަބްދުއްރަހީމް އަބްދުﷲ އަށް ހޮސްޕިޓަލުގައި ފަރުވާ ދެއްވައިފިއެވެ.
މަޖިލީހުގެ އަމީންއާންމު ފާތިމަތު ނިއުޝާ 'ދަ ޕްރެސް' އަށް ވިދާޅުވީ މަޖިލީހުގެ ރައީސްގެ ސިއްހީ ހާލުކޮޅު ގޯސްވެ ހޮސްޕިޓަލުގައި އެޑްމިޓުކޮށްގެން ފަރުވާ ދިނުމަށްފަހު މިހާރު ދޫކޮށްލާފައިވާ ކަމަށެވެ.
މާބޮޑު ތަފްސީލެއް ހިއްސާ ނުކުރައްވާ ނިއުޝާ އިތުރަށް ވިދާޅުވީ، އެމަނިކުފާނު މިރޭ ހޮސްޕިޓަލުން ފަރުވާ ހޯއްދަވާފައި ވަނީ މޭފުޅަށް ތަދެއް އަރަައިގެން ކަމަށެވެ.
ވިހިވަނަ ރައްޔިތުންގެ މަޖިލީހުގެ ރައީސްކަމަށް އަބްދުއްރަހީމް އިންތިހާބުވެ ވަޑައިގެންފައި ވަނީ މަޖިލީހުގެ ފުރިހަމަ އަޣުލަބިއްޔަތާއެކު މެއި 28، 2024 ގައެވެ. މަޖިލީހުގެ ރައީސް ހޮވުމަށް ނެގި ވޯޓުގައި އަބްދުއްރަހީމް އާ ވާދަކުރެއްވީ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް އެވެ. 71 ވޯޓާއެކު މަޖިލީހުގެ ރައީސް ކަމަށް އަބްދުއްރަހީމް އިންތިހާބުވެ ވަޑައިގެންނެވިއިރު ނާޒިލް އަށް ލިބިވަޑައިގަތީ 14 ވޯޓެވެ. އަދި 7 ވޯޓު ބާތިލް ވިއެވެ.
އަބްދުއްރަހީމަކީ ހިތުގެ ބަލި ހުންނަ ބޭފުޅަކަށްވާއިރު އެމަނިކުފާނު މީގެ ކުރިންވެސް ވަނީ އެ ބައްޔަށް ފަރުވާ ހޯއްދަވާފައެވެ.
