އިސްދޫ ދާއިރާގެ ކުރީގެ މެންބަރު އަލީ ހަމީދުގެ ކުންފުންޏަކަށް އޮފީހެއް އިމާރާތްކުރުމަށް އާސަންދަ އިން އެޑްވާންސްގެ ގޮތުގައި ދިން ފައިސާ އަށް ވީ ނުވީ ނޭނގި، އެ މައްސަލަ ތަހްގީގުކުރުމަށް ފުލުހުންނަށް ހުށަހަޅަން މާލިއްޔަތު ކޮމިޓީން ނިންމައިފިއެވެ.
އާސަންދައިގެ އާ އޮފީސް އިމާރާތްކުރުމަށް ހަމީދުގެ ނޯތު ކޯސްޓް ކުންފުންޏާ ހަވާލުކުރީ 147 މިލިއަން ރުފިޔާއަށެވެ. އަދި މި މަސައްކަތުގެ އެޑްވާންސްގެ ގޮތުގައި އާސަންދައިން އެޑްވާންސްގެ ގޮތުގައި އެ ކުންފުންޏަށް 44 މިލިއަން ރުފިޔާ ދީފައިވެއެވެ. ނަމަވެސް މި މަސައްކަތް ކުރިއަކަށް ނުދެއެވެ.
މި މައްސަލައާ ގުޅޭގޮތުން ކޮމިޓީގައި ވާހަކަ ދައްކަވަމުން މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހްމަދު ނާޒިމް ވިދާޅުވީ، އާސަންދައިގެ ސިޓީގައިވާ ގޮތުން، އާސަންދައިން ނޯތު ކޯސްޓަށް އެޑްވާންސްގެ ގޮތުގައި ދެއްކި 44 މިލިއަން ރުފިޔާ އިން ކުރި ހަރަދުގެ ތަފްސީލެއް ނުލިބޭ ކަމަށާއި، އެހެންކަމުން މި ރުފިޔާއިން ކޮންމެވެސް ބަޔަކަށް ބަދަލެއް ދީފައިވާ ކަމަށް ގަބޫލުކުރެވޭ ކަމަށެވެ.
ނާޒިމް ހުށަހެޅުއްވީ މި މައްސަލައިގައި ޖިނާއީ ތަހްގީގެއް ހިންގުމަށް ފުލުހުންނަށް ހުށަހެޅުމަށެވެ.
ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވީ މި މައްސަލަ އަވަހަށް ނިމޭނީ ފިނޭންސް މިނިސްޓްރީ އަށް ހުށަހެޅުމުން ކަމަށާއި، ހައުސިން މިނިސްޓްރީ ނުވަތަ ފިނޭންސް މިނިސްޓްރީ އަށް މައްސަލަ ހުށަހެޅުމަށް ފެނިވަޑައިގަންނަވާ ކަމަށެވެ.
ނާޒިމްގެ ހުށަހެޅުއްވުމަށް އޭދަފުށި ދާއިރާގެ މެންބަރު އަހްމަދު ސަލީމާއި ހިތަދޫ މެދު ދާއިރާގެ މެދު ދާއިރާގެ މެންބަރު އަހްމަދު އަޒާން ތާއީދުކުރެއްވިއެވެ.
އެހެންކަމުން ނާޒިމްގެ ހުށަހެޅުއްވުމާ މެދު ގޮތެއް ނިންމުމަށް އެހުމުން ކޮމިޓީގެ އިއްތިފާގުން ނިންމީ ފުލުހުންނަށް މި މައްސަލަ ހުށަހެޅުމަށެވެ.
