މި އަހަރުގެ ބަޖެޓުގެ ހަރަދުތައް ފޫބެއްދުމަށްޓަކައި ސަރުކާރުން ހުށަހެޅި 5.1 ބިލިއަން ރުފިޔާގެ ސަޕްލިމެންޓަރީ ބަޖެޓު، ރައްޔިތުންގެ މަޖިލީހުން ފާސްކޮށްފިއެވެ.
ސަރުކާރުން ސަޕްލިމެންޓަރީ ބަޖެޓު ހުށަހެޅީ މިދިޔަ ބުރާސްފަތި ދުވަހުގައެވެ. ފިނޭންސް މިނިސްޓްރީ އާއި މަރުކަޒީ ބޭންކް އެމްއެމްއޭ އާއި އޮޑިޓަރު ޖެނެރަލް އޮފީހުގެ ލަފާ ހޯދުމަށް ފަހު ވެސް ބަޖެޓު ދިރާސާކުރި ކޮމިޓީން ނިންމީ ސަރުކާރުން ހުށަހެޅި ގޮތަށް، ސަޕްލިމެންޓަރީ ބަޖެޓު ފާސްކުރުމަށް ތަޅުމަށް ހުށަހެޅުމަށެވެ.
އެހެންވެ، އެކަމަށްޓަކައި މިއަދު ނެގި ވޯޓުގައި ސަޕްލިމެންޓަރީ ބަޖެޓު ފާސްކުރުމަށް ވޯޓުގައި ބައިވެރިވި 86 މެންބަރުންގެ ތެރެއިން 75 މެންބަރުން ވޯޓު ދެއްވިއިރު، ނުފެންނަ ކަމަށް 11 މެންބަރުން ވޯޓު ދެއްވިއެވެ.
ސަޕްލިމެންޓަރީ ބަޖެޓު ހުށަހަޅުއްވަމުން ފިނޭންސް މިނިސްޓަރު މޫސާ ޒަމީރު ބުރާސްފަތި ދުވަހު ވިދާޅުވި ގޮތުގައި މި ބަޖެޓަށް ފައިސާ ހޯދުމަށް ރާވާފައި ވަނީ ޕްރޮޖެކްޓް ލޯނުތަކުންނާއި ރާއްޖޭގެ ފަރާތްތަކުން ލޯނު ހޯދައިގެންނާއި ޓީބިލު ވިއްކައިގެންނެވެ.
އެގޮތުން މި ސަޕްލިމެންޓަރީ ބަޖެޓު ފައިނޭންސްކުރަން ނިންމާފައި ވަނީ ބޭރު ގައުމުތަކުން 1 ބިލިއަން ރުފިޔާ އަދި ރާއްޖެއިން 3 ބިލިއަން ރުފިޔާ ހޯދައިގެން ކަމަށް އޭނާ ވިދާޅުވިއެވެ.
ޒަމީރު ވިދާޅުވީ ސަޕްލިމެންޓަރީ ބަޖެޓުގެ އާމްދަނީ ހިމަނައިގެން އާމްދަނީ އާއި ހިލޭ އެހީގެ ގޮތުގައި 34 ބިލިއަން ރުފިޔާ ލިބޭނެކަމަށް ލަފާކުރެވޭ ކަމަށާއި، އެއާއެކު ސަޕްލިމެންޓަރީ ބަޖެޓުގެ ޖުމްލަ ޑެފިސިޓަކީ 4 ބިލިއަން ރުފިޔާ ކަމަށާއި، އެހެންކަމުން އެހެންކަމުން މި އަހަރުގެ ބަޖެޓުގެ ޑެފިސިޓް 18 ބިލިއަން ރުފިޔާއަށް އިތުރުވެގެން ދާނެ ކަމަށް ވެސް ވިދާޅުވިއެވެ.
ސަޕްލިމެންޓަރީ ބަޖެޓުގެ މުހިންމު ބައެއް ނުކުތާތައް:
- ޖުމްލަ: 5،119،508،129 ރުފިޔާ
- ޕީއެސްއައިޕީ: ދެ ބިލިއަން ރުފިޔާ
- އެސްއޯއީ: 441.4 މިލިއަން ރުފިޔާ
- ކޮންޓިންޖެންސީ ބަޖެޓު: 650 މިލިއަން ރުފިޔާ
- ދަރިވަރުންގެ ލޯނު ދޫކުރުމަށް: 458.4 މިލިއަން ރުފިޔާ
- ބޭސްތަކަށް: 200 މިލިއަން ރުފިޔާ
- ބޭސްފަރުވާގެ އެހީއަށް: 262.6 މިލިއަން ރުފިޔާ
- ސަބްސިޑީއަށް: 1.02 ބިލިއަން ރުފިޔާ
- މުސާރަ: 24.4 މިލިއަން ރުފިޔާ
