އައިލެންޑް އޭވިއޭޝަނުން ނަގާފައިވާ ލޯނުތަކުގެ މައުލޫމާތާއި އެ ކުންފުނީގެ މާލީ ހާލަތު ރަނގަޅުކުރުމަށް ރާވާފައިވާ ކަންކަން ސާފުކުރުމަށް ބާއްވަން ތާވަލުކުރި ސަރުކާރު ހިއްސާވާ ކުންފުނިތަކުގެ (އެސްއޯއީތަކުގެ) ކޮމިޓީގެ ބަނދަރާއި އެއާޕޯޓާއި އެއާލައިންތަކާ ގުޅޭ ކުންފުނިތަކުގެ ސަބްކޮމިޓީގެ ބައްދަލުވުން ސިއްރުކޮށްފިއެވެ.
އެސްއޯއީ ކޮމިޓީގެ މި ސަބްކޮމިޓީގައި ތިއްބަވަނީ ކިނބިދޫ ދާއިރާގެ މެންބަރު އަލީ އަޝްރަގާއި ފޭދޫ ދެކުނު ދާއިރާގެ މެންބަރު އިބްރާހީމް ދީދީ އާއި މާވަށު ދާއިރާގެ މެންބަރު އަހްމަދު ޝާކިރާއި ދުވާފަރު ދާއިރާގެ މެންބަރު މުހައްމަދު އަލީއެވެ.
މި ސަބްކޮމިޓީގެ މިއަދުގެ ބައްދަލުވުން ސިއްރުކުރުމަށް ހުށަހެޅުއްވީ ފޭދޫ ދެކުނު ދާއިރާގެ މެންބަރު އިބްރާހީމް ދީދީއެވެ. ކޮމިޓީގެ މުގައްރިރު އަޝްރަގު ވިދާޅުވީ، ބައްދަލުވުން ސިއްރުކުރަން ނިންމެވީ މިއަދު ކުރިއަށް ދަނީ ސަބްކޮމިޓީގެ ބައްދަލުވުމަކަށް ވެފައި، މައި ކޮމިޓީ އަށް އެކަމާ ގުޅޭ ރިޕޯޓު ހުށަހަޅާނެތީ ކަމަށެވެ.
މިދިޔަ އަހަރު އައިލެންޑް އޭވިއޭޝަނަށް ވަނީ 71 މިލިއަން ރުފިޔާގެ ގެއްލުމެއް ވެފައެވެ. އެ ކުންފުނީގެ ދަރަނި މިހާރު ހުރީ 515 މިލިއަން ރުފިޔާގައެވެ.
