ކޮރަޕްޝަންގެ މައްސަލަތައް ނުބަލައި އެއްވެސް ކަމެއް ނުކޮށް އޭސީސީގެ މެންބަރުން ތިބޭ ނަމަ އެ މަންޒަރު ބަލަން ރައްޔިތުންގެ މަޖިލީހުން ނޯންނާނެ ކަމަށް، އެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހްމަދު ނާޒިމް ވިދާޅުވެއްޖެއެވެ.
އެންޓި-ކޮރަޕްޝަން ކޮމިޝަންގެ ރައީސާއި ނައިބު ރައީސް ކަނޑައެޅުމުގެ ބާރު ސީދާ ރައީސުލްޖުމްހޫރިއްޔާ އަށް ދޭ ގޮތަށް ސަރުކާރުން ހުށަހެޅި އިސްލާހަށް ބަހުސްކުރައްވަމުން ނާޒިމް ވިދާޅުވީ، މިދިޔަ ސަރުކާރުން އޭސީސީ އަށް އައްޔަންކުރި މެންބަރުންގެ ދައުރުގައި ތިން އަހަރު ބާކީ އެބައޮތް ކަމަށާއި، ރަނގަޅަށް މަސައްކަތްކުރާ ތަނަކަށް އެ މުއައްސަސާ ހަދަން ޖެހޭ ކަމަށެވެ.
"އަޅުގަނޑު ގަބޫލުކުރާ ގޮތުގައި ރާއްޖޭގެ އެއްވެސް ރައްޔިތަކު ނެތް، އެންޓި-ކޮރަޕްޝަން ބޯޑު ހިނގަންވާ ގޮތަށް ހިނގާ ކަމަށް ޕާފޯމްކުރަންވާ ގޮތަށް ޕާފޯމް ކުރެވޭ ގޮތަށް ކޮރަޕްޝަންގެ މައްސަލަ ހައްލުކުރެވޭ ފަދަ ބަޔަކަށް އެންޓި-ކޮރަޕްޝަން ކޮމިޝަން ވާ ކަމަށް ގަބޫލުކުރާ،" ނާޒިމް ވިދާޅުވިއެވެ.
އެހެންކަމުން، އޭސީސީގެ ރައީސާއި ނައިބު ރައީސް އައްޔަންކުރުމުގެ ބާރު ސީދާ ރައީސުލްޖުމްހޫރިއްޔާ އަށް ލިބެން ޖެހޭ ކަމަށް އޭނާ ވިދާޅުވިއެވެ.
"އަޅުގަނޑު އެދެނީ އެންޓި-ކޮރަޕްޝަންގެ މެންބަރުން، އެ ބޭފުޅުން ފަސް މެންބަރުން ތިއްބަވާއިރު އެ ބޭފުޅުންނާއި ދެން ތިއްބެވި ބާކީ މެންބަރުން ވެސް ހިނހޫތަނުން ކާލައިގެން އެއްވެސް ކަމެއްނުކޮށް ތިބެވޭ ގޮތަށް އެ މީހުންނަށް ޖާގަ ދީގެން ހުންނަ ކަހަލަ ރައީސަކު އެތަނަށް ލައިގެން އަނެއްކާ ވެސް މި ފަސް އަހަރު ވެސް ހަމަ ކޮރަޕްޝަން ހިނގާ ގޮތަށް ހިނގަން ދޫކޮށްލީމަކާ އަޅުގަނޑުމެންނެއް އެތަން ބަލާކަށް ނުތިބޭނެ،"
ނާޒިމް ވިދާޅުވީ، ކޮރަޕްޝަން ނުހުއްޓުވޭ ކަމަށާއި، އޭސީސީން ކޮރަޕްޝަން ހުއްޓުވުމަށްޓަކައި މަސައްކަތްކުރާ މަންޒަރެއް ވެސް ނުފެންނަ ކަމަށެވެ.
