ބޮލީވުޑްގެ ބަތަލާ ކްރިތީ ސެނަން ޑަބަލް ރޯލުން ފެނިގެންދާ ފިލްމު "ދޯ ޕައްތީ" އަކީ މަސްހުނި އިހުސާސްތަކެއް ކުރިވި ފިލްމެކެވެ. ފިލްމުގައި ކްރިތީ އާއެކު ދެން ހަރަކާތްތެރިވި މައިގަނޑު ތަރިންނަކީ ބަތަލާ ކާޖޮލް އާއި ޓީވީ ސިލްސިލާތަކުން މަޝްހޫރުކަން ހޯދު ޝަހީރު ޝެއިހްއެވެ.
ފިލްމުގެ ސްޓޯރީލައިން: ހަމަ ހިމޭން މާހައުލެއްގެ ތެރޭގައި ފަރުބަދަ ބޯކޮށް ހެދިފައި ހުރި ރަށެއްގައި މީހަކު މަރާލަން އުޅުނު މައްސަލައެއް ފެންމަތިވެގެން ދެއެވެ. މި މައްސަލަ ތަހުގީގު އޮފިސަރު ވިދްޔާ ޖޯތީ (ކާކޮލް) އަށް ޝައްކުވަނީ މި މައްސަލައިގައި ފެންނަން ހުރި ކަންތައްތަކަށްވުރެ ފޮރުވިފައިވާ ސިއްރު ގިނަ ކަމެވެ. ނަމަވެސް ސުވާލަކީ ވިދްޔާ އަށް އެމީހުން ދެއްކި މަންޒަރުގެ ހަގީގަތާއި ދޮގު ވަކިކުރެވޭނެބާވައެވެ؟
ރިވިއު:
ސޯމްޔާ އާއި ޝައިލީ އަކީ އެއްމާބަނޑު ދެބެއިންނެވެ. ދެމީހުން ކުޑައިރު ހިނގި ހިތާމަވެރި ހާދިސާއެއްގެ ސަބަބުން ސޯމްޔާ އަށް ނަފްސާނީ ގޮތުން ބޮޑު އަސަރުތަކެއް ކުރުމާއެކު ދެމީހުން ބަލާ ބޮޑު ކުރި މީހާއަށް އަބަދުވެސް އިސްކަން ދެވެނީ ސޯމްޔާއަށެވެ. އެއާއެކު ޝައިލީ ބާކިވ، ސޯމްޔާ އަށް އޭނާ ނަފްރަތު ކުރަން ފަށައެވެ. ދެމީހުން އޮޅުވާލެވޭހާ ވައްތަރު ނަމަވެސް ދެމީހުންގެ އުޅުން އުޑާ ބިމާހާ ތަފާތެވެ. ސޯމްޔާ އަކީ އާދައިގެ ސާދާ ދިރިއުޅުމެއް ބޭނުންވާ އަންހެނެކެވެ. ނަމަވެސް ޝައިލީ އަކީ މިޒަމާނުގެ އަންހެން ކުދިން ފަދައިން "ޕާޓީ" ކުރާ އަންހެނެކެވެ. ސޯމްޔާ އަށް ދްރޫވް ފެނި ހިތާވެއެވެ. އަދި އޭނާގެ ހިތުގެ ހާލަތު ބަޔާންނުކުރެވި އުޅެނިކޮށް ޝައިލީ އެނބުރި ގެއަށް އާދެއެވެ. އެއާއެކު ޝައިލީ އާއި ދްރޫވްގެ ގުޅުން ބަދަހިވެއެވެ. ނަމަވެސް ފަހު ވަގުތު ދްރޫވް ކައިވެނިކުރަނީ ސޯމްޔާއާއެވެ. ޝައިލީގެ ހިތުގައި ބަދަލު ހިފުމުގެ ރޫހު އަށަގަނެއެވެ. ދްރޫވް އަކީ ފަރުބަދަ ސަރަހައްދުގައި ޕެރަގްލައިޑިން ވިޔަފާރިއެއް ހިންގާ މީހެކެވެ. ކުއްލި ކުއްލިއަށް ރުޅި އައުމަކީ އޭނާގެ މިޒާޖުގައިވާ ކަމެކެވެ. ސިޔާސީ ގުޅުން އޮންނަ މުއްސަނދި އާއިލާއަކަށް ނިސްބަތްވާ ދްރޫވް ހުރިހާ މައްސަލަތަކުންވެސް ރެކި ގަންނަނީ އޭނާގެ ބައްޕަގެ އެހީއާއެކުގައެވެ. ބޭރުފުށުން ހުރިހާ ކަމެއްވެސް ރަނގަޅަށް ހިނގަމުންދަނިކޮށް، ހީނުކުރާފަދަ ކަންތައްގަނޑެއް ހިނގުމުގެ ސަބަބުން ފުލުސް އޮފިސަރު ވީޖޭ، އެ އާއިލާއާ ގުޅޭ ހުރިހާ ކަމަކާމެދު ސުވާލު އުފައްދަން ފަށައެވެ.
"ދޯ ޕައްތީ" އަކީ ސިދާތް މަލްހަތްރާ އާއި ސޮނާކްޝީ ސިންހާ އެކުގައި ކުޅުނު ފިލްމު "އިއްތިފާގު" ގެ ވައިބެއް ގެނައި ފިލްމެކެވެ. އަދި އަދިތްޔާ ރޯއީ ކަޕޫރު ކުޅުނު "ގުމްރާހް"ގެ ވައިބެއް ވެސް ގެނައި ފިލްމެކެވެ. މި ފިލްމުގައި ހުސްވެސް ކަމަކަށް އޮތީ އޮޅުވާލުމާއި މަކަރުވެރިކަމެވެ. ބަލަން ތިބޭ މީހުންގެ ސިކުނޑި ސުމަކަށް ދުއްވާލާ ކަހަލަ ފިލްމެކެވެ. މި ފިލްމު ފުރިހަމަވި ނަމަވެސް މި ފިލްމުވެގެންދާނީ ވަރަށް މޮޅު ތްރިލާއަކަށެވެ. މި ފިލްމުގައި ސޯމްޔާ އާއި ޝައިލީގެ ދިރިއުޅުމުގައި އިތުރު ކަންތައްތަކެއް ހުރިކަމަށް ގަބޫލުކުރުވައި އެކަމަށް ޝައުޤުވެރިކުރުވައެވެ. ނަމަވެސް ފިލްމުގެ ވަކި ހިސާބަކަށް ދިޔަ ތަނާ ފިލްމުގައި ދެން ކަންތައް ވެގެންދާނެ ގޮތް ސާފުކޮށް ހާމަވިއެވެ.
ފިލްމުގެ ކެރެކްޓަރުންގެ މާ ބޮޑު ފުންމިނެއް ނެތް އިރު ގަބޫލުކުރަންޖެހޭ ހަގީގަތަކީ ފިލްމުގައި އެންމެ ޝައުގުވެރިކަން އުފެއްދީ ކާޖޮލް އާއި އެކު މަސައްކަތްކުރަމުން އަންނަ ބްރިޖެންދުރާ އާއި ދެމީހުން ދެކެވޭ ވާހަކަތަކެވެ. ބަތަލާ ކްރިތީ ބޮލީވުޑަށް ތައާރަފްވީއްސުރެ ތަފާތު އެކި ކަހަލަ ރޯލު ތަކުން ފެނުނު ނަމަވެސް މި ފިލްމުގައި ކްރިތީގެ ފަރާތުން ފެނިގެންދިޔައީ މާޔޫސްކަމެކެވެ. ޑަބަލް ރޯލުކުޅުމުގައި އޭނާ ދަތިކަންތައްތަކާ ކުރިމަތިލާންޖެހިފައިވާ ކަން ފިލްމުން ބަލައިލުމުން ހާމަވިއެވެ.
ޖުމްލަކޮށް ބުނާނަމަ މި ފިލްމަކީ ގެވެށި އަނިޔާ، ޗައިލްޑްހުޑް ޓްރޯމާގެ މައްސަލަތަކަށް ބިނާކޮށްފައިވާ ފިލްމެކެވެ. ފިލްމުގައި މުހިއްމު މައްސަލަތަކަކަށް އަލިއަޅުވާލެވިފައި ހުރި ނަމަވެސް މި ފިލްމު އެންމެ ފުރިހަމައަށް ޑެލިވާކުރެވޭ ގޮތް ވަނީ ނުވެފައެވެ. ކްރިތީގެ ކެރެކްޓާ އަށް އެއްޗެކޭ ބުނާނަމަ ސޯމްޔާގެ ރޯލު ބަތަލާ ކުޅެފައިވާ ގޮތް ރަނގަޅެވެ. ބަލަން ތިބޭ މީހުންގެ ހިތުގައި ރިއްސާލާނެއެވެ. ސިއްރުން ފުރިގެންވާ މި ފިލްމުގައި ކަންތައްތައް ވެގެންދާ ގޮތް ބެލުމަށް ފިލްމު ބަލާށެވެ. މި ފިލްމު ނެޓްފްލިކްސް އިން ބެލޭނެއެވެ.
