ބ. ތުޅާދޫ، ތ. ވިލުފުށި އަދި ށ. ބިލެތްފަހީގައި އެއާޕޯޓް އެޅުމަށް ބިން ހިއްކުމުގެ މަޝްރޫއު، ކެޕިޓަލް މެރިން އެންޑް ސިވިލް ކޮންސްޓްރަކްޝަށް ޕްރައިވެޓް ލިމިޓެޑް (ސީއެމްސީ) ހަވާލުކޮށް މަސައްކަތް ފެށި އިރުވެސް އެ ކުންފުންނަށް ދޭން ޖެހޭ އެޑްވާންސް ޕޭމަންޓް މިދިޔަ ސަރުކާރުން ހާވާލުކޮށްފައި ނުވާ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާޙަކަ ދައްކަވަމުން މިނިސްޓަރު ވިދާޅުވީ، ރަށްރަށުގައި ކުރިއަށްދާ މަޝްރޫއުތައް ބައްލަވާލެއްވުމަށް ކުރި ދަތުރުތަކުގައި ގިނަ އަދަދެއްގެ މަޝްރޫއުތައް މިދިޔަ ސަރުކާރުން ފަށައި ކޮންޓްރެކްޓްގައި ސޮއިކޮށްފައި ވީ ނަމަވެސް އެޑްވާންސް ޕޭމަންޓް ނުދައްކައި މަަސައްކަތް ހުއްޓާލާފައިވާ މައްސަލަތައް ފާހަގަވި ކަމަށެވެ.
އެގޮތުން މިސާލެއްގެ ގޮތުން ސިއެމްސީއަށް މިދިޔަ ސަރުކާރުން ހަވާލު ކުރި މަޝްރޫއަށް މިނިސްޓަރު އަލިއަޅުއްވާ ލެއްވިއެވެ. ތިން ރަށުގައި އެއާޕޯޓް އެޅުމުގެ މަސައްކަތަށް ބިން ހިއްކުމުގެ މަސައްކަތް ހިންގުމަށް ސީއެމްސީ ކުންފުންޏާ ހަވާލުކޮށް އެއްބަސްވުމުގައި ސޮއިކޮށްފައި ވީ ނަމަވެސް އެ ފަރާތަށް ދައްކަން ޖެހޭ އެޑްވާންސް ފައިސާ ދައްކާފައި ނުވާ ކަމަށް މުއްތަލިބް ވިދާޅުވިއެވެ.
އެޑްވާންސް ފައިސާ ނުދީ އޮތް ނަމަވެސް އެ ކުންފުނިން ވަނީ ދެ ތިން މުވައްޒަފުންނާއި އެކްސްކަވޭޓަރަކާއެކު އެރަށްރަށަށް އަރާ ބަންޑް ވޯލް މަސައްކަތް ފަށާފައި ކަމަށް މިނިސްޓަރު ވިދާޅުވިއެވެ. ބައެއް ރަށްރަށުގައި ބަންޑް ވޯލް ނިންމާފައިވާ ކަމަށާއި ނަމަވެސް އެޑްވާންސް ފައިސާ ހަވާލު ނުކުރާތީ އެ ކުންފުނިން މަސައްކަތް ހުއްޓާލާފައިވާ ކަމަށް މުއްތަލިބް ވިދާޅުވިއެވެ.
މި ސަރުކާރު ވެރިކަމާ ހަވާލުވި އިރު ވެސް އެ އެޑްވާންސް ޕޭމަންޓް ނުދައްކާ އޮތްކަން ފާހަގަ ކުރައްވަމުން މުއްތަލިބް ވިދާޅުވީ، އެ ޕްރޮޖެކްޓްތައް ކުރިއަށް ގެންގޮސްފައި ނުވަނީ އެ އެއްބަސްވުމުގައިވާ ގޮތުން ޑޮލަރުން ފައިސާ ދައްކަން ޖެހޭތީ އާއި ބަޖެޓުގައި އެ ފައިސާ ދެއްކުމަށް ހިމަނާފައި ނުވާތީއެވެ. ސީއެމްސީއަށް ހަވާލުކުރި ތިން ރަށެއްގެ އެއާޕޯޓް އެޅުމަށް ބިންހިއްކުމުގެ މަޝްރޫއުގެ އިތުރުން ވެސް މިދިޔަ ސަރުކާރުން ވަނީ އެތައް ޕްރޮޖެކްޓްތަކެއް ހަވާލުކޮށް ކޮންޓްރެކްޓް ހަދައި ނަމަވެސް އެޑްވާންސް ފައިސާ ނުދައްކާ ކަމަށް މިނިސްޓަރު ފާހަގަ ކުރެއްވިއެވެ.
މިދިޔަ ސަރުކާރުން ސީއެމްސީ ކުންފުންޏަށް ތުޅާދޫ އެއާޕޯޓަށް ބޭނުންވާ 44.70 ހެކްޓާ ބިން ހިއްކުމާއި، ވިލުފުށި އެއާޕޯޓަށް ބޭނުންވާ 56.34 ހެކްޓާ ބިން ހިއްކުން އަދި ބިލެތްފަހި އެއާޕޯޓަށް ބޭނުންވާ 56.34 ހެކްޓާ ބިން ހިއްކުމުގެ މަސައްކަތް ހަވާލުކޮށްފައި ވަނީ 2023 ވަނަ އަހަރުގެ ޖުލައި މަހުގެ ތެރޭގައެވެ. މި މަޝްރޫއު ހަވާލުކޮށްފައި ވަނީ 42.4 މިލިއަން ޑޮލަރަށް، 280 ދުވަހުގެ ތެރޭގައި ނިންމާ ގޮތަށެވެ.
މި ތިން ރަށުގެ ބިން ހިއްކުމުގެ މަސައްކަތް ސީދާ ގޮސްފައިވާ ހިސާބުއް މިއަދު މުއްތަލިބް ހާމަ ކުރައްވާފައެއް ނުވެއެވެ. ނަމަވެސް ވީހާވެސް ގިނަ މަޝްރޫއުތައް ހުއްޓާނުލާ ކުރިއަށް ގެންދިއުމަށް މަސައްކަތް ކުރާ ކަމަށާއި އެ މިނިސްޓްރީގައި ޕެންޑިން ބިލްތަކުގެ ގޮތުގައި 1.72 ބިލިއަން ރުފިޔާގެ ބިލްތައް ހުރުމުން ބަޖެޓުގައި ބޭނުންވާ ވަރަށް ފައިސާ ނެތުމުން ދަތިތަކާ ކުރިމަތިލާން ޖެހުނު ކަމަށް މުއްތަލިބް ވިދާޅުވިއެވެ. ބަޖެޓުގެ ތާށިކަމާއެކު ވެސް މި ދައުރުގައި 37 މަޝްރޫއެއް ނިންމާލެވިފައިވާ ކަމަށާއި ނޮވެމްބަރު 17 ވަނަ ދުވަހުގެ ނިޔަލަށް އިތުރު 21 މަޝްރޫއެއް ނިންމާލެވޭނެ ކަމަށް މިނިސްޓްރު ވިދާޅުވިއެވެ.
މި ތިން ރަށުގެ ބިން ހިއްކުމުގެ މަސައްކަތާ ގުޅިގެން 'ދަ ޕްރެސް' އިން މައުލޫމާތު ސާފު ކުރުމަށް އެ ރަށްރަށުގެ ޕްރޮޖެކްޓް އަޕްޑޭޓް ވަނީ ސާފު ކޮށްފައެވެ. އެ ގޮތުން ވިލުފުއްޓާއި ބިލެއްފަހި އަދި ތުޅާދޫ މި ތިން ރަށުގެ ބިން ހިއްކުމުގެ މަސައްކަތް ސީއެމްސީ ކުންފުންޏާ ހަވާލުކުރުމުން ވަނީ އެރަށަށް ގޮސް ބަންޑް ވޯލް ޖެހުމުގެ މަސައްކަތް ކޮށްފައެވެ. އަދި މި މަސައްކަތުގެ ތެރެއިން ކޮންމެ ވެސް ވަރަކަށް ފަޅުތެރެ ކޮނެފައި ވީ ނަމަވެސް ވެރިކަން ބަދަލުވުމާ އެކު އެ ކުންފުނިން ވަނީ މަސައްކަތް ހުއްޓާލައި ރަށުން ގޮސްފައެވެ. ރަށުގެ ފަޅުތެރެ ކޮންމެވެސް ވަރަކަށް ކޮނެފައި މަސައްކަތް ހުއްޓާލުމުން އެ މަސައްކަތް ކުރި ސަރަހައްދު ގިރުން ފަދަ ކަންކަން ދިމާ ވަމުން އަންނަ ކަމަށް އެ ރަށުގެ ރައްޔިތުން ބުނެއެވެ.
އެ ރަށްރަށުގެ ބިން ހިއްކުމުގެ މަސައްކަތް އޭގެ ފަހުން ކުރިއަށް ގެންގޮސްފައި ނުވި ނަމަވެސް މި ސަރުކާރު ވެރިކަމަށް އައުމަށްފަހު މި ތިން ރަށުގެ ތެރެއިން ބިލެއްފަހި އަދި ވިލުފުށީގައި އެއާޕޯޓް އެޅުމަށް ވަނީ އެމްޓީސީސީއާ ހަވާލު ކޮށްފައެވެ. ނަމަވެސް އެ މަޘްރޫއު ހަވާލު ކުރި ނަމަވެސް އަދި ވެސް އެއްވެސް އަމަލީ މަސައްކަތެއް ނުފަށާ ކަމަށް އެ ރަށުގެ ކައުންސިލުން މައުލޫމާތު ދެއެވެ.
ށ. ބިލެއްފަހީގައި އެއާޕޯޓު ތަރައްގީ ކުރުމުގެ މަޝްރޫގެ ދަށުން 1500 މީޓަރުގެ ރަންވޭއެއް ގާއިމުކުރުމާއެކު 4550 މީޓަރުގެ ޕެރިމީޓާ ފެންސެއްވެސް ގާއިމުކުރުމަށް ވަނީ ނިންމާފައެވެ. މި މަޝްރޫއަކީ 256.78 މިލިއަން ރުފިޔާއަށް އެމްޓީސީސީ އާ ހަވާލުކޮށްފައިވާ މަޝްރޫއެކެވެ.
ހަަމއެއާއެކު ތ. ވިލުފުށި އެއާޕޯޓު ތަރައްގީ ކުރުމުގެ މަޝްރޫގެ ދަށުން 1800 މީޓަރުގެ ރަންވޭއެއް ގާއިމުކުރުމާއެކު 5150 މީޓަރުގެ ޕެރިމީޓާ ފެންސެއްވެސް ގާއިމުކުރުމަށް ވަނީ ނިންމާފައެވެ. މި މަޝްރޫ އެމްޓީސީސީ އާ ހަވާލުކޮށްފައި ވަނީ 277.33 މިލިއަން ރުފިޔާއަށެވެ.
