ތިލަމާލެ ބްރިޖް މަޝްރޫއުގެ ދަށުން މާލެ އާއި ވިލިމާލެއާ ދެމެދު ހަދާ ބްރިޖުގެ ޖުމްލަ 45.82 ޕަސެންޓު މަސައްކަތް ނިމިފައިވާކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މުއްތަލިބު ވަނީ އެކި ބައިތަކަށް ބަހާލައިގެން މަސައްކަތް ނިމިފައިވާ މިންވަރު ހާމަކޮށްފައެވެ.
- ޕްރީކާސްޓް ސެގްމަންޓްސް - 43.5 ޕަސެންޓް
- ތަނބުތަކުގެ ޕައިލިން - 79.5 ޕަސެންޓް
- ޕިއާ ކޮމްޕްލެކްސް - 62.2 ޕަސެންޓް
- ޕައިލް ކެޕްގެ މަސައްކަތް - 67.8 ޕަސެންޓް
މި މަޝްރޫއުގެ މަސައްކަތާއި ގުޅޭ ގޮތުން މުއްތަލިބު ވިދާޅުވީ މަސައްކަތާއި ގުޅޭ ތަޖުރިބާ ނެތުމުން ކޮންޓްރެކްޓަރަށް ދަތިތަކާއި ކުރިމަތިވެގެން ދިއުމުގެ ސަބަބުން މަސައްކަތް ލަސްވެގެން ދިޔަ ކަމަށެވެ. މި ސަރުކާރުން ވެރިކަމާއި ހަވާލުވިއިރު ސަޕްލިމެންޓަރީ އެގްރިމެންޓުގައިވާ 30 މަސް ދުވަހަކީ ޕްރޮޖްކްޓް ނިންމަން އެކަށީގެންވާ މުއްދަތެއްކަމުގައި ގަބޫލުނުކުރައްވާކަމަށް ކުރިންވެސް ވިދާޅުވެފައިވާކަމަށް މުއްތަލިބު ވަނީ ފާހަގަކުރައްވާފައެވެ.
ތިލަމާލެ ބްރިޖް މަޝްރޫއުގެ މަސައްކަތް އެކި ސަބަބުތަކާއި ގުޅިގެން ބޭނުންވާ ސްޕީޑުގައި ކުރިއަށް ނުދާކަން ފާހަގަކޮށް މުއްތަލިބު ވިދާޅުވީ ޕީއެލްސީ ޕައިލިންގެ މަސައްކަތް ސަރުކާރުން އެންމެ ބޭނުންވާ ސްޕީޑުގައި ކުރިއަށް ނުދާކަމަށެވެ. މޫސުމަށް އަންނަ ބަދަލުތަކާ، ކަނޑުގަދަވުން ފަދަ ކަންތައް ދިމާވެގެން މަސައްކަތް ލަސްވެގެންދާކަމަށް ކޮންޓްރެކްޓަރު ބުނެފައިވާއިރު މުއްތަލިބު ވިދާޅުވީ މިއީ ސަބަބެއްކަމުގައި ދައްކައިގެން މަސައްކަތް ލަސްކޮށް، އިތުރު މުއްދަތެއް ހޯދުން، މިއީ ގަބޫލުކުރެވޭނެ ކަމެއް ނޫންކަމަށާއި މި ކަން އެއްބަސްވުމުގައިވެސް ފާހަގަކޮށްފައިވާކަމަށެވެ.މިކަމާއި ގުޅިގެން މަސައްކަތް ހަވާލުވި ފަރާތުގެ އިތުރުން އިންޑިއާ ސަރުކާރާއެކު ވެސް މަޝްވަރާތައް ކުރެވި، ބައެއް މުހިއްމު މަސައްކަތްތައް އަވަސްކޮށް ޝެޑިއުލްއާއި އެއްގޮތަށް ގެންދިއުމަށް މަސައްކަތްކުރަމުން އަންނަކަމަށް މުއްތަލިބު ވިދާޅުވިއެވެ.
ހަތަރު ސަރަހައްދެއް ގުޅުވާލާ، ޖުމްލަ 6.7 ކިލޯމީޓަރުގެ މިބްރިޖު ތަރައްގީކުރުމަށް 7 ބިލިއަނަށްވުރެ ގިނަ ދިވެހި ރުފިޔާ ހޭދަކުރުމަށްވަނީ ހަމަޖެހިފައެވެ.
