އިންޑިއާގެ ސަފީރުކަމަށް ފޮރިން މިނިސްޓްރީގެ އެޑިޝަނަލް ސެކްރެޓަރީ އައިޝަތު އަޒީމާ އައްޔަންކުރަން ރައްޔިތުންގެ މަޖިލީހުން މިއަދު ރުހުންދީފިއެވެ.
ޗައިނާގެ ސަފީރުކަން ވެސް ކުރެއްވި އަޒީމާ އިންޑިއާގެ ސަފީރުކަމަށް އައްޔަންކުރަން ރައްޔިތުންގެ މަޖިލިހުގެ ރުހުން ހޯދުމަށް ރައީސް ޑރ. މުހައްމަދު މުއިއްޒު ހުށަހެޅުއްވީ މި މަހުގެ 14 ވަނަ ދުވަހުގައެވެ. އަދި އެ ދުވަހު އޭނާގެ ނަން ދިރާސާކުރުމަށް ހާރިޖީ ގުޅުންތަކުގެ ކޮމިޓީއަށް ރިޔާސަތުން ފޮނުވިއެވެ.
އަޒީމާގެ ވަނަވަރަށް ބަލައި ކޮމިޓީން ނިންމީ އިންޓަވިއުކުރުމެއް ނެތި އޭނާ އެ މަގާމަށް އައްޔަންކުރަން ފެންނަ ކަމަށެވެ.
އަޒީމާ އަށް ރުހުން ދޭން ފެނޭތޯ ރިޔާސަތުން ވޯޓަށް އެހުމުން ވޯޓުގައި ބައިވެރިވި 79 މެންބަރުން ވެސް ވޯޓު ދެއްވީ އޭނާ އިންޑިއާ ސަފީރުކަމަށް އައްޔަންކުރަން ފެންނަ ކަމަށެވެ.
1988 ވަނަ އަހަރު ސަރުކާރަށް ހިދުމަތްކުރައްވަން ފެއްޓެވި އަޒީމާ ޗައިނާގެ ސަފީރުގެ ގޮތުގައި ހުންނެވީ އޮގަސްޓް 2019 އިން ފެށިގެން މިދިޔަ އަހަރުގެ ސެޕްޓެމްބަރު މަހުގެ ނިޔަލަށެވެ. މިހާރު އޭނާ މަސައްކަތްކުރައްވަނީ އިންޑިއާގައި، އިންޑިއާ ޑެސްކުގެ ހެޑުގެ ގޮތުގައެވެ.
ސަރުކާރުން އަޒީމާގެ ނަން ހުށަހެޅީ މިހާރުގެ ސަފީރު އިބްރާހީމް ޝަހީބުގެ ސަފީރުކަމުގެ ދައުރު ހަމަވާތީއެވެ.
ޝަހީބު އިންޑިއާގެ ސަފީރުކަމަށް އައްޔަންކުރީ ނޮވެމްބަރު 2022 ގައެވެ. އެކަމަކު އޭނާގެ ދައުރު ގުނަނީ ސިންގަޕޫރުގެ ސަފީރުކަމުގައި އޭނާ ހުންނެވި ދުވަސްތައް ވެސް ހިމަނައިގެންނެވެ.
