މިދިޔަ ސަރުކާރުން 60 ރަށެއްގައި ފުލުހުންގެ އިދާރާތައް އަޅަން ހަވާލުކުރި ކުންފުނިން އެ ސަރުކާރުގެ އިކޮނޮމިކް މިނިސްޓަރު ފައްޔާޒް އިސްމާއީލްގެ އާއިލީ މަސްލަހަތު އޮންނަ 'ބިގް' ކުންފުނީގެ ހިއްސާ ގަތުމަށް ފަހު މާލޭގައި ގެއެއް އިމާރާތް ކުރަމުންދާ ކަމަށް، ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެއެވެ.
މިދިޔަ މާޗް މަހު ނޫސްވެރިންނާ ބައްދަލުކުރައްވައި އިހުސާން އޭރު ވިދާޅުވީ ކުރީ ސަރުކާރުން ފުލުހުންގެ އިދާރާތައް އަޅަން ހަވާލުކުރި އިންޑިއާގެ ކުންފުންޏެއް ކަމަށްވާ އިންދިރާ ޕްރޮޖެކްޓްސް ކުންފުނި ވީ ތަނެއް، އެ ކުންފުންޏާ ވާހަކަ ދައްކަން ޖެހޭ މީހެއް އަދި ކުންފުނީގެ ފަރާތުން، ޕޮލިސް ސްޓޭޝަންތައް އަޅަން ކުރިއަށް ދާން ޖެހޭ ގޮތެއް ވެސް ހޯދިފައި ނުވާކަމަށެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އިނގުރައިދޫ ދާއިރާގެ މެންބަރު އަދި ޕީއެންސީގެ ޕާލިމެންޓްރީ ގްރޫޕުގެ ލީޑަރު އިބްރާހީމް ފަލާހު ކުރެއްވި ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ، ފުލުހުންގެ އިދާރާތައް އިމާރާތްކުރުމުގެ މަޝްރޫއު ފުރަތަމަ އައީ އިކޮނޮމިކް މިނިސްޓްރީ އަށް ކަމަށާއި، ދެ އަހަރުފަހުން 2021 ވަނަ އަހަރު އެ މަޝްރޫއު ރާވާފައިވަނީ ހޯމް މިނިސްޓްރީގެ ދަށުން ފުލުހުންގެ ހިދުމަތުން ކަމަށެވެ.
އަދި އިންޑިއާގެ އެގްޒިމް ބޭންކާ އެކު ކަމާ ގުޅޭ އެއްބަސްވުންތަކެއްގައި ސޮއިކުރެވި މި މަޝްރޫއު ފެށުމަށްޓަކައި މަސައްކަތްކޮށްފައި ވާކަން ލިޔެކިއުންތަކުން ދައްކާ ކަމަށާއި، ނަމަވެސް އަމަލީ އެއްވެސް މަސައްކަތެއް ނުހިނގާ ކަމަށް މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ، އެ ކުންފުނިން ކުރަނީ ކޮން ކަމެއްތޯ މިނިސްޓްރީން ބެލި ބެލުމުން ބިގް ކުންފުނީގެ ހިއްސާ ގަނެގެން ގ. މޫނިމާގެ އިމާރާތްކުރުމުގެ މަސައްކަތް ކުރަމުންދާކަން ފާހަގަކުރެވުނު ކަމަށެވެ.
ބިގް ކުންފުނިން 2016 ވަނަ އަހަރު ބީއެމްއެލުން ނަގާފައިވާ 34.3 މިލިއަން ރުފިޔާގެ ލޯނެއް ނުދެއްކިގެން ގ. މޫނިމާގެ ވިއްކާލުމަށް މީގެ ދެ އަހަރުކުރިން ސިވިލް ކޯޓުން ހުއްދަ ދީފައިވެއެވެ. ފާހަގަކުރެވޭ ގޮތުގައި 2018 ވަނަ އަހަރު ވަޒީރުކަމަށް ވަޑައިގަތުމަށްޓަކައި ފައްޔާޒް ވަނީ އެ ކުންފުނީގައި އޮންނަ އޭނާގެ ހިއްސާ ދޫކޮށްލައްވައިފައެވެ.
