ގެދޮރުވެރިޔާ ސްކީމްގެ ދަށުން ފްލެޓް ލިބޭ މީހުންގެ ލިސްޓް ނެރުން އަންނަ ނޮވެމްބަރު މަހަށް ފަސްކޮށްފިއެވެ.
ފްލެޓް ލިސްޓް ނެރުން ފަސްކޮށްފައި ވަނީ ފްލެޓް ލިސްޓް ރީ-އިވެލުއޭޓް ކުރުމަށް އިތުރު ވަގުތު ބޭނުންވާތީ ކަމަށް ހައުސިން މިނިސްޓްރީއިން ވަނީ ބުނެފައެވެ.
ހައުސިން މިނިސްޓްރީއިން ބުނީ ނޮވެމްބަރު 15، 2023ގައި އިއުލާނުކުރި ފްލެޓް ލިބޭ ފަރާތްތަކުގެ ދާއިމީ ލިސްޓްގައި ކޮރަޕްޝަނަށް މަގުފަހިވާ ކަންތައްތަކެއް ހުރިކަމަށް ތުހުމަތުކޮށް، އާންމު ފަރާތްތަކުން އެންޓި ކޮރަޕްޝަން ކޮމިޝަނަށް ހުށަހަޅާފައިވާ މައްސަލަ އާއި ގުޅިގެން، ރައީސް ޑރ. މުހައްމަދު މުއިއްޒުގެ ލަފާފުޅުގެ މަތިން އެކުލަވާލެވުނު "ހައުސިން އެޑްވައިސަރީ ކޮމިޓީ" އަދި މާލެ ސިޓީ ކައުންސިލުން އެކުލަވާލި "ހައުސިން ކޮންސަލްޓެޓިވް ކޮމެޓީ"އިން ވެސް "ގެދޮރުވެރިޔާ" ސްކީމްގެ ދާއިމީ ލިސްޓް އެކުލަވާލާފައިވާގޮތް ރަނގަޅު ނޫންކަމަށް ނިންމާފައިވާކަމަށެވެ.
"ހައުސިން އެޑްވައިސަރީ ކޮމިޓީ" އަދި "ހައުސިން ކޮންސަލްޓެޓިވް ކޮމެޓީ"ގެ މި ނިންމުމާއެކު ފްލެޓް ލިސްޓް ރީ-އިވެލުއޭޓް ކުރުމުގެ މަސައްކަތް ހައުސިން މިނިސްޓްރީއިން ފަށާފައިވާ ކަމަށް އެ މިނިސްޓްރީއިން ބުނެއެވެ.
ހައުސިން މިނިސްޓްރީއިން ބުނީ އެ މަސައްކަތް ފުރިހަމައަށް ނިންމުމަށް އިތުރު ވަގުތު ބޭނުންވާ ކަމަށާއި ނޮވެމްބަރު މަހުގެ 2 ވަނަ ހަފްތާގެ ނިޔަލަށް ވަގުތީ ލިސްޓް އާންމު ކުރުމަށް މަސައްކަތް ކުރަމުންދާ ކަމަށެވެ.
