އިލެކްޝަންސް ކޮމިޝަން (އީސީ) އާއި އެންޓި ކޮރަޕްޝަން ކޮމިޝަން (އޭސީސީ) ގެ ރައީސުންނާއި ނައިބު ރައީސުން ކަނޑައަޅައި އައްޔަން ކުރުމުގެ ބާރު ރައީސުލްޖުމްހޫރިއްޔާއަށް ލިބިދޭގޮތަށް ގާނޫނަށް ބަދަލު ގެނައުމަށް ސަރުކާރުގެ ފަރާތުން ރައްޔިތުންގެ މަޖިލީހަށް ބިލުތަކެއް ހުށަހަޅާފައި ވާތީ ދަ ޑިމޮކްރެޓްސް އިން ކަންބޮޑުވުން ފާޅުކޮށްފިއެވެ.
ދަ ޑިމޮކްރެޓްސް އިން ބުނީ އެއިރެއްގައި އޮންނަ ސަރުކާރަށް ނިސްބަތްވާ ފަރާތްތައް ވެސް ބައިވެރިވާ އާންމު އިންތިހާބުތައް ބާއްވާ ކޮމިޝަނާއި، ސަރުކާރަށް ވެސް އަމާޒުވާ ކޮރަޕްޝަނާއި ފަސާދައިގެ މައްސަލަތައް ބެލުމަށް އޮންނަ ކޮމިޝަނުގެ މިނިވަންކަމާއި މުސްތަގިއްލުކަން މުހިއްމުވެފައި ލާޒިމުވަނީ ސަރުކާރުގެ ނުފޫޒެއްގައި ނުޖެހި އެ މަސްއޫލިއްޔަތުތަކާއި ޒިންމާތައް އެ ކޮމިޝަންތަކުން އަދާކުރަންޖެހޭތީކަމަށެވެ. ނަމަވެސް ސަރުކާރުގެ ފަރާތުން ރައްޔިތުންގެ މަޖިލީހަށް މިހާރު ހުށަހަޅާފައިވާ ބިލުތަކުން ރައީސުލްޖުމްހޫރިއްޔާ އަށް އެ ދެ ކޮމިޝަނުގެ ރައީސުންނާ، ނައިބު ރައީސުން ކަނޑައަޅައި އައްޔަނުކުރާގޮތަށް ބަދަލުކުރުމަކީ އެ ކޮމިޝަންތަކުގެ މުސްތަގިއްލުކަމަށް ލޮޅުންއަރުވާލާނެ ފަދަ ކަމެއްކަމުގައި ދަ ޑިމޮކްރެޓްސް އިން ވަނީ ބުނެފައެވެ.
މީގެ އިތުރުން ދަ ޑިމޮކްރެޓްސްއިން ވަނީ ދިވެހި ރައްޔިތުންގެ އިންތިހާބީ އެންމެހައި ހައްގުތަކުގެ އިންސާފުވެރިކަމާ މިނިވަންކަން ކަށަވަރު ކުރުމުގެ ޒިންމާއަދާކުރަންޖެހޭ އިލެކްޝަންސް ކޮމިޝަނާއި، ރައްޔިތުންގެ މާލިއްޔަތާއި ދައުލަތް ހިންގުމުގެ ތެރޭގައި ހިންގާ ކޮރަޕްޝަނާ ފަސާދަ މިނިވަންކަމާއެކު ބަލާ ފިޔަވަޅު އެޅުމުގެ ޒިންމާއަދާކުރަންޖެހޭ އެންޓި-ކޮރަޕްޝަން ކޮމިޝަނުގެ މަސައްކަތުގެ ތެރެއަށް ރައީސުލްޖުމްހޫރިއްޔާ ވަދެވަޑައިގަތުމުގެ އަމަލެއްގެ ގޮތުގައި ސިފަކުރައްވާފައެވެ. އެހެންކަމުން މިކަމަކީ ހިންގުމުގެ ޑިމޮކްރެޓިކް އަސާސްތައްވެސް އަދި ގާނޫނުއަސާސީގެ ރޫހަށް ބަލާއިރު ވެސް ތަންދޭކަމެއް ނޫންކަމަށް ދަ ޑިމޮކްރެޓްސްއިން ވަނީ ބުނެފައެވެ.
އިލެކްޝަންސް ކޮމިޝަން (އީސީ) އާއި އެންޓި-ކޮރަޕްޝަން ކޮމިޝަން (އޭސީސީ) ގެ މުސްތަގިއްލުކަން ނަގާލުމުގެ އަމަލެއް ނުހިންގުމަށް ދަ ޑިމޮކްރެޓްސްއިން ވަނީ ސަރުކާރަށް ގޮވާލާފައެވެ.
