އައިލެންޑް އޭވިއޭޝަން ކުންފުނީގެ ކުރީގެ ޑެޕިއުޓީ މެނޭޖިން ޑިރެކްޓަރު އައިޝަތު ޖެނިފާ މަގާމުން ވަކިކުރީ ގާނޫނާ ހިލާފަށް ކަމަށް ކަނޑައަޅައި، އޭނާ އަށް ވަޒީފާ އަލުން ދީ، މާލީ ގެއްލުމުގެ ބަދަލު ދިނުމަށް ވަޒީފާ އާ ބެހޭ ޓްރައިބިއުނަލުން އަންގައިފިއެވެ.
އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރު ކަމަށް ޖެނިފާ އައްޔަންކުރީ ޑިސެމްބަރު 28، 2018 ގައެވެ. އޭނާ ވަކިކުރީ މިދިޔަ ޑިސެމްބަރު މަހު ފަހުކޮޅު ބޭއްވި ބޯޑު ބައްދަލުވުމަށް ފަހު މި އަހަރުގެ ޖެނުއަރީ މަހުގައެވެ.
އެހެންވެ، އޭނާ މަގާމުން ވަކިކުރީ ގަވައިދާ ހިލާފަށް ކަމަށް ކަނޑައެޅުމަށާއި ބަދަލު ނަގައިދިނުމަށް އެދި މިދިޔަ މާޗް މަހު ޖެނިފާ ޓްރައިބިއުނަލަށް ހުށަހެޅުއްވިއެވެ. އެގޮތުން ޖެނިފާ ވަކިކުރުމަށް އައިލެންޑް އޭވިއޭޝަންގެ ބޯޑުން ނިންމި ނިންމުން ބާތިލްކަމަށް ކަނޑައަޅައިދިނުމަށާއި، އޭނާ މަގާމުން ވަކިކުރަން އެންގުމާއި ވަޒީފާއިން ވަކިކުރި ޗިޓު ބާތިލްކަން ކަނޑައަޅައިދިނުމަށާއި، މައްސަލަ ނިމޭތާ ހަތް ދުވަހުގެ ތެރޭ އޭނާގެ ވަޒީފާ ރުޖޫއަކޮށްދިނުމަށް އެދި ހުށަހަޅުއްވާފައިވެއެވެ.
ހަމަ އެހެންމެ ވަޒީފާއިން ވަކިކުރި ތާރީހުން ފެށިގެން ޓްރައިބިއުނަލުން މައްސަލަ ނިންމަން ހޭދަވި މުއްދަތުގައި އޭނާ ވަޒީފާގައި ދެމިހުރެއްޖެ ނަމަ ލިބޭނެ މުސާރަ އާއި އިނާޔަތްތަކާއި ވަޒީފާގެ ކުރިއެރުންތަކާއި، ވަޒީފާ އިން ވަކިކުރުމުން ލިބުނު މާލީ ގެއްލުމުގެ ބަދަލުގައި ތިން މަހުގެ މުސާރަ ނަގައިދިނުމުގެ އިތުރުން، ޓްރައިބިއުނަލަށް މައްސަލަ ހުށަހެޅުމަށް ގާނޫނީ ވަކީލުން އައްޔަންކުރުމާއި މައްސަލަ ކުރިއަށް ގެންދަން ހޭދަވި ހަރަދު އައިލެންޑް އޭވިއޭޝަނުން ހަތް ދުވަހުގެ ތެރޭ އެއްފަހަރާ ދައްކައިދިނުމަށް ކަނޑައެޅުމަށް ވެސް އޭނާގެ ފަރާތުން އެދިފައިވެއެވެ.
ޓްރައިބިއުނަލަށް މައްސަލަ ހުށަހަޅުއްވަމުން ޖެނިފާ ވިދާޅުވީ، އޭނާ މަގާމުން މުސްކުޅިކުރުމަށް އައިލެންޑް އޭވިއޭޝަނުން ހުށަހެޅި ކަމަށާއި، ވަޒީފާއިން ވަކިކުރަން ކުންފުނީގެ ބޯޑުން ފާސްކުރީ އެކަމަށް އޭނާ ދެކޮޅު ހެދުމުން ކަމަށެވެ. ޖެނިފާ ވިދާޅުވި ގޮތުގައި ވަޒީފާއިން ވަކިކުރުމުގެ ގާނޫނުގައި ބަޔާންކޮށްފައިވާ ވަޒީފާއިން ވަކިކުރެވޭނެ އެއްވެސް ހާލަތެއް މެދުވެރިއެއް ނުވެއެވެ.
އެކަމަކު އައިލެންޑް އޭވިއޭޝަންގެ ފަރާތުން ބުނީ، ޑެޕިއުޓީ މެނޭޖިން ޑިރެކްޓަރުގެ މަގާމަކީ 2018 ވަނަ އަހަރުގެ ކުރިން އެ ކުންފުނީގެ އޮނިގަނޑުގައި ހިމެނޭ މަގާމެއް ނޫން ކަމަށާއި، ޖެނިފާ އެ މަގާމަށް އައްޔަންކުރީ އެ މަގާމު އުފެއްދުމަށް ފަހު ކަމަށެވެ.
މި މައްސަލައިގައި ޓްރައިބިއުނަލުން މި މަހުގެ 13 ވަނަ ދުވަހު ނިންމީ އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ޖެނިފާ ހުންނެވިއިރު އޭނާ އަށް މަހެއްގެ މައްޗަށް ލިބެމުންދިޔަ މުސާރަ ކަމަށްވާ 56،171 ރުފިޔާގެ ނިސްބަތުން އެއް މަހުގެ މުސާރަ ބަދަލުގެ ގޮތުގައި ދިނުމަށެވެ.
ޓްރައިބިއުނަލުން ވަނީ ޖެނިފާގެ ވަޒީފާ އަލުން ރުޖޫއަކޮށްދިނުމަށާއި، ޓްރައިބިއުނަލުން ނިންމުން ނިންމާތާ 30 ދުވަހުގެ ތެރޭ ހުރިހާ ކަމެއް ފުރިހަމަކޮށް ތިން ދުވަހުގެ ތެރޭ ޓްރައިބިއުނަލަށް އެންގުމަށެވެ.
