ގަން އިންޓަނޭޝަނަލް އެއާޕޯޓު ހިންގުމުގެ ހިއްސާ އޮންނަ ކާސާ ހޯލްޑިންސް އިން އައްޑޫގައި އިތުރަށް އެނދު ތަރައްގީ ކުރަން، ބޭނުން ވާކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެއެވެ.
އައްޑޫގެ ފަތުރުވެރިކަމަށް ހާއްސަ ބްރޭންޑާއި ވެބްސައިޓް ލޯންޗު ކުރުމަށް ރޭ ކެނެރީފްގައި ބޭއްވި ރަސްމިއްޔާތުގައި ފައިސަލް ވިދާޅުވީ، މިހާރު އައްޑޫގައި ހުރީ 1،100 އެނދުކަމަށެވެ. ކާސާ ހޯލްޑިންސް އައްޑޫގައި އެނދު އިތުރުކުރަން ބޭނުންވާ ކަން ހާމަކޮށް ފައިސަލް ވިދާޅުވީ އެ ކުންފުނިން ބޭނުންވަނީ ގަމުގައި 130 އެނދުގެ ޓޫރިސްޓު ހޮޓަލެއް އަޅަން ކަމަށެވެ. އަދި އެކަމަށް މަގުފަހިކުރަން ސަރުކާރުގެ ތެރެއިން ކުރަން ހުރި ކަންކަން ކުރަމުން އަންނަ ކަމަށް ފައިސަލް ވިދާޅުވިއެވެ.
މިވަގުތަށް އެންމެ މުހިންމީ ޓޫރިޒަމަށް ހުރި ފުރުސަތުތަކަށް ރައްޔިތުންނަށް ހޭލުންތެރިވެ، މިކަމުގައި ހުރި ފުރުސަތުތައް ޒުވާން ޖީލަށް ކިޔައިދިނުންކަން ފާހަގަކޮށް ފައިސަލް ވިދާޅުވީ އަންނަ އަހަރު ތެރޭގައި އެކަމަށް އައްޑޫގައި ޓޫރިޒަމް ސިމްޕޯޒިއަމެއް ބާއްވާނެ ކަމަށެވެ. އަދި އެ ސިމްޕޯޒިއަމްގައި ފުވައްމުލައް ސިޓީ އާއި ގއ. އަދި ގދ. އަތޮޅުގެ ފަތުރުވެރިކަމާ ގުޅުންހުރި ވިޔަފާރިތައް ބައިވެރިކުރާނެ ކަމަށާއި ހުރިހާ ފަރާތްތަކުން އެއްކޮށް މަސައްކަތް ކޮށްގެން ނޫނީ މި ސިނާއަތް ކުރިއެރުވެން ނެތް ކަމަށް ފައިސަލް ވިދާޅުވިއެވެ.
މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) އިން ކުރިއަށް ގެންދާ މި ސިމްޕޯޒިއަމްގައި ޗައިނާ އާއި އިންޑިއާގެ ޓުއާ އޮޕަރޭޓަރުންނާއި ބައެއް އެއާލައިންތަކާ އަދި ބުކިން.ކޮމް އާއި އަގޯޑާ ފަދަ އޭޖެންސީތައް ބައިވެރިކުރުމަށް މަސައްކަތް ކުރަމުން އަންނަ ކަމަށް ފައިސަލް ވިދާޅުވިއެވެ.
މީގެ އިތުރުން ފައިސަލް ވިދާޅުވީ މުސްތަގުބަލުގައި އެހެން އަތޮޅުތަކުގައި ވެސް މިފަދަ ސިމްޕޯޒިއަމްތައް ބާއްވާނެ ކަމަށެވެ. އަދި އަންނަ އަހަރުވެގެންދާނީ ދިވެހިރާއްޖެ ޕްރޮމޯޓް ކުރުމަށް ކުރެވޭނެ އެންމެ ވަރުގަދަ މަސައްކަތްތައް ކުރެވޭ އަހަރަށްކަން ފައިސަލް ފާހަގަކުރެއްވިއެވެ.
