ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު މުރައިދޫގޭގައި މަަސައްކަތްކުރާ މުވައްޒަފުންގެ ތަފްސީލު ހާމަކުރުމާ ގުޅޭ މައްސަލައިގައި، މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ބާއްވާ ބައްދަލުވުން ސިއްރުކޮށްފިއެވެ.
އެ ކޮމިޓީގެ މިއަދުގެ ބައްދަލުވުން ފަށްޓަވައި ކޮމިޓީގެ މުގައްރިރު އޭދަފުށި ދާއިރާގެ މެންބަރު އަހްމަދު ސަލީމް ވިދާޅުވީ، މުރައިދޫގޭގައި މަސައްކަތްކުރާ މުވައްޒަފުންގެ އަދަދާއި މުސާރައިގެ ތަފްސީލް ހޯދުމަށް އެކި ފަރާތްތަކުން ހުށަހަޅާފައިވާތީ އެ މައުލޫމާތު ހާމަކުރުމާ މެދު ގޮތެއް ނިންމުމަށް އެދި މަޖިލީހުގެ އިދާރާގެ ފަރާތުން ކޮމިޓީ އަށް ސިޓީއެއް ހުށަހަޅާފައިވާ ކަމަށެވެ.
ސަލީމް ވިދާޅުވީ، މަޖިލީހުގެ އިދާރާއިން މި މައްސަލައިގައި ފޮނުވި ސިޓީ އަށް ޖަވާބު ނުދެވި ލަސްވީ މަޖިލިސް ޗުއްޓީގައި އޮތުމުން ކަމަށެވެ.
އެއާއެކު، ކޮމިޓީގެ ބައްދަލުވުން ސިއްރުކުރަން ފެނޭތޯ ސަލީމް އެއްސެވުމުން، ކޮމިޓީގެ އިއްތިފާގުން ނިންމީ މިއަދުގެ ބައްދަލުވުން ސިއްރުކުރުމަށެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މުރައިދޫގެ އަށް ބަދަލުވެވަޑައިގަތީ މިދިޔަ ޖުލައި މަސް ނިމުނުކޮޅުގައެވެ. އަދި މުރައިދޫގޭގެ ޗީފް އޮފް ސްޓާފަކަށް ތަޖުރިބާކާރު ނޫސްވެރިޔާ އާދަމް ހަލީމް އައްޔަންކޮށް، ޑިރެކްޓަރު ޖެނެރަލް ކަމަށް މަޝްހޫރު ފުޓްބޯޅަ ކުޅުންތެރިޔާ އަލީ އަޝްފާގު ވަނީ އައްޔަންކޮށްފައެވެ.
މަޖިލީހުގެ ރައީސް ހުންނެވުމަށް މުރައިދޫގެ ހާއްސަކުރީ މެއި 6، 2021 ގައި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލައާ ގުޅިގެން ދައުލަތުގެ އިސްވެރިންގެ ސަލާމަތީ ކަންކަން ވަރުގަދަ ކުރުމަށް ގާނޫނަށް ގެނައި އިސްލާހާއެކުއެވެ. އެއަށް ފަހު އުއްތަމަ ފަނޑިޔާރަށް ވެސް ވަނީ ރަސްމީ ގެކޮޅެއް ހަމަޖައްސައިދީފައެވެ.
