ޗައިނާގެ ކުރީގެ ސަފީރު އައިޝަތު އަޒީމާ، އިންޑިއާގެ ސަފީރުގެ ގޮތުގައި ހަމަޖައްސަން ހުށަހަޅައިފިއެވެ.
ސަރުކާރުން އަޒީމާގެ ނަން ހުށަހެޅީ މިހާރުގެ ސަފީރު އިބްރާހީމް ޝަހީބުގެ ސަފީރުކަމުގެ ދައުރު ހަމަވާތީއެވެ.
ޝަހީބު އިންޑިއާގެ ސަފީރުކަމަށް އައްޔަންކުރީ ނޮވެމްބަރު 2022 ގައެވެ. އެކަމަކު އޭނާގެ ދައުރު ގުނަނީ ސިންގަޕޫރުގެ ސަފީރުކަމުގައި އޭނާ ހުންނެވި ދުވަސްތައް ވެސް ހިމަނައިގެންނެވެ.
ރިޔާސަތުން ވަނީ އަޒީމާގެ ނަން ދިރާސާކުރުމަށް ހާރިޖީ ގުޅުންތަކާ ބެހޭ ކޮމިޓީ އަށް ފޮނުވައިފައެވެ.
އަޒީމާ ޗައިނާގެ ސަފީރުގެ ގޮތުގައި ހުންނެވީ އޮގަސްޓް 2019 އިން ފެށިގެން މިދިޔަ އަހަރުގެ ސެޕްޓެމްބަރު މަހުގެ ނިޔަލަށެވެ. މިހާރު އޭނާ މަސައްކަތްކުރައްވަނީ އިންޑިއާގައި، އިންޑިއާ ޑެސްކުގެ ހެޑުގެ ގޮތުގައެވެ.
