މީދޫ ދާއިރާގެ ރައްޔިތުންގެ މަޖިލީހުގެ މެންބަރު އަދި މަޝްހޫރު ވިޔަފާރިވެރިޔާ އަހްމަދު ސިޔާމް މުހައްމަދާއި މިދިޔަ ބޮޑު އީދުގައި ބ. ކަމަދޫން މަޝްހޫރުކަން ހޯދި ނެށުންތެރިޔާ އައިމިނަތު ޒާރާގެ ކައިވެނި ކޮށްފިއެވެ.
އުމުރުން 55 އަހަރުގެ ސިޔާމް އާއި 23 އަހަރުގެ ޒާރާގެ ކައިވެނީގެ ހަފުލާ މިއަދު ހަވީރު ބޭއްވީ މާލެ އަތޮޅުގައި އޮންނަ ސިޔާމްގެ އޮޅުވެލި ރިސޯޓުގައެވެ. އެ ހަފުލާގައި ޒާރާގެ އާއިލާގެ ގިނަ ބަޔަކު ބައިވެރިވިއެވެ.
އެނގިފައިވާ ގޮތުގައި މި ކައިވެނީގެ ރަނެއްގެ ގޮތުގައި ޒާރާ ކިޔާފައި ވަނީ 2024 ރުފިޔާއަށެވެ. ނަމަވެސް ސިޔާމް އާއި ޒާރާ ކައިވެނި ކުރަން އުޅޭ ކަމަށް އިއުލާން ކުރި އިރު، ޒާރާ ރަންކިޔަން ހަމަޖެހިފައި އޮތީ ދެ ގެސްޓް ހައުސް އަށް ކަމަށް ބުނެ އަޑުތައް ވަނީ ފެތުރިފައެވެ.
އޮޅުވެލި ރިސޯޓުގައި މި ކައިވެނި ހަފްލާ މިއަދު ބާއްވާފައިވާ އިރު، ޒާރާ ލައިގެން ހުރީ ހުދުކުލައިގެ ވެޑިން ޑްރެސްއެކެވެ. އަދި ސިޔާމް ހުންނެވީ ހުދު ކުލައިގެ ސޫޓެއްގައެވެ.
އޮޅުވެލީގައި ކައިވެނި ޕާޓީ ބޭއްވި ކަމުގައި ވިޔަސް ކަމަދޫގައި ހާއްސަ ހަފްލާއެއް ބޭއްވުމަށް ވަނީ ހަމަޖެހިފައެވެ. ޒާރާ އާއި ޝިޔާމްގެ ކައިވެންޏަށް ކަމަދޫއަށް ވަނީ ޝިޔާމްގެ ތިން އަސް ވެސް ގެންގޮސްފައެވެ. އެނގިފައިވާ ގޮތުގައި މި އަސްތައް ކަމަދޫގައި ބާއްވާ ހަފްލާއިން ފެނިގެން ދާނެއެވެ.
މީގެ ދެ ދުވަސް ކުރިން މި ކައިވެނީގެ ރަން ކިއުމަށް ހާއްސަ ހަލްފާއެއް އޮޅުވެލި ރިސޯޓުގައި ބާއްވާފައިވާ އިރު، އެ ހަފްލާގައި ޒާރާ ލައިގެން ހުރީ ހުދު ކުލައިގެ ދިވެހި ލިބާހެކެވެ. ސަން ޝިޔާމް ވެސް ހުދު ކުލައިގެ ގަމީހަކާއި ފޭއްޔެއް ތުރުކުރައްވައިގެން ހުންނެވި އިރު، އެ ހަފްލާގައި ބައިވެރިވި އާއިލާގެ މެންބަރުންނާއި ރައްޓެހިން ވެސް ތިބީ ދިވެހި ސަގާފީ ހެދުމުގައިކަން ފާހަގަ ކޮށްލެވެއެވެ. ރަންކިއުމަށް ބޭއްވި ހަފްލާގައި ޒާރާ ވަނީ "ރާސްތާ އުޖާލާ މަންޒިލަށް" ނަމުގައި ހާއްސަ ލަވައެއް ކިޔައި ދީފައެވެ.
އެ ލަވައިގެ ވީޑިއޯތައް ވައިރަލް ވެފައިވާ އިރު، އެއް ބަޔަކު މި ކައިވެންޏަށް އަންނަނީ ވަރަށް ބޮޑަށް ފާޑު ކިޔަމުންނެވެ. ގިނަ ބައެއްގެ ފާޑިކިޔުން އަމާޒުވެފައި ވަނީ ދެމީހުންގެ އުމުރުގެ ތަފާތު ހުރުމުންނާއި، ރަށެއްގެ އާދައިގެ ދިރިއުޅެމުން އައި އަންހެނަކު މުއްސަނދި ވިޔަފާރި ވެރިއަކާ ކައިވެނި ކުރުމެވެ.
