ސްރީލަންކާ އަށް ދިމާވެފައިވާ މޫސުމީ ކާރިސާގެ ސަބަބުން އެ ގައުމަށް ކުރިމަތިވެފައިވާ ދަތި ހާލަތުން އަރައިގަތުމަށް އެހީތެރިވެ ދިނުމުގެ ގޮތުން، ސަން ސިޔާމް ގްރޫޕްގެ ފަރާތުން ދެ ލައްކަ ޑޮލަރު ހަދިޔާކުރަން ނިންމައިފިއެވެ.

އެ ފައިސާ ހަދިޔާކުރެއްވުމުގެ ގޮތުން ސަން ސިޔާމް ގްރޫޕުގެ ޗެއާމަން ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދު މިއަދު ވަނީ ސްރީ ލަންކާ ސަފީރު މުހައްމަދު ރިޒްވީ ހަސަންއާ ބައްދަލު ކުރައްވާ އެހީގެ ރަމްޒީ ޗެކް، ސަފީރަށް ހަވާލުކޮށްދެއްވާފައެވެ. އެގޮތުން މިއަދު ހަދިޔާ ކުރައްވާފައި ވަނީ ދެ ލައްކަ ޑޮލަރުގެ ތެރެއިން 75،000 ޑޮލަރެވެ. އަދި ކުރިއަށް އޮތް ދުވަސްތަކުގައި ބާކީ ބައި ހަވާލުކުރާނެ ކަމަށް ސަން ސިޔާމް ގުރޫޕުން މައުލޫމާތު ދެއެވެ.

އެ ބައްދަލު ކުރެއްވުމުގައި ސިޔާމް ވަނީ ލަންކާއަކީ އަވަށްޓެރި ގައުމުތަކުގެ ތެރެއިން ރާއްޖެއާ އެންމެ ގާތް ގުޅުމެއް އޮންނަ އެއް ގައުމުކަން ފާހަގަކޮށް ރާއްޖެއަށް ދިމާވެފައިވާ ކޮންމެ ކާރިސާއެއް ނުވަތަ ހާދިސާއެއްގައި އެންމެ އަވަހަށް އެހީވެދިން އެއް ގައުމަކީ ލަންކާ ކަމަށާއި އެ ކަމުން ރަމްޒުކޮށްދެނީ ރާއްޖެއާއި ލަންކާއާ ދެމެދު އޮތް ގާތް ގުޅުންކަމަށް ވެސް ވިދާޅުވެފައެވެ.

އަދި ސިޔާމް ވަނީ ލަންކާގެ ރައީސް އަނުރާ ކުމާރަ ޑިސެނަޔަކައަށް ގުޅުއްވައި ހިތްވަރު ދެއްވައި އެކުގައި ތިބިކަން ޔަގީންކޮށްދެއްވުމަށް ހާއްސަ ސިޓީއެއް ވެސް ފޮނުވާފައި ކަމަށް ވިދާޅުވެފައެވެ.

މީގެ އިތުރުން ވެސް ލަންކާގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމުގެ ގޮތުން ޕަބްލިކް ސާވިސް މީޑިއާ (ޕީއެސްއެމް)އިން އިސްނަގައިގެން ބާއްވާ ހާއްސަ ޓެެލެތޯނު "ސިލޯނާއެކު ދިވެހިން"އަށް ކްރައުން އެންޑް ޗަމްޕާ ރިސޯޓްސް އިން ވަނީ 10،001 ޑޮލަރު ހަދިޔާކޮށްފައެވެ.

ހެނދުނު 09:00 ގައި ޕީއެސްއެމްގެ ސްޓޫޑިއޯގައި އޮތް ހާއްސަ ރަސްމިއްޔާތަކުން ފެށި މި ޓެލެތޯން މިރޭ 1:00 އާ ހަމައަށް ކުރިއަށްދާނެއެވެ. މި ޓެލެތޯނުގައި މާލެ އާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ވެސް ވަނީ ބަހައްޓާފައެވެ. އެ ފަންޑު ފޮށިތައް ގުނަން ފަށާނީ މިރޭ ދަންވަރު 12 ޖެހުމުން ކަމުގައި ވިޔަސް މިރޭ 1 ޖެހުމާ ހަމައަށް ފައިސާ ޓްރާންސްފާ ކުރެވޭނެއެވެ.

"ސިލޯނާއެކު ދިވެހީން"ގެ ނަމުގައި ކުރިއަށް ގެންދާ ހާއްސަ ޓެލެތޯންގެ ތެރެއިން

ސްރީލަންކާއަށް އެހީވުމަށް ފައިސާ ޖަމާކުރާނީ ދިވެހި ރުފިޔާއިން ނަމަ 7730000796107 ނަންބަރު އެކައުންޓަށެވެ. އަދި ޑޮލަރުން ނަމަ 7730000796106 ނަންބަރު އެކައުންޓަށެވެ. ލަންކާއަށް އެހީވުމަށް ރާއްޖޭގައި ޓެލެތޯންއެއް މިއަދު ކުރިއަށް ގެންދާއިރު މިވަގުތާ ހަމައަށް ލިބުނު ފައިސާގެ އަދަދު ތިން މިލިއަނާ ގާތް ކުރެއެވެ.

ތޫފާން 'ދީތުވާ' ގެ އަސަރު ލަންކާއަށް ވަރަށް ބޮޑަށް ކުރަމުން އަންނައިރު، ތޫފާނުގެ ސަބަބުން ހިނގި އެތައް ހާދިސާއެއްގައި މަރުވި މީހުންގެ އަދަދު މިހާރުން ވަނީ 150 އަށް ވުރެ މައްޗަށް އަރައިފައެވެ. އަދި ބޯކޮށް ވާރޭވެހި ބިންގަނޑު ކަނޑައިގެން ދިއުމުގެ ސަބަބުން ހިނގި ހާދިސާތަކުގައި 176 މީހުން ވީނުވީއެއް ނޭގި ގެއްލިފައިވާ ކަމަށް ލަންކާގެ ޑިޒާސްޓާ މެނޭޖްމަންޓުން ބުނެއެވެ.