ރާއްޖޭގައި ފަރުމަސް އެކްސްޕޯޓުކުރާ ފަރާތްތަކަށް ކެޗް ސެޓުފިކެޓު ދޫކުރަން ނިންމާފައިވާކަމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން ބުނެފިއެވެ.
ފިޝަރީސް މިނިސްޓްރީން ބުނީ މި ސެޓްފިކެޓު ދޫކުރަނީ ގާނޫނާ ހިލާފަށް ރިޕޯޓުކުރުމެއް، އަދި ބެލެހެއްޓުމެއް ނެތި ކުރާ (އިލީގަލް، އަންރެގިއުލޭޓަޑް އެންޑް އަންރިޕޯޓެޑް - އައިޔޫޔޫ) މަސްވެރިކަން ހުއްޓުވުމަށް ކަމަށެވެ. އަދި މިއީ ރާއްޖޭގައި ކުރާ މަހުގެ ވިޔަފާރިއާއި، މަހުގެ އުފެއްދުންތައް ހަރުދަނާ ނިޒާމެއްގެ ތެރެއިން ބެލެހެއްޓިގެން ތައްޔާރުކޮށްފައިވާ އުފެއްދުމެއްކަން ކަށަވަރުކޮށްދޭނެ ސެޓުފިކެޓެއްކަމަށް އެ މިނިސްޓްރީން ވަނީ ބުނެފައެވެ.
މި ނިޒާމުގެ ތެރެއިން އެކްސްޕޯޓުކުރާ ކޮންމެ ފަރުމަހުގެ ޝިޕްމަންތަކާއެކު މި ސެޓުފިކެޓު އޮތުން ލާޒިމުވާނެކަމަށް އެ މިނިސްޓްރީން ވަނީ ބުނެފައެވެ.
ކެޗް ސެޓުފިކެޓު ދޫކުރުމުގެ ނިޒާމު މެދުވެރިކޮށް އެކްސްޕޯޓުކުރާ ފަރުމަހުގެ ބާވަތްތައް ބާނައިފައިވާ އުޅަނދުގެ މައުލޫމާތާއި، މަސް ބޭނި ތާރީހު އަދި މަސް ޕްރޮސެސްކުރި ފަރާތުގެ މައުލޫމާތު އެއްކުރެވޭނެއެވެ. މި މައުލޫމާތުގެ އަލީގައި މަސް ބޭނީއްސުރެ މަހާއި މަހުގެ އުފެއްދުންތައް ގަންނަ ފަރާތްތަކަށް ފޯރުކޮށްދެވެންދެން އެއުފެއްދުންތައް ކަޑައްތުކޮށްފައިވާ އެންމެހައި މަރުޙަލާތައް، ދެނެގަތުމަށް މަގުފަހިވެގެންދާނެއެވެ.
ފަރުމަހުގެ ބާވަތްތަކަށް އޮތް އެކްސްޕޯޓު މާކެޓް ފުޅާވަމުން އައި ނަމަވެސް މިބާވަތްތައް އަދިވެސް ބޮޑަށް ވިއްކަމުންދަނީ ރިސޯޓުތަކަށާއި ރާއްޖޭގެ ލޯކަލް މާރުކޭޓުތަކަށެވެ.
