ރައްޔިތުންގެ މަޖިލީހުގެ މި އަހަރުގެ ފަހު ދައުރުގެ ޖަލްސާތައް ފެށޭ ތާރީހު ފަސްކޮށްފިއެވެ.
މަޖިލީހުގެ މި އަހަރުގެ ފަހު ދައުރުގެ ފަހު ޖަލްސާތައް މާދަމާ ފަށާނެ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މީގެ ކުރިން އިއުލާނު ކުރައްވާފައި ވެއެވެ.
ނަމަވެސް ރައްޔިތުންގެ މަޖިލީހުގެ އިދާރާއިން މެންބަރުންނަށް ފޮނުވި މެސެޖެއްގައި ބުނީ، މަޖިލީހުގެ ޖަލްސާތައް ބްރޯޑްކާސްޓްކުރުމަށް އާ ވީޑިއޯ ރޫމެއް ގާއިމްކުރުމުގެ މަސައްކަތްތައް ކުރިއަށް ދާތީ، ޖަލްސާތައް ދުރަށް ދެއްކުމުގައި ދަތިތައް ހުރުމުން އަންނަ ހޯމަ ދުވަހު ޖަލްސާތައް ފެށޭނެ ކަމަށް ދަންނަވަން މަޖިލީހުގެ ރައީސް އަންގަވާފައިވާ ކަމަށެވެ.
ރައްޔިތުންގެ މަޖިލީހުގެ މި އަހަރުގެ ދެވަނަ ދައުރު ނިންމާލައި މެންބަރުން ޗުއްޓީއަށް ދިޔައީ މިދިޔަ އޮގަސްޓް މަހުގެ 22 ގައެވެ. އޭގެ ފަހުން ދައުރުން ބޭރުން ޖަލްސާ ބާއްވައި ޕްރޮސެކިއުޓަރު ޖެނެރަލް ކަމަށް އައްބާސް ޝަރީފް އައްޔަންކުރަން ފެންނަ ކަމަށް ރުހުން ދިނެވެ.
