އިންތިޒާރުގައި މާގިނަ އިރަކު ހުންނާކަށް ނުޖެހުނެވެ. އަޒީމްގެ ސައިކަަލް އައިސް މަންޝާމެންގޭ ދޮރު ކުރިމަތީ ޒޯނަށް މަޑުކޮށްލިއެވެ. އަޒީމް ގެއަށް ވަންނަންދެން އެ ދިމާލަށް ބަލަން ހުރެވުނެވެ. އަދި އަޒީމް ދޮރުން އެތެރެއަށް ވަނުމުން މަންޝާ ކޮޓަރި ތެރެއަށް ވަނުމަށް އެނބުރިލީ ވަގުތު މާ ވަރަކަށް މީހަކު ބަލާހެން ހީވެގެން ފަސް އެނބުރި ބެލްކަނިން ބޭރަށް ބަލާލެވުނެވެ. މަންޝާއަށް ލިބުނު ސިހުމާ އެކު ހިތްގަނޑު ބޭރަށް ނުނިކުތީ ހަމަ ކިރިއާއެވެ. މަގުގެ އެއްފަރާތެއްގައި ހުއްޓިގެން މަންޝާއާ ދިމާލަށް ބަލަން މިހުރީ ދެވަނަ އެހެން މީހެއް ނޫނެވެ. އެއީ ޒިބާނެވެ.
ކަޅިޖަހާ ނުލާ ޒިބާނާ ދިމާލަށް ބަލަން މަންޝާއަށް ހުރެވުނެވެ. ހަފްތާއެއް ފަހުން ޒިބާން ފެނުމުން މަންޝާއަށް ވަރަށް ބޮޑު ހިތްހަމަޖެހުމެއް ލިބުނެވެ. ބުނެދޭން ނޭނގޭ ކަހަލަ އިހްސާސެއް ކުރިއެވެ. ޒިބާން އަތް ހަނާ އަޅާލުމުން އުފަލުން މަންޝާއަށް ތެޅިގަނެވުނެވެ. މަންޝާއަށް ކުރަމުން ދިޔައީ އާދަޔާ ޚިލާފް އިހްސާސްތަކެކެވެ. ކަންތައްވީ މަންޝާ ހީކުރިގޮތާ މުޅިން ޚިލާފަށެވެ. މަންޝާ ހީކުރީ ދެން ޒިބާން މަންޝާއާ ބައްދަލުކުރަން މަސައްކަތް ނުކުރާނެ ކަމަށެވެ. މަންޝާ ވެސް އަތް ހަނާ އަޅަން އަތް އުފުލާލިއެވެ. ލަދުރަކި ހިނިތުންވުމަކާ އެކީގައެވެ.
ނަމަވެސް ހަމައެވަގުތު މަންޝާއަށް ސިހުމެއް ލިބުނީ މަންޝާގެ ކޮނޑުގައި މީހަކު ހިފާލުމުންނެވެ. ސިހިފައި ފަހަތަށް ބަލާލެވުނީ އެއީ ކާކުބާއޭ ހިތަށް އެރުމުންނެވެ. ފަހަތުގައި ހުރީ އަޒީމެވެ. ދެލޯ ބޮޑުކޮށްގެން ހުރި މަންޝާގެ އަތަށް އަޒީމް ދޯނިން ނެގި ޓިކެޓް ދިއްކޮށްލިއެވެ. އެހިސާބުން އަޒީމް އައިކަން އެނގިގެން ކޮޓަރިއަށް ވަންނަން އުޅުނު މަތިން މަންޝާ ހަނދާންވިއެވެ. އެވީ ކުޑަ ވަގުތުކޮޅު ތެރޭގައި މަންޝާ ކުރަން އުޅުނު ކަންތައް ޒިބާން ފެނުމުން ހަނދާނުން ކައްސާލީ ހެއްޔެވެ. މަންޝާ ޓިކެޓްގައި ހިފިގޮތަށް އެކަމާ ވިސްނަން މަޑުކޮށްލެވުނެވެ.
އަޒީމް ބެލްކަނިން ބޭރަށް ބަލާލިއެވެ. ޖެހިލުންވެހުރެ މަންޝާވެސް ބޭރު ބަލާލިއެވެ. ޒިބާން ހުރި ދިމާލަށް ބަލާލީ މޭގައި އެއް އަތް އަޅައިގެން ހުރެއެވެ.
ހިތްހަމަޖެހުމުގެ ނޭވާއެއް މަންޝާ ދޫކޮށްލިއެވެ. ޒިބާން އެހިސާބުގައި ނެތުމުންނެވެ. އަޒީމް ބެލްކަންޏަށް ނިކުތް ތަން ފެނުމުން އޭނާ ދިޔައީއެވެ. އަޒީމްގެ އަތުގައި ހިފަމުން މަންޝާ ވާހަކަ ދެއްކިއެވެ. "ހެއި... އަހަރެން ބޭނުން ބާޒާރަށް ޖައްސާލަން... ފުރަން ވާއިރަށް ބައެއް ސާމާނު ގަނެލަން ބޭނުން... މަންމަމެންނަށް ހަދިޔާ ކޮޅެއްވެސް ގެންދަން ވާނެއްނު..."
މަންޝާގެ ބޮލުން ތިރިއަށް އަޒީމް ބަލާލީ އޭނާ ރީތިވެގެން ހުރިކަން ފާހަގަ ވުމުންނެވެ. "އެހެންވެދޯ ނަލަހެދިލައިގެން ތިހުރީ.... އާން މިހާރު ފިހާރަ ހުޅުވަން އުޅޭނީ... ހިނގާ ދަަމާ... ވަރަށް ދުވަސް ވެއްޖެއްނު ގާޑިޔާ ކައިރިއަށް ނުދެވޭތާ ވެސް... ކުރުނބަލެއް ބޯލައިގެން ދޯ ދާނީ...." ފާޚާނާއަށް ވަދެ މޫނު ދޮވެލައިގެން އަޒީމް ނިކުތެވެ. މަންޝާ ހުރީ ބެލްކަނީގައި މަގުގެ ދެފަރާތަށް ބަލާލަ ބަލާލައެވެ. އަދި އެއްފަހަރު ޒިބާން ފެންނާނެ ނަމައޭ ހިތް އެދެމުން ދިޔައެވެ.
އަޒީމް ފާޚާނާއިން ނިކުމެ ގަމީހަކާއި ޖީންސެއް އަލަމާރިން ނެގިއެވެ. އަދި ލައިގެން ހުރި ހެދުން ބަދަލުކޮށްލުމަށްފަހު ރީތިވާ މޭޒުދޮށަށް ޖެހިލީ ބޮލުގައި ފުނާއަޅާ ރީތިވާށެވެ. ސެންޓު ފުޅިން ގަޔަށް ސެންޓުކޮޅެއް ބުރުވާލުމަށްފަހު ބެލްކަނިން ބޭރު ބަލަންހުރި މަންޝާއަށް ގޮވާލީ އަވަހަށް ދާން ނިކުތުމަށެވެ. ކޮޓަރިއަށް ވަދެ ލޯގަނޑުން ފަރި ބަލާލުމަށްފަހު އަޒީމްގެ ފަހަތުން މަންޝާ ނިކުތެވެ.
ސައިކަލާ ހަމަޔަށް ދިޔުމަށްފަހު އަޒީމް ވާހަކަ ދައްކަން ފެއްޓީ ޒޯނުން ސައިކަލު ނެރެމުންނެވެ. "އެއާޕޯޓުގަ އުޅޭނެ ވަރަށް ގާތް ފްރެންޑެއް... ރިޒްވީ ކިޔާނީ.... އޭނަ މިހާރު ހުޅުމާލޭގައި ގެސްޓްހައުސެއް ހެދުމުގެ ކަންތަކުގަ އެ އުޅެނީ... އޭނަ ބުނި މާދަމާ ހަވީރުން އެކޮޅަށް ދާން..... އިންޓީރިއާ މަސައްކަތްތަކެއްގަޔޯ..."
"އެހެންތަ.... ސަޅިއެއްނު.... ހުޅުމާލޭގަ މިހާރު ވަރަށް ގެސްޓް ހައުސްތައް އޮވޭދޯ... ވަރަށް ދުވަސް ވެއްޖެ ހުޅުމާލެއަށް ނުދެވޭތާ ވެސް...." ސައިކަލު ފަހަތަށް އަރަމުން މަންޝާ ވާހަކަ ދެއްކިއެވެ.
"މާދަަން ހެނދުނު އަހަރެން ޑިއުޓީއަށް ދާއިރު މަސައްކަތް ކުރަން ސޯޓަކާ ޓިޝާޓަކާ ހިފައިގެން ދާނީ... މެންދުރު ފަހުން ޑިއުޓީ ނިންމާފަ ބަހުގަ ހުޅުލެއިން ހުޅުމާލެއަށް ދާނީ... ދެން މިކޮޅަށް އަންނާނީ މަސައްކަތް ނިންމާފަ...." ވާހަކަ މެދުކަނޑާލަމުން އަޒީމް ސައިކަލުގެ ބުރަކި ޖައްސާލިއެވެ. މަންޝާ ދެލޯ ބޮޑުކޮށްލަމުން ކުރިމައްޗަށް ބަލާލީ ކުއްލިއަކަށް ބުރަކި ޖެއްސުމުންނެވެ. ސައިކަލު ކުރިމައްޗަށް އެރީ ބުޅަލެކެވެ. ކެހިރި ބޯ މުށި ކުލައިގެ ބޮޑު ބުޅަލެކެވެ. އެ ސޮރު ސައިކަލު ދަށު ނުވީ ހަމަ ކިރިޔާއެވެ. ސައިކަލުގެ ކުރި ހުރަސްކޮށް ބުޅާ އެއްފަރާތަށް ދިޔުމުން އަޒީމް މަޑުމަޑުން ސައިކަލު ދުއްވާލިއެވެ.
"ކިރިޔާ އެ ބުޅާ މަރުނުވީ... އަޒީމް ތަންކޮޅެއް ބަލައިގެން ދުއްވަބަލަ..." މަންޝާ ހުރީ ވަަރަށް ބިރުންނެވެ.
"ނޭނގެ އައި ނައި ދިމާލެއް... ފެނުނީ ކުރިމަތީ ހުއްޓާ..." ކުއްލިއަކަށް ކުރިމަތިން ފެނުނު ބުޅާ އެތަަނަށް އައިގޮތް ނޭނގުމުން އަޒީމް ވެސް އެކަމާ ވިސްނާލިއެވެ.
"ވެދާނެ ވާހަކައިގައި ހުރީމަ ބުޅާ ކުރިމައްޗަށް އައި ގޮތް ނޭނގުނީ ކަމަށް..." މަންޝާ ބުނި ވާހަކައަށް އަޒީމް ވެސް އެއްބަސް ވިއެވެ.
ބޮޑުތަކުރުފާނު މަގަށް ސައިކަލުން ނިކުތީ އަޒީމްމެން އާންމު ގޮތެއްގައި ދުއްވާލަން ނިކުމެ ކުރުނބާ ބޯން ދާ ގާޑިޔާ ކައިރިއަށެވެ. ގާޑިޔާ ކުރިމައްޗަށް ސައިކަލު މަޑުކޮށްލަމުން އަޒީމް ވާހަކަ ދެއްކީ ގާޑިޔާގެ ސޭޓު މީހާއާއެވެ. "މި އިހަލުން ދެ ކުރުނބާ ހަދައިދީ ބަލަ...."
*** *** *** *** *** ***
ފަތިސް ނަމާދުން ފައިބައިގެން ރިޔާޒް ދިޔައީ ހޮސްޕިޓަލަށެވެ. އައިސީޔޫ ކައިރީ ހުރި ގޮނޑީބަރީގައި ނިދިގެން ލައްޖެހިފައިވާ ޟިރާރު ފެނުމުން ރިޔާޒް ގޮސް ގޮވާލިއެވެ. ދެލޯ ބޮޑުކޮށް ހުޅުވާލަމުން ޟިރާރު ތެޅިގަތީ ކަމެއް ގޯސްވެގެން ގޮވީ ކަމަށް ހީކޮށެވެ.
"ބައްޕާ... ދޭ އަވަހަށް ނަމާދަށް... އަހަރެން މި އައީ ފަތިސް ކޮށްގެން..." ނަމާދަށް ދިއުމަށް ޟިރާރު ގާތު އެދުމުން ޟިރާރު އަވަހަށް ތެދުވިއެވެ. ޟިރާރު ނަމާދުކުރަން ދިޔައީ ހޮސްޕިޓަލުގައި ހުންނަ މިސްކިތަށެވެ. އެހެންކަމުން މާ ގިނަ އިރެއްނުވެ ޟިރާރު ނަމާދުކޮށްގެން ރިޔާޒު ކައިރިއަށް އައެވެ.
"ބަައްޕާ.... ގެއަށް ދާންވީނުން... ސައިބޮއެގެން އަރާމުކޮށްލަން...." ރިޔާޒްގެ ބައްޕަ އުޅޭ ގޮތް ފެނުމުން ރިޔާޒަށް ވަރަށް އަސަރު ކުރެއެވެ. ޟިރާރު ދެއަަތަށް ބޯ ހޫރާލަމުން އެނާ ހޮސްޕިޓަލުގައި މަޑުކުރަން ބޭނުންވާ ކަމަށް ބުންޏެވެ.
"އެހެންވީ އިރު ހިނގާ ސައިބޮއެގެން އަަންނަން...." ރިޔާޒް ގެއަށް ދިއުމުގެ ކުރިން ބައްޕައަށް ސައި ދީފަ ދާން ވިސްނިއެވެ.
"އޭރުންނޯ... މިތާ އެކަކު ވެސް ނެތީމަ ކަމަކު ނުދާނެ...." ޟީރާރު ހުރީ ދާގޮތަކަށް ނޫނެވެ.
ރިޔާޒް އައިސީޔޫ ކައިރިއަށް ގޮސް އެތާ ބޭރުގައިވާ ރަނގަބީލް ސްވިޗަށް ފިތާލިއެވެ. ކުޑަ އިރުކޮޅެއްގެ ތެރޭގައި އެތެރެއިން ނަރުސް ކުއްޖެއް ނިކުތެވެ. ރިޔާޒް އޭނާގެ ފޯނު ނަންބަރު ނަރުސް ކުއްޖާއަށް ހަވާލުކުރަމުން މަންމަގެ އެހީތެރިޔާ ބޭނުންވެއްޖެ ހާލަތެއްގައި ރިޔާޒަށް ގުޅުމަށް އެދުނެވެ. އަދި މިވަގުތު ހޮސްޕިޓަލުގައި އެއްވެސް އެހީތެރިޔެއް ނެތް ކަމާއި ގުޅާލުމުން ވަރަށް އަވަހަށް އައިސްދޭނެ ކަމަށް ބުނުމުން ނަރުސް ކުއްޖާ އެކަމަށް އެއްބަސްވިއެވެ.
"ބައްޕާ ދެން ހިނގާ ދާން... ނަރުސްކުދިން ކަމަކު ބޭނުން ވެއްޖިއްޔާ ގުޅާނެ... އަހަރެމެން މާ ދުރަކަށް ނުދާނަމޭ... މިތާ ކެންޓީނަށް ދާނި..." ރިޔާޒްގެ ވާހަކަ ހުރި ގޮތުން ސައި ނުބޮއި ސަލާމަތް ނުވެވޭނެ ކަން އެނގުމުން ޟިރާރު ދާން އެއްބަސްވިއެވެ.
*** *** *** *** *** ***
"މަންޝާ.... ތެދުވެބަލަ.... އަހަރެން މިއުޅެނީ މަސައްކަތް ކުރަންލާ ޝޯޓު ނުފެނިގެން..." ގަދައަށް ނިދާފަ އޮތް މަންޝާއަށް އުނދަގޫ ނުކުރަން އަޒީމް ހުރި ކަމުގައި ވީނަމަވެސް އަޒީމްގެ ޝޯޓު ބުރި ނުފެނުމުން މަންޝާއަށް ގޮވަން މަޖުބޫރު ވިއެވެ. ދެލޯ އުނގުޅަަމުން މަންޝާ ތެދުވެގެން އައިސް އަލަމާރި ހާވަން ފެށިއެވެ.
ޝޯޓުބުރި ދިއްކޮށްލުމުން އަޒީމް އަތުގައި އޮތް ދަަބަސް ތެރެއަށް އެ ޝޯޓުބުރި ލިއެވެ. "އަޒީމް... ކޮފީއެއް ހަދައިދެންތަ؟..." އަވަސް އަރުވާލާފަ ހުރި އަޒީމް ފެނުމުން މަންޝާ އަހާލިއެވެ.
"އާން.. އެކަމަކު ވަރަށް އަވަސް ކުރާތި އެހެން ނޫނީ އަހަރެން ގަޑި ޖެހޭނެ...." އަޒީމް ޔުނީފޯމް ލައިގެން ބެގީ ކުރަމުން ވާހަކަ ދެއްކިއެވެ. މަންޝާ އަަވަސް ވެގަތީ ބަދިގެއަށެވެ. އަޒީމަށް ބޮވޭ ވަރަށް ހޫނު ކޮފީތައްޓެއް ހަދައިދިނެވެ. ބޭރަށް ނުކުމެ ބޫޓަށް އެރުމަށްފަހު އަޒީމް ކޮފީތަށި އެއް ނޭވާއިން ދަމާލިއެވެ. އަދި ފެން ކޯވަރެއް ބޯލުމަށްފަހު މަންޝާގެ ގައިގާ ބައްދާލުމަށްފަހު ނިތްކުރިއަށް ބޮސްދިނެވެ.
"ދަނީ އިނގޭ.... މިއަދު މެންދުރު ނާދެވޭނެ... ހުޅުމާލެއަށް ދާން ޖެހޭ.... އިނގޭ..." އަޒީމްގެ ޖުމްލަ ނިމުމުން މަންޝާ ބޯ ޖަހާލިއެވެ. އަޒީމް އަތަށް މޭޒުމަތީ އޮތް ސައިކަލު ތަޅުދަނޑި މަންޝާ ދިނެވެ. ދަބަސް ކޮނޑުގައި އަޅުވައިގެން އަޒީމް އަވަހަށް ގެއިން ނިކުމެގެން ދިޔައީ ތެޅެމުން ފޮޅެމުންނެވެ. އަޒީމް ދިއުމުން މަންޝާ ދޮރު ތަޅުލުމަށްފަހު އެނދަށް އަރާ އޮށޯވެ ނިދީއެވެ.
*** *** *** *** *** ***
ޟިރާރަށް ސައި ދިނުމަށްފަހު ރިޔާޒް ގެއަށް ދާން ހޮސްޕިޓަލުން ނިކުތީ ހެނދުނު ދިހަ ގަޑި ބައި ވީފަހުންނެވެ. ރިޔާޒް އައިސް ގެއަށް ވަތްއިރު ގޭތެރޭގައި އެއްވެސް އަލިކަމެއް ނެތެވެ. ހުރިހާ ދޮރުތަކެއް ހުރީ ލައްޕާ ފައެވެ. ރިޔާޒް މަޑުމަޑުން ވަދެ ކޮޓަރި ދޮރު ހުޅުވާ އެތެރެއަށް ބޯ ދިއްކޮށްލިއެވެ. ރިޔާޒް ދިޔައީ ތަރި ބުރައިގެންނެވެ. އަދިވެސް މީރާ އޮތީ ނިދާފައެވެ.
އެހެންޏާ ހެނދުނު ހެނދުނާ ހޭލާ މީރާ އަދިވެސް ނިދާފައި އޮތުމުން ރިޔާޒް ހިތުގައި ސުވާލުތަކެއް އުފެދުނެވެ. ނަމަވެސް މީރާގެ މޫނުމަތިން ފެންނަމުން ދިޔަ މައުސޫމް ކަން ފެނުމުން މީރާއަށް ނުގޮވާ ރިޔާޒް ބެލްކަންޏަށް ނިކުތީ ސިނގިރޭޓެއް ބޯށެވެ.
ރިޔާޒް ސިނގިރޭޓް ރޯ ކޮށްލުމަށްފަހު ބެލްކަނީގައިވާ ގޮނޑީގައި ހަމަޖެހިލައިގެން އިށީނެވެ. ސިނގިރޭޓުގެ ދުންތައް އެތެރެއަށް ދަމަމުން ދިޔަ އިރު ރިޔާޒް ވިސްނަަމުން ދިޔައީ އޭނާގެ މަންމައާ މެދުގައެވެ. ގަވާއިދުން އައިސީޔޫއަށް އަލިބެ ވައްދައިގެން ކިޔަވަމުން ދާތީ މަންމައަށް ކޮންމެވެސް ލުޔެއް ލިބެމުންދާކަން އެނގެއެވެ. މީހާރު އާމިނަ ވަނީ ހޭއަަރާފައެވެ. ނަަމަވެސް އޭނާ ވަނީ އަދިވެސް މެޝިންތަކާ ގުޅާފައެވެ.
ފުން ޚިޔާލެއްގެ ތެރެއަށް ގެއްލިފައި އިން ރިޔާޒަށް ސިހުމެއް ލިބުނީ ގޭތެރޭން އިވުނު އާދަޔާ ޚިލާފް އަޑަކުންނެވެ. ރިޔާޒް އެއަޑަށް ސަމާލުކަން ދީގެން އިރުކޮޅަކު މަޑުކޮށްލިއެވެ. އަނެއްކާވެސް އިވުނީ މީހަކު އޯކާ ދެމޭ ކަހަލަ އަޑެކެވެ. ބެލްކަނީގައި ހުރި އަޅިކެނޑީ ތެރެއަށް ސިނގިރޭޓް ބުރި ނިއްވާލުމަށްފަހު އަޒީމް އެތެރެއަަށް ވަނުމަށް ހިނގައިގަތެވެ. ކޮޓަރިއަށް ވަތްއިރު އެނދުމަތީގައި މީރާ ނެތުމުން ރިޔާޒްގެ ނަޒަރު ގޮސް ހުއްޓުނީ ފާޚާނާއަށެވެ.
ފާޚާނާ ދޮރު ހުރީ އެއްކޮށް ނުލެއްޕިކަަމުން ރިޔާޒް ގޮސް ދޮރު ހުޅުވާލިއެވެ. ފާޚާނާ ތަށިގަނޑު ތެރެއަށް ގުދުވެގެން މީރާ އޮތީ ހޮޑުލާށެވެ. ރިޔާޒް އަވަސްއަވަހަށް އެތެރެއަށް ވަދެ މީރާގެ ބުރަކަށީގައި ފިރުމާލިއެވެ. މީރާ އޯކާ ދެމިދެމި ހަންވިއިރު ހޮޑަށް އައީ މަދު ފެންފޮދެކެވެ. އެވެސް ހުރީ މަޑު ރީނދޫ ފާޑު ކުލައަކަށެވެ.
މީރާ ކޮޅަށް ތެދުވަން މަސައްކަތް ކުރީ އޭނާގެ އުނަގަނޑުގައި އަތް ވިއްދައިގެން ހުރެއެވެ. މޫނު ދޮޮންނަ ތައްޓާ ކައިރިވެ އިސްކުރު ދޫކޮށްލުމަށްފަހު މޫނު ދޮވެލިއެވެ. ލޯގަނޑުން މޫނަށް ބަލާލިއިރު އޭނާގެ ދެލޯވަނީ ވަރަށް ރަތްވެފައެވެ. މޫނުމަތި ވެސް ވަަނީ ކޮންމެވެސް ވަރަކަށް ފޮއްސިވެލާފައެވެ. ކުޑަ ތުވާލިކޮޅަކުން މޫނު ހިއްކަމުން ފާޚާނާއިން ނިކުތްއިރު ރިޔާޒް ބޭރުގައި ހުރީ ކަންބޮޑު ވެފައެވެ.
މީރާގެ މޫނާ ދިމާލަށް ރިޔާޒް ބަލަން ހުރުމަށްފަހު ވާހަކަ ދެއްކިއެވެ. "ކިހިނެއްވީ... މީރާ ބަލީތަ؟... އަހަރެން ހިތަށް އެރި މީރާ އެހާ ލަސްވަންދެން ނުހޭލާ އޮތީމަ ކޮންމެވެސް ގޯހެއް އެބަ އުޅެޔޭ... ހިނގާ ޑޮކްޓަރަށް ދާން..."
މީރާ އައިސް ރިޔާޒްގެ މަގަތުގައި އިށީނެވެ. "އައްޗީޑި ރިޔާ... ތި އައީ ސިނގިރޭޓު ބޮއެގެންދޯ... އަޅެ ތިކަން ހުއްޓަން ވެއްޖެއްނު..." މީރާ މޫނު ކުނިކޮށްގެން ހުރެ ރިޔާޒާ ވާހަކަ ދައްކަމުން ދިޔައީ ރިޔާޒްގެ ގައިން ދުވަމުން ދިޔަ ސިނގިރޭޓު ދުމުގެ ވަހާ ހެދި އުނދަގުވާތީއެވެ.
"ކޮބާތަ މައްސަލައަކީ... އަހަރެން މީރާއާ މެރީ ކުރިއިރުވެސް ސިނގިރޭޓް ބޮން... މިއަދުތަ އައްޗީޑިވީ..." ރިޔާޒް މީރާއާ ގާތްވަމުން އެހެންބުނެލީ ސަމާސާ ކުރާ ކަހަލަ ގޮތަކަށެވެ. "އައްޗީ... ދެން ނޫން..." މީރާއަށް އިތުރު އެއްޗެއް ބުނެވޭ ވަރެއް ނުވިއެވެ. އަނެއްކާ މޭނުބައިކޮށް ހޮޑުލަވާ ގޮތް ވިއެވެ. އެހެންކަަމުން އެނދުމަތިން ތެދުވެ ފާޚާނާއާ ދިމާލަށް ދުއްވައިގަތެވެ.
"މީރާ.... ހިނގާ ހޮސްޕިޓަލަށް ދާން... މިހާރު ކިތައް ފަހަރު ހޮޑުލައިފިންތަ؟..." މީރާ އަނެއްކާ ހޮޑުލާން ފާޚާނާއަށް ވަނުމުން ރިޔާޒް ވަރަށް ދެރަވިއެވެ. ރިޔާޒް ލައިގެން ހުރި ގަމީހުން ވަސް ބަލާލިއެވެ. އޭގެން ކޮންމެވެސް ވަރަކަށް ސިނގިރޭޓް ވަސް ދުވިއެވެ. އެހެންކަމުން އެ ގަމީސް ބާލާ ދާ ވަށިގަނޑަށް ލިއެވެ. ފާޚާނާއިން މީރާ ނިކުތް އިރު އޭނާގެ ގައިގަ އެއްވެސް ވަރެއް ނެތެވެ. މީރާގެ އަތުގައި ރިޔާޒް ހިފައިގެން ގޮސް އެނދުގައި ބޭންދުމަށްފަހު ކޮޓަރިތެރެއަށް އެއާފްރެޝްނާ ޖަހާލިއެވެ.
ބަދިގެ ތެރެއަށް ނިކުމެ ރިޔާޒް ޖޫސް ތައްޓެއް ތައްޔާރުކޮށްލުމަށްފަހު މީރާއަށް ޖޫސް ގެނެސްދިނެވެ. "މީރާ... ތި ޖޫސް ބޯލައިގެން ހިނގާ ޑޮކްޓަރަށް ދައްކަން ދާން..." ރިޔާޒް ހުރީ ކަންތައް ބޮޑުވެފައެވެ.
"ޖޫސްތަށީގައި ހިފަމުން މީރާ ރިޔާޒް އަތަށް އެއްޗެއް ދިއްކޮށްލިއެވެ. "މި ކޯއްޗެއް؟...." ރިޔާޒް އެ ހުދުކުލައިގެ ދަނޑިކޮޅުގައި ހިފީ ސުވާލުން ފުރިފައިވާ ނަޒަރަކުން މީރާއާ ދިމާލަށް ބަލަމުންނެވެ.
މީރާ ލޮލުގެ އިޝާރާތުން އެއަށް ބެލުމަށް އިޝާރާތް ކުރިއެވެ. ރިޔާޒް އަތުގައި އޮތް ދަނޑިކޮޅަށް ބަލާލިއެވެ. އެއީ މާބަނޑުތޯ ޓެސްޓުކުރާ ކިޓެކެވެ. އޭގައިވަނީ ގަދަ ފިޔާތޮށި ކުލައިން ދެ ރޮނގު ކުރެހިފައެވެ. ރިޔާޒަށް މިލިބުނު އުފާވެރި ޚަބަރުން މީރާގެ ގައިގާ ބައްދާލަން ކައިރި ވެވުނެވެ.
"ނޫން ރިޔާ... ރިޔާ ދޭ ފެންވަރަން... އަނެއްކާ މީރާއަށް ހޮޑު ލެވޭނީ... ތިވަހުން ބޯ އަނބުރާތީ މިއުޅެނީ.... ނިދާފަ އޮއްވާ މި ހޭލެވުނީ ތި ވަހެއް ދުވާތީ މޭ ނުބައި ކޮށްގެން...." މީރާ އަތުގެ އިޝާރާތުން އިތުރަށް ކައިރިއަށް ނާންނާށޭ ބުނަމުން މީރާއަށް ވީގޮތް ހާމަ ކުރިއެވެ.
"އޯ ސޮރީ.. އަހަރެން ދެން ސިނގިރޭޓެއް ނުބޯނަން... އަޅެ މީރާއަށް ކޮން އިރަކު އެނގުނީ.... ކީއްވެ އަހަރެން ކައިރީ ނުބުނީ..." ރިޔާޒް ފާޚާނާއަށް ފެންވަރަން ވަންނަން ދާން ތުވާލި ނަގަމުން އަހާލިއެވެ.
"އިއްޔެ އެނގުނީ.... އަދި ރިޔާޒް ކައިރީ ނުބުނެވިފަ މިހުރީ... ރިޔާޒް ހޮސްޕިޓަލުގަ އެދުވަހު މަޑު ކުރީމަ.... ހިތަށް އެރީ ފަހުން ރަނގަޅު ވަގުތެއް ހޯދާފައި ބުނާނީއްޔޭ...." މީރާ ވާހަކަ ދައްކަމުން ދިޔައީ މަޑުމަޑުން ޖޫސްތަށިން އެތިފޮދު ބޮމުންނެވެ.
ރިޔާޒް ހުރީ ވަރަށް އުފަލުންނެވެ. އޭނާ ބޭނުންވީ އަވަހަށް ފެންވަރައިގެން އަންނާށެވެ. މީރާގެ ގައިގައި ލޯބިން ބައްދާލެވޭނީ ގައިން ދުވާ ސިނގިރޭޓު ވަސް ފިލުވައިގެންނެވެ. ހިތާހިތުން މާތްﷲއަށް ހަމްދު ކުރިއެވެ. އެމީހުންނަށް ލިބެން އުޅޭ ދަރިފުޅާ ދޭތެރޭ ވިސްނާލެވުނެވެ.
ކުއްލިއަކަށް މި ލިބުނު ޚަބަރުން ރިޔާޒަށް ޝޮކެއް ލިބުނު ކަމުގައިވީ ނަމަވެސް އެއީ މިވޭތުވެދިޔަ ދުވަސްތަކުން ލިބުނު ހިތާމަވެރި ޚަބަރުތަކާ އަޅާ ބަލާއިރު ވަރަށް އުފާވެރި ޚަބަރެކެވެ. އެވަގުތު ރިޔާޒްގެ ހިތަށް ރޫހީގެ ހަނދާންތައް އުނދަގޫ ކުރަމުން ދިޔައެވެ. ރޫހީ ދުނިޔޭގައި ހުރިނަމައޭ ހިތަށް އެރިއެވެ. ރިޔާޒް ލޮލަށް ޖަމާވަމުން ދިޔަ ކަރުނަަތައް ފޮހެލުމަށްފަހު ފާޚާނާގައި ހުރި މޫނު ބަލާ ލޯގަނޑުން ފެންނަމުން ދިޔަ އަމިއްލަ ސޫރައަށް ބަލާލަމުން ހިނިތުންވާން މަސައްކަތް ކުރިއެވެ.
*** *** *** *** *** ***
އޮފީހުގެ މަސައްކަތްތައް ނިންމާލުމަށްފަހު އަޒީމް ބޭރަށް ނިކުމެ މިސްރާބުޖެހީ ހުޅުމާލެއަށް ދާ ބަސް ހުއްޓި ކައިރިއަށެވެ. އެތާ މަޑުކޮށްގެން ހުއްޓާ އަޒީމްގެ ފޯން ރިންގްވާން ފެށުމުން ފޯނަށް ބަލާލިއެވެ. އެ ގުޅަނީ ރިޒްވީއެވެ.
"ހަލޯ... ކޮބާ އަންނާކަށް ނުވޭތަ؟... ބަހަށް އަރާފަ އަހަރެންނަށް ގުޅާ... އޭރުން އެއާޕޯޓް މެއިން ބަސް ސްޓޮޕަށް އަހަރެން ބަލާ ދާނަން..." އަޒީމްގެ ޚަބަރެއް ނުވެ ލަސްވުމުން ރިޒްވީ ގުޅީއެވެ. އަޒީމް މިހާރު ބަހަށް އަރަނީކަމަށް ބުނުމުން ރިޒްވީ ފޯނު ކަނޑާލިއެވެ. ބަހަށް އެރުމަށްފަހު ޓިކެޓަށް އަޒީމް ފައިސާ ދެއްކިއެވެ. އަދި އެ ބަހަށް އަރަން ތިބި އެންމެން އެރުމާ އެކު ބަސް އޭގެ މަންޒިލަށް ދަތުރު ފެއްޓިއެވެ. ފަނަރަ މިނެޓަށްފަހު ބަސް އައިސް ރިޒްވީ މަޑުކޮށްގެންހުރި ބަސް ހުއްޓި ކައިރިއަށް މަޑުކޮށްލިއެވެ. އަޒީމް އަންނަންވާއިރަށް ރިޒްވީ ހުރީ ބަލާ އައިހެވެ.
ދެމީހުން އެކީ ފުރަތަމަ ދިޔައީ ރިޒްވީ ހަދަމުންދާ ގެސްޓް ހައުސަށެވެ. އެތަނުގެ ގިނަ މަސައްކަތްތައް ވަނީ ނިމިފައެވެ. ދެވަނަ ބުރީގައި ނިމިފައި ހުރި ކޮޓަރިތަކުން ކޮޓަރިއެއް އަޒީމަށް ދިނެވެ. އެ ކޮޓަރި ވަނީ މުޅިން ނިމިފައެވެ. ފަރުނީޗަރާ ހުރިހާ ސާމާނެއް ހުރީ އެކޮޓަރީގައި ލާފައިވާ ކުލައާ ގުޅުވާފައެވެ. އޮފީސް ޔުނީފޯމް ބޭލުމަށްފަހު އަލަމާރި ތެރޭގައި އަޅުވާލިއެވެ. އަދި ގެނައި ޝޯޓާއި ޓީޝާޓް ލައިގެން އަޒީމް ބޭރަށް ނިކުތީ ފޯނު ހިފައިގެންނެވެ.
"އޭ ވަރަށް ސަޅި މިތަން... އެފްލޯ އެހުރީ ނިމިފަ ދޯ...." ތިރިއަށް ފޭބިއިރު ކައުންޓަރު ކައިރީ ހުއްޓިގެން ހުރި ރިޒްވީ ފެނުމުން އަޒީމް އަހާލިއެވެ.
"އާން... އަސްލު އެއީ މިދޭތެރެއިން އަހަރެންގެ އަންހެނުންނާ ކުދިން މާލެ އައިމަ.... އެތަން އެހުރީ ދެން އަވަސް އަރުވާ ނިންމާލާފަ، ފަރުނީޗަރާ ސާމާނުވެސް ވެއްދީ ވަރަށް ފަހުން... މިހާރު އެމީހުން ލަންކާއަށް ފުރައިފި...." ރިޒްވީއަކީ މެދު އުމުރުގެ ފިރިހެނެކެވެ. އޭނާއަކީ މާލޭގެ މަޝްހޫރު މުއްސަނދި، ގަދަރުވެރި އާއިލާއަކަށް ނިސްބަތްވާ މީހެކެވެ. އޭނާގެ އަންހެނުންނާ ކުދިން ދިރި އުޅެމުން އަންނަނީ ސްރީލަންކާގައެވެ. ލިބޭ ޗުއްޓީތަކުގައި ރާއްޖެ އައިސް މަޑުކުރަނީ ހުޅުމާލޭގައެވެ.
"ކޮބާ މަސައްކަތަކީ؟.... އަހަރެން ބޭނުމީ އަވަހަށް މަސައްކަތް ފަށަން..." އަޒީމް މިހެން ބުނުމުން ކައުންޓަރު މަތީ އޮތް ކުރެހުން އަޒީމަށް ދައްކާލިއެވެ.
"މީ މިތާ އިންޓީރިއާރ... މީ އަހަރެން ބޮޑު އަގު ދީފަ މީހަކު ލައްވާ ހެއްދީމަ ވާ ގޮތަކީ... މި ކައުޓަރު ބިއްދޮށާ، ގެސްޓުން އިށީންނަން މި ހުރި އޭރިޔާ އަަހަރެން އެއްގޮތަކަށް ވެސް ހިތްހަމައެއް ނުޖެހޭ... އަދި ޓެރަސް ބައިވެސް އަަހަރެން ހިތްހަމަޖެހޭ ގޮތަކަށް ނޫން އެހެރީ... އަހަރެން ބޭނުންވަނީ މިކަމަށް އަޒީމް ފާޑެއް ކިޔާލާފަ ގޮތެއް ހަދައިދޭން... އަޒީމަށް އަހަރެން ރަނގަޅު އަގެއްވެސް ދޭނަން... ވާނެތަ؟..." ކައުންޓަރު މަތީ ހުޅުވާފަ އޮތް ފައިލްގެ ގަނޑުތައް އުކަމުން ރިޒްވީ ވާހަކަ ދއްކިއެވެ.
ރަނގަޅަށް އެ ކުރެހުންތަކަށް ބަލަން ހުރުމަށްފަހު އަޒީމް ބޯ ޖަހާލިއެވެ. " އާން މިކަން ވެދާނެ.... ކޮން އިރަކަށް މިތަން ހުޅުވަން ތި ގަސްތު ކުރަނީ..."
އަޒީމްގެ ކޮނޑުގައި ޖަހާލަމުން އަންނަ އަހަރު ކަމަށް ރިޒްވީ ބުނަމުން އެ އިމާރާތުން ބޭރަށް ދެމީހުން އެކީގައި ނިކުތެވެ. އެ އިމާރާތަކީ ހުޅުމާލެ ބީޗް ސަރަހައްދާ ވީ ފަރާތުގައިވާ ބިމެއް ކަމުން އެ އިމާރާތުން ނިކުންނަަ އިރު ކުރިމައްޗަށް އޮންނަނީ ބީޗެވެ. އެކި އުމުރު ފުރައިގެ ކުދިންތައް އޭރު ބީޗްގައި ސަކަރާތްޖަހާ މޫދަށް އެރި އުޅުނެވެ.
"އަޒީމް.... އަހަރެން އެބަ އަންނަން ކާރު ހިފައިގެން.... މަޑުކޮށްލާ.... މި އަންނަނީ އިނގޭ.... ކައިގެންނު މަސައްކަތައިގެން އުޅެންވާނީ..." ރިޒްވީ ޖެހިގެން އޮތް ގޯޅިއަށް ލަންބާލުމުން ރިޔާޒްގެ ނަޒަރު ގޮސް ހުއްޓުނީ ބީޗާ ދިމާލަށެވެ. ކުރިއަށް ހިނގަމުން މަޑުމަޑުން ބީޗާ ދިމާލަށް ނިކުތެވެ. ތޮއް ޖެހިފައިވާ މާލޭގައި އުޅެއުޅެފައި ހުޅުމާލެއަށް އައުމުން ބުނެދޭން ނޭނގޭ ކަހަލަ ހިތްހަމަޖެހުމެއް ލިބިގެން ދިޔައެވެ.
ކުއްލިއަކަށް ވައި ގަދަވެ ގަސްތައް ދެއަތަށް ހެލެން ފަށައިފިއެވެ. ޖެހެމުންދިޔަ ގަދަ ވައިގެ ތެރޭގައި އަޒީމަށް ލޯ ހުޅުވަން ދަތި ވިއެވެ. ވަޔާއެކީ އަންނަ ވެލީގެ ހަމަލާއިން ސަލާމަތްވާން މޫދާ ވީ ފަރާތަށް އަޒީމް ފުރަގަސް ދިނެވެ. އުޑު މައްޗަށް ނަޒަރު ހިންގާލެވުނީ އުޑުމަތި ބަނަވެ އަނދިރިވާހެން ހީވުމުންނެވެ. އޭރު ވިއްސާރަ ވިލާތަކުން އުޑުމަތިވަނީ ބައްދާލާފައެވެ.
އަތިރިމަތީ ތިބި ގިނަ މީހުން އެއްގަމަށް އަރަމުން ދިޔައެވެ. ގިނައިރުތަކެއްނުވެ ވައި މަޑުވެއްޖެހެން ހީވުމުން އަޒީމް މޫދާ ދިމާލަށް ބަލާލިއެވެ. މިހާރު އެހިސާބުގައި އެއްވެސް މީހަކު ފެންނާކަށް ނެތެވެ. ވަށައިގެން އެ ސަރަހައްދަށް ބަލާލެވުނީ ކުއްލިއަކަށް މީހުންތައް މަދުވުމުންނެވެ. އެވަގުތު އަޒީމްގެ ލޮލުގައި އަޅައިގަތީ ބީޗްގެ ދޮންވެލިގަނޑު މަތީގައި އިށީނދެގެން އިން އަންހެނެކެވެ.
އަސޭމިރުސް ފުއްތަކެއްހާ ބުޅި، ވަރުގަދަ އިސްތަށިގަނޑެކެވެ. އޭނާގެ އިސްތަށިގަނޑުގެ ތަންތަންކޮޅުންވަނީ ހައި ލައިޓްކޮށް ކުލަޖައްސާފައެވެ. ވަޔާއެކު އުނަގަނޑާ ހަމަޔަށް އޮތް އިސްތަށިގަނޑު ވިހުރެމުން ދިޔައިރު ފުރަގަހުން އެ ހަށިގަނޑު ފެންނަަ އިރު އޭނާގެ ލޫޅާފަތިކަން ހާމަވެއެވެ. އެ އަންހެން މީހާއަށް ބަލަން އަޒީމަށް ހުރެވުނީ އެހިސާބުން އިތުރު މީހަކު ފެންނަން ނެތުމުންނެވެ.
މަޑުމަޑުން އެ އަންހެން މީހާ ދޮންވެލިގަނޑު މަތިން ތެދުވެ ދެއަތް ފޮޅާލިއެވެ. ބުޑުމަތީ އަތް ހާކާލަމުން ޖިންސުގައި ހަރުލާފައިވާ ވެލިތައް ފޮޅާލިއެވެ. އަދި އިސްތަށިގަނޑު އެއްފަރާތަކަށް ގެންނަމުން އެއްގަމާ ވީ ފަރާތަށް އޭނާ އެނބުރުނެވެ. ހަމުގެ ކުލަ ދޮންކަަމުން ހީވަނީ ޔޫރަޕް މީހެއް ހެންނެވެ. ކުޑަ ނިތް ކުރިއެކެވެ. ބޮޑު ދެލޮލެވެ. އޭނާގެ ލޮލުގެ ކުލައިގެ ސަބަބުން އޭނާ އިތުރަށް ފުރިހަމަ ކޮށްދެއެވެ. އަޒީމަށް ހުރެވުނީ ކަޅި ޖަހާނުލާ ބަލާށެވެ. އަޒީމާ އަރާހަމަކުރަމުން އެ އަންހެން މީހާ ހިނިތުންވުމެއް ބަދަލުކޮށްލިއެވެ. އެއްކޮލުގައި އަޑިކޮޅެއް ވެސް އިނެވެ. އަޒީމް ހިތާ ހިތުން އެ އަންހެން މީހާއަށް ތަޢުރީފް ކުރިއެވެ.
އޭނާގެ ރީތިކަން ފެނި އަޒީމަށް ހުރެވުނީ އާޝޯޚްވެފަައެވެ. އެވަރުގެ ރީތި އަންހެނެއް މިއިން ދުވަހަކު އަޒީމް ނުދެކެއެވެ. އެ އަންހެން މީހާ ހިނިތުންވުމެއް ބަދަލުކޮށްލުމުން އަޒީމަށް ބުނެދޭން ނޭނގޭ ކަހަލަ އިހްސާސެއް ކުރިއެވެ. ސިހިފައި މަގުމައްޗަށް އަޒީމް ބަލާލީ ކާރެއްގެ ބަރުގޮނުގެ އަޑު އިވުމުންނެވެ.
(ނުނިމޭ)
