ކުންފުނިތަކުގެ ހާއްސަ އާންމު ޖަލްސާ ބާއްވާ މުއްދަތާއި ބޯޑު މެންބަރުން އައްޔަންކުރުމަށް އޮތް މުއްދަތު ދަށްކުރުމަށްޓަކައި ސަރުކާރުން ކުންފުނީގެ ބިލަށް އިސްލާހެއް ހުށަހަޅައިފިއެވެ.
ފޭދޫ އުތުރު ދާއިރާގެ މެންބަރު އިސްމާއީލް ނިޒާރު ހުށަހެޅުއްވި އިސްލާހުގައިވާ ގޮތުން:
- ޖަލްސާ ބޭއްވުމަށް އެދި ލިއުން ލިބޭތާ ތިން ދުވަހުގެ ތެރޭ ދައުވަތު ދޭން ވާނެ
- ޖަލްސާ ބޭއްވުމަށް އެދި ހުށަހަޅާތާ 10 ދުވަހުގެ ތެރޭ ބާއްވަން ވާނެ
މީގެ އިތުރުން، ކުންފުނިތަކުން ހާއްސަ އާންމު ޖަލްސާ ބޭއްވުމަށް ކަނޑައެޅިފައިވާ ދުވަހުގެ މަދުވެގެން ހަތް ދުވަސް ކުރިން ކުންފުނީގެ މެންބަރުން ނޯޓިސް ފޮނުވަން ވާނެ ކަމަށް ވެސް އެ އިސްލާހުގައި ވެއެވެ.
ހަމަ އެހެންމެ ކުންފުނީގެ ގާނޫނުގައި ބަޔާންކުރާ އަދަދަށް ކުންފުނިތަކުގެ ޑިރެކްޓަރުންގެ ބޯޑުގައި މެންބަރުން ނެތް ނަމަ، ނުވަތަ އެ އަދަދަށް ޑިރެކްޓަރުން ނެތްކަމަށް ކުންފުނިތަކުގެ ރެޖިސްޓްރާގެ ސަމާލުކަމަށް ގެނެސްފިނަމަ، އެ އަދަދަށް ޑިރެކްޓަރުން އައްޔަންކުރަން ރަޖިސްޓްރާ އަންގަވައިފިނަމަ 10 ދުވަހުގެ ތެރޭ ޑިރެކްޓަރުން އައްޔަންކޮށް ރަޖިސްޓްރާ އަށް އެކަން އަންގަން ޖެހޭނެ ކަމަށް ވެސް ވެއެވެ.
އެ އިސްލާހުގައިވާ ގޮތުން މެނޭޖިން ޑިރެކްޓަރުގެ މަގާމު ހުސްވެއްޖެ ނަމަ ވެސް، އަމަލުކުރަން ވާނީ އެ އުސޫލުންނެވެ.
ކުންފުނީގެ ބިލުގައި މިހާރު އޮންނަ ގޮތް:
- ޖަލްސާ ބޭއްވުމަށް އެދި ލިއުން ލިބޭތާ 21 ދުވަހުގެ ތެރޭ ދައުވަތު ދޭން ވާނެ
- ޖަލްސާ ބޭއްވުމަށް އެދި ހުށަހަޅާތާ ތިން މަސް ދުވަހުގެ ތެރޭ ބާއްވަން ވާނެ
- ހާއްސަ އާންމު ޖަލްސާ އެއް ބާއްވާ ދުވަހުގެ މަދުވެގެން 14 ދުވަހުގެ ތެރޭ މެންބަރުންނަށް ނޯޓިސް ދޭން ވާނެ
- ބޯޑު މެންބަރުން މަދުނަމަ ނުވަތަ މެނޭޖިން ޑިރެކްޓަރުގެ މަގާމު ހުސްވެއްޖެ ނަމަ 30 ދުވަހުގެ ތެރޭ އެ މަގާމުތަކަށް މީހުން އައްޔަންކޮށް ކުންފުނިތަކުގެ ރެޖިސްޓްރާ އަށް އަންގަންވާނެ
