މިރޭ މިރޭ 18:29 ހާއިރު މާލޭގައި ދެ ސައިކަލު ޖެހި އެކްސިޑެންޓެއް ހިނގާފައިވާ ކަމަށް ފުލުހުން ބުނެފިއެވެ.
މާފަންނު ބަސް ޓާމިނަލް ކައިރި ހިނގި މި އެކްސިޑެންޓުގައި އަނިޔާވި 3 މީހުންނަށް އައިޖީއެމްއެޗް ހޮސްޕިޓަލުގައި ފަރުވާ ދެމުންދާ ކަމަށް ފުލުހުންގެ މީޑިއާ އޮފިޝަލް ވަނީ މައުލޫމާތު ދީފައެވެ. އަދި ފަރުވާ ދެމުންދަނީ 1 ދިވެހި ފިރިހެނަކާއި 2 ބިދޭސީ ފިރިހެނުންނަށް ކަމަށް ފުލުހުން ބުނެއެވެ.
މި ހާދިސާގެ އިތުރު ތަފްސީލެއް ފުލުހުން ހިއްސާކޮށްފައި ނުވާއިރު އެ މައްސަލަ ދަނީ އިތުރަށް ތަހުގީގު ކުރަމުންނެވެ. އެކްސިޑެންޓު ހިނގި ސަރަހައްދުގެ ވީޑީއޯ ސޯޝަލް މީޑިއާގައި ދައުރުވަމުންދާއިރު ފެންނަނީ ދެ ސައިކަލަށް ވެސް ބޮޑެތި ގެއްލުންވެފައިވާ މަންޒަރެވެ.
ފަހަކަށް އައިސް މާލެ ސަރަހައްދުގައި ނުރައްކާތެރި އެކްސިޑެންޓުތައް ހިނގާ މިންވަރު ވަނީ އިތުރުވެފައެވެ. އަދި މިފަދަ ހާދިސާތަކުގައި ބައެއް މީހުންގެ ފުރާނަ ގެއްލި އަނެއް ބައި މީހުންނަށް ދިރިއުޅުމުގައި އެކިއެކި ނުކުޅެދުންތެރިކަމާ ކުރިމަތިލާން ޖެހިފައި ވެސް ވެއެވެ.
އެގޮތުން މިދިޔަ ބުރާސްފަތި ދުވަހުގެ ރޭ ހުޅުމާލެ ސެންޓްރަލް ޕާކް ކައިރިން ސްޕޯޓްސް ކާރަކާއި ސައިކަލެއް ޖެހި ހިނގި ނުރައްކާތެރި އެކްސިޑެންޓުގައި ސައިކަލް ދުއްވަން އިން ޒުވާނާ ވަނީ ހޮސްޕިޓަލަށް ގެންގޮސް ފަރުވާ ދެމުން ދަނިކޮށް މަރުވެފައެވެ. އަދި ހަމައެހެންމެ ދަރުބާރުގެ ކައިރީ ބުދަ ދުވަހު ހިނގި އެކްސިޑެންޓުގައި ހާލު ސީރިއަސް ވި ޒުވާނާވެސް ވަނީ ވެންޓިލޭޓަރުގައި ފަރުވާ ދެމުން ދަނިކޮށް މަރުވެފައެވެ.
މީގެ އިތުރުން އިއްޔެ ހުޅުމާލެ ފޭސް 2 ގައި ކާރަކާއި ސައިކެއް ޖެހި ނުރައްކާތެރި އެކްސިޑެންޓެއް ހިނގާފައި ވާ އިރު، އެ ހާދިސާގައި އަނިޔާވި ޒުވާނާއަށް ބޮޑެތި ޒަހަމްތައް ލިބިފައިވާ ކަމަށް މައުލޫމާތު ލިބެއެވެ. އަދި ހުޅުމާލެ ދެވަނަ ފިޔަވަހީގައި ދުއްވި ކާރަކާއި ސައިކަލެއް ޖެހި ހިނގި މި އެކްސިޑެންޓުގައި ސައިކަލު ދުއްވަން އިން މީހާއަށް ސީރިއަސް އަނިޔާތަކެއް ލިބި ހުޅުމާލެ ހޮސްޕިޓަލުގައި ދަނީ ފަރުވާ ދެމުންނެވެ.
ދާދިފަހުން ފުލުހުން އާންމު ކުރި ތަފާސް ހިސާބުތަކުންވެސް އެކްސިޑެންޓުތައް ހިނގަމުންދާ މިންވަރު އިތުރުވެފައިވާ ކަން ފާހަގަ ކުރެވެއެވެ. އެގޮތުން މި އަހަރުގެ މިހާތަނަށް 1907 އެކްސިޑެންޓު ހިނގާފައިވާ ކަމަށާއި ނިމިދިޔަ އޮގަސްޓު މަހު އެކަނިވެސް ވަނީ 204 އެކްސިޑެންޓު ހިނގާފައެވެ.
މި އެކްސިޑެންޓުތަކާ ގުޅިގެން ހުޅުމާލޭގައި ޑްރިފްޓްކުރުމަށާއި ރޭސްކުރުމަށް ވަކި ސަރަހައްދެއް ދީފައިވާ ހުއްދަ ބާތިލްކޮށް ސަރުކާރުންވެސް ވަނީ ހަރުކަށި ފިޔަވަޅު ތަކެއް އަޅާފައެވެ.
