ސަރުކާރުން، ރާއްޖޭގެ އުތުރާއި ދެކުނުގައި ބަންކަރިން ހިދުމަތް ފެށުމަށް ތައްޔާރުވަމުން އަންނައިރު، މި މަސައްކަތުގެ ތެރެއިން މިއަދު އައްޑޫ ސިޓީ ހިތަދޫ ޕޯޓުން (އެޗްޕީއެލް) ބޭރު ބޯޓަކަށް ފެން ސަޕްލައި ކޮށްދީފިއެވެ.
އައްޑޫ ސިޓީ ހިތަދޫ ޕޯޓުން މި ހިދުމަތް މިއަދު މުޅިން އަލަށް ފޯރުކޮށްދީފައި ވާއިރު އެޗްޕީއެލް އިން ބުނީ 'އެމްވީ ނިއުމަތު' އަށް 10 ޓަނުގެ ތާޒާ ފެން ފޯރުކޮށްދިނުމަކީ ތާރީހީ ކާމިޔާބީއެއް ކަމަށެވެ. "މި ކާމިޔާބީއަކީ ކަނޑުގެ ސިނާއަތަށް ހިދުމަތް ކުރުމަށް އަޅުގަނޑުމެންގެ ކުރިއެރުން ދެމިއޮތުމާ ހިދުމަތްތެރިކަމުގެ އާ ބާބެއްގެ ފެށުން" އެޗްޕީއެލް އިން ވަނީ ބުނެފައެވެ.
މިއަދު އެޗްޕީއެލް އިން ފެން ސަޕްލައިކޮށްދިން ބޯޓަކީ މި މަހުގެ 21 ވަނަ ދުވަހު އިންޑިއާއިން އައްޑޫ ސިޓީއަށް މުދާހިފައިގެން ދިޔަ ބޯޓެކެވެ. ދެކުނުގައި ބަންކަރިންގެ ހިދުމަތް ފަށާ، ބޭރުގެ ބޯޓުތަކަށް ފެނާއި ތެޔޮ ސަޕްލައި ކޮށްދިނުމުގެ މަސައްކަތް ކުރުމަށް ތައްޔާރު ވަމުން އަންނައިރު އެޗްޕީއެލްގައި ފެން ރައްކާ ކުރެވޭނެ އިންތިޒާމުތައް ހަމަޖައްސާފައި ވަނީ މިއަހަރުގެ ތެރޭގައެވެ.
ދެކުނުގެ ވިޔަފާރި އާއި އިގްތިސާދު ރަނގަޅުކުރުމަށް ކުރަމުން އަންނަ މަސައްކަތްތަކުގެ ތެރެއިން ކޮންމެ 10 ދުވަހަކާއި 15 ދުވަހާ ދޭތެރޭ އިންޑިއާއިން އައްޑޫ ސިޓިއަށް ޕެރިޝަބަލް ގެނައުމުގެ މަސައްކަތް އަންނަނީ ކުރަމުންނެވެ. އެގޮތުން ޕެރިޝަބަލްގެ އިތުރުން، އައްޑޫ ސިޓީ ގެ ރައްޔިތުން އިންޑިއާ އިން ގެންނަން ބޭނުންވާ ކާބޯތަކެތީގެ އެހެނިހެން ބާވަތްތަކާއި، ޖެނެރަލް ކާގޯ ގެ ބާވަތްތައްވެސް ގެނެވޭނެ އިންތިޒާމު ވަނީ ހަމަޖައްސާފައެވެ.
