މާލޭގައި މީހަކަށް ބިރު ދައްކައި ފޯނެއް ފޭރުނު މައްސަލައެއްގައި ދިވެހި އަންހެނަކު ހައްޔަރުކޮށްފިއެވެ.
ފުލުހުން ބުނީ، މިއަދުގެ ވަގުތެއްގައި މާލޭގައި މީހަކަށް ވަޅިއަކުން ބިރުދައްކައި ފޯނެއް ފޭރުނު މައްސަލައެއްގައި ހައްޔަރުކުރީ ޝާނާ މުހައްމަދު ޖުނައިދު، ބުރުނީގެ / ގދ. ވާދޫ (26އ) ކަމަށެވެ.
އެކަމަކު އޭނާ ހައްޔަރުކުރި ވަގުތާއި ހައްޔަރުކުރީ މާލޭގެ ކޮން ހިސާބަކުން ކަން ފުލުހުން ހާމައެއް ނުކުރެއެވެ.
މި މައްސަލަ ތަހްގީގުކުރަމުންދާ ކަމަށް ފުލުހުން ބުންޏެވެ.
މިފަހުން ވެސް ވަނީ ފޭރުމުގެ މައްސަލައަކާ ގުޅިގެން މީހަކު ހައްޔަރުކޮށްފައެވެ. އެގޮތުން މިދިޔަ ހޮނިހިރު ދުވަހުގެ ފަތިހުގެ ވަގުތެއްގައި ކަޓަރަކުން އަންހެނަކަށް ހަމަލާދީ އޭނާގެ އަތުން ފައިސާ ފޭރުނު މައްސަލައެއްގައި 29 އަހަރުގެ ދިވެހި ފިރިހެނަކު ވަނީ ހައްޔަރުކޮށްފައެވެ.
ނަމަވެސް އެ ހާދިސާގައި ފޭރިގެންފައިވާ ފައިސާގެ އަދަދެއް ފުލުހުން ހިއްސާއެއް ނުކުރެއެވެ.
