ޕްރޮސެކިއުޓަރު ޖެނެރަލް ހުސައިން ޝަމީމް މަގާމުން ވަކިކުރުމަށް ނިންމި މައްސަލައިގައި އޭނާ ޖަވާބުދާރީކުރުވުމަށް ބާއްވާ ރައްޔިތުންގެ މަޖިލީހުގެ ޖުޑީޝަރީ ކޮމިޓީގެ ބައްދަލުވުން ސިއްރުކޮށްފިއެވެ.
ޝަމީމް ޕްރޮސެކިއުޓަރު ޖެނެރަލްގެ މަގާމުން ވަކިކުރުމަށް ހުށަހެޅުއްވީ މި މަހުގެ 13 ވަނަ ދުވަހު ޖުޑީޝަރީ ކޮމިޓީން ބޭއްވި ބައްދަލުވުމުގައި ހުޅުދޫ ދާއިރާގެ މެންބަރު މުހައްމަދު ޝާހިދެވެ. އެ މައްސަލަ އިތުރަށް ބެލުމަށް ނިންމައި ކޮމިޓީން މަޖިލީހަށް އެ މައްސަލަ ހުށަހެޅުމުން ރިޔާސަތުން ނިންމީ އެ މައްސަލަ ބެލުމަށް އަނބުރާ ޖުޑީޝަރީ ކޮމިޓީއަށް ފޮނުވާލުމަށެވެ.
އެއާއެކު އެ މައްސަލައާ ގުޅޭގޮތުން އެންމެ ފަހުން ބޭއްވި ބައްދަލުވުމުގައި ކޮމިޓީން ނިންމީ، ޝަމީމް ވަކިކުރުމަށް ހުށަހެޅި މައްސަލައާ ގުޅުންހުރި ބައެއް ލިޔެކިއުންތައް ހޯދުމަށް ހުށަހެޅުމަށެވެ. އެކަމަކު މިއަދުގެ ބައްދަލުވުން ފެއްޓެވުމަށްފަހު ޖުޑީޝަރީ ކޮމިޓީގެ މުގައްރިރު އަދި މަނަދޫ ދާއިރާގެ މެންބަރު ހުސްނީ މުބާރިކު ވިދާޅުވީ، މައްސަލައާ ގުޅުންހުރި ލިޔެކިއުންތައް ހޯދުމަށް ޕްރޮސެކިއުޓަރު ޖެނެރަލްގެ އޮފީހަށް ހުށަހެޅުމުން ލިޔެކިއުންތައް ކޮމިޓީގެ މިއަދުގެ ބައްދަލުވުން ފެށުމާ ހަމައަށް ވެސް ނުލިބޭ ކަމަށެވެ.
"އަޅުގަނޑުމެން އެދިފައިވާނީ މައްސަލަތަކަކާ ގުޅޭ ގޮތުން މައްސަލަތައް އަނބުރާ ގެނައުމަށް ނިންމެވި ނިންމެވުންތައް، އެ ނިންމެވުންތަކަކީ އޭގެ ޒާތުގަ ލިޔެކިއުންތަކުގެ ގޮތުގައި ކޯޓަށް ފޮނުވާފަ ހުންނަ ސިޓީތަކާއި އެ ނިންމުންތަކަށް ވާތީ ހުރި ކޭސް ލޮގު، އޭގެ އިތުރަށް ވަގުތު ނަގަން ޖެހޭނެ ކަންތައްތަކެއް ކަމަށް ކޮމިޓީން ގަބޫލެއް ނުކުރަން،" ހުސްނީ ވިދާޅުވިއެވެ.
އޭނާ ދެކެވަޑައިގަންނަވާ ގޮތުގައި އެ މައުލޫމާތަކީ ސިސްޓަމްގެ ތެރޭ ރައްކާކުރެވިފައިވާ މައުލޫމާތުތަކެއް ކަމަށް ވާތީ، އެ މައުލޫމާތު ފަސޭހައިން ހިއްސާކުރެވެން ވާނެއެވެ.
އޭގެ ފަހުން މައްސަލަ ކުރިއަށް ގެންދާނެ ގޮތެއް ނިންމުމަށް ކޮމިޓީއަށް ހުޅުވާލެއްވިއެވެ. އެއާއެކު ތުލުސްދޫ ދާއިރާގެ މެންބަރު އިބްރާހީމް ނަސީމް ހުށަހެޅުއްވީ ކޮމިޓީގެ ބައްދަލުވުން ސިއްރުކޮށްގެން ކުރިއަށް ގެންދިއުމަށެވެ.
ނަސީމް ވިދާޅުވީ ޝަމީމް ޖަވާބުދާރީކުރުވުމަށް ކޮމިޓީއަށް ހާޒިރުކުރާ މައްސަލައަކީ ހައްސާސް މައްސަލައަކަށް ވެފައި، އަދި މައްސަލައިގައި ހިމެނޭ ބައެއް މީހުންގެ ޒާތީ މައުލޫމާތުތައް ވެސް ހިމެނޭތީ މީގެ ކުރިން ވެސް ބައްދަލުވުން ސިއްރުކޮށްދޭން ޝަމީމް އެދިވަޑައިގެންނެވި ކަމަށާއި، އެހެންކަމުން އޭނާގެ ނިންމުމަށް އިހްތިރާމްކޮށް، ގައުމީ މަސްލަހަތު އިސްކޮށް ބައްދަލުވުން ސިއްރުކުރަން ހުުށަހަޅުއްވާ ކަމަށެވެ.
އޭނާގެ އެ ހުށަހެޅުއްވުމަށް ފޭދޫ އުތުރު ދާއިރާގެ މެންބަރު އިސްމާއީލް ނިޒާރު ތާއީދުކުރެއްވިއެވެ. އެހެންވެ ނަސީމްގެ ހުށަހެޅުމާ މެދު ގޮތެއް ނިންމުމަށް ހުސްނީ ކޮމިޓީގައި އެއްސެވުމުން ކޮމިޓީން ނިންމީ ބައްދަލުވުން ސިއްރުކުރުމަށެވެ.
އެހިސާބުން ކޮމިޓީގެ ލައިވް ފީޑް ވެސް ވަނީ މެދުކަނޑާލައިފައެވެ.
ޝަމީމް މަގާމުން ވަކިކުރުމަށް ހުށަހެޅި މައްސަލައިގައި ޖަވާބުދާރީވުމަށް އޭނާ ވަޑައިގަންނަވާ ބައްދަލުވުން ސިއްރުކުރުމަށް ޖުޑީޝަރީ ކޮމިޓީން ނިންމީ އެ ބައްދަލުވުން ލައިވްކޮށްދޭން ޝަމީމް އެދިވަޑައިގެންފައިވާ ކަމަށް ޕްރޮސެކިއުޓަރު ޖެނެރަލްގެ އޮފީހުން މިއަދު ބުނެފައި ވަނިކޮށެވެ.
ޕްރޮސެކިއުޓަރު ޖެނެރަލްގެ މަގާމުން ޝަމީމް ވަކިކުރުމަށް ހުށަހެޅުއްވި ސިޓީގައި ޝާހިދު ލިޔުއްވާފައިވާ ގޮތުގައި، ޕްރޮސެކިއުޓަރު ޖެނެރަލް ވާން ވާނީ ވަކި ފަރާތަކަށް ބުރަނުވާ، ގާނޫނުއަސާސީ އާއި މަޖިލީހުން ފާސްކުރާ ގާނޫނާ އެއްގޮތްވާ ގޮތުގެ މަތިން އަދާކުރާ، އަދި އެއްވެސް ފަރާތެއްގެ ނުފޫޒުގައި ނެތް ބޭފުޅަކަށެވެ.
މީގެ އިތުރުން، ވަކި ފަރާތްތަކަށް މަންފާއެއް ހޯދައިދިނުމުން އެއްކިބާވެ، ޕްރޮސެކިއުޓަރު ޖެނެރަލް އޭނާގެ މަސައްކަތުގެ އަސާސް ބިނާކުރައްވަން ވާނީ ހަމަހަމަކަމާއި ޖަވާބުދާރީވުމުގެ މައްޗަށް ކަމަށް ވެސް އެ ސިޓީގައި ލިޔުއްވާފައިވެއެވެ.
ނަމަވެސް ޝަމީމް ވަނީ ގާނޫނުއަސާސީ އާ ހިލާފުވެވަޑައިގެންފައި ކަމަށާއި، އަދި ޕްރޮސެކިއުޓަރު ޖެނެރަލްގެ މަގާމާ އެކަށީގެންނުވާ ކަންކަން ކުރައްވާފައިވާ ކަމަށް ވިދާޅުވެ، ޝާހިދު ހުށަހެޅުއްވީ ޝަމީމް ވަކިކުރުމަށެވެ.
އެ ސިޓީގައި ޝަމީމް ވަކިކުރަން ފެންނަ ކަމަށް ލިޔުއްވައި ޝާހިދު ހުށަހެޅުއްވި ސަބަބުތަކަކީ:
- ޖިނާއީ ބޮޑެތި މައްސަލަތަކުގައި ހިމެނޭ، އަދި އަންހެނުންގެ ކަރާމާތް ނަގާލުމަށް ހިންގޭ އެންމެ ބޮޑު އެއް ކުށް ކަމަށްވާ ރޭޕްގެ ދައުވާ ލިބުނު ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލަ ގާނޫނީ ސަބަބެއް ނެތި ފައިލްކުރުން
- މަގާމުގައި ދެމިހުރުމަށް ޖިނާއީ އަދުލުގެ ނިޒާމުގައި ގާއިމްކޮށްފައިވާ އުސޫލުތަކާ ހިލާފަށް ކުރީގެ ޔޫތު މިނިސްޓަރު އަހްމަދު މަހްލޫފްގެ މައްޗަށް ކުރި އެމްއެމްޕީއާރުސީގެ ކޮރަޕްޝަންގެ ދައުވާގެ މައްސަލަ ފައިލްކުރުން
- ސަފާރީއެއްގައި ރޭޕްކުރި މައްސަލައިގައި ދަށު ކޯޓުން ނިންމި ނިންމުން އިސްތިއުނާފްނުކުރަން ނިންމުން
- މިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް ހުށަހެޅި ހިއުމަން ޓްރެފިކިން ދައުވާ އަނބުރާ ގެނައުން
- އިސްލާމްދީނުގައި ހައްދު ކަނޑައެޅިފައިވާ ކުށްތަކުގެ ތެރޭގައި ހިމެނޭ ބަނގުރާ ބުއިމުގެ މައްސަލަތަކުގެ ދައުވާތައް އަނބުރާ ގެނައުން
- ޕަބްލިކް ޕްރޮސެކިއުޓަރު އަދި އެ އިދާރާގެ ތަރުޖަމާނު އަހްމަދު ޝަފީއު އެއްޖިންސުން ގުޅުން ހިންގައި ޑްރަގް ބޭނުންކޮށް ރަސޫލާ އަށް ފުރައްސާރަކުރި މައްސަލަ ނުބެލުން
- ތަކުރާރުކޮށް ހުށަހެޅުމުން ވެސް ވެންޓިލޭޓަރު މައްސަލައިގައި ކޮރަޕްޝަންގެ ދައުވާނުކުރަން ނިންމުންޕްރޮސެކިއުޓަރު ޖެނެރަލްގެ އިދާރާގައި މަސައްކަތްކުރާ މުވައްޒަފުންގެ މެދުގައި ތަފާތުކުރުން
