މީދޫ ދާއިރާގެ މެމްބަރު އަދި އެމްޑީއޭގެ ރައީސް އަހުމަދު ސިޔާމު މުހައްމަދުގެ ހަރަދުގައި 564 މީހުންގެ އާބާދީއެއް އޮތް ބ. ކަމަދޫ ރައްޔިތުންނަށް ހިލޭ ބޭސް ފަރުވާ ފޯރުކޮށްދޭން ނިންމަވައިފިއެވެ.
މިކަން އިއުލާނުކޮށް ކަމަދޫ ކައުންސިލުން ނެރުނު އިއުލާނުގައި ބުނީ މި ނިންމުން ނިންމާފައި ވަނީ ކައުންސިލާއި ސަންސިޔާމް ކެއާ އާއެކު ކުރެވުނު މަޝްވަރާއާ ގުޅިގެން ކަމަށެވެ.
އެގޮތުން ކަމަދޫގެ ރަށްވެހިންނަށް ރާއްޖެއިންނާއި ރާއްޖެއިން ބޭރުން ބޭސްފަރުވާ ކުރުމަށް މާލީ އެހީތެރިކަން ދިނުމަށް ނިންމާފައިވާ ކަމަށް ކައުންސިލުން ބުނެއެވެ. އަދި މި އެހީތެރިކަން ދިނުމަށް ހަމަޖެހިފައިވާ ވަކި އުސޫލެއްގެ ދަށުން ކަމަށް ކައުންސިލުން ވަނީ ބުނެފައެވެ.
ކައުންސިލުން ބުނީ ބޭސްފަރުވާއަށް އެފި ހުށަހަޅާން ބޭނުންވާ ފަރާތްތަކަށް ކައުންސިލުން އެކަމަށް ހާއްސަ ފޯމެއް ދޫކުރާނެ ކަމަށެވެ. އަދި އެ ފޯމު ފުރިހަމަކުރުމަށްފަހު، ބޭސްފަރުވާގެ ލިޔެކިޔުންތައް ކައުންސިލަށް ހުށަހެޅުމުން އެހީ ހޯދުމަށް މަސައްކަތް ކޮށްދޭނެ ކަމަށެވެ.
ކައުންސިލުން އިތުރަށް ބުނީ އެ ފޯމް ކައުންސިލް އިދާރާއިން ލިބެން ހުންނާނެ ކަމަށެވެ.
ސިޔާމްއަކީ މަޖިލީހުގައި ތިއްބެވި އެންމެ ގިނަ ދުވަސްވީ މެންބަރުންގެ ތެރޭގައި ހިމެނިވަޑައިގަންނަވާ މެންބަރަކަށް ވާއިރު، އޭނާ މިހާރު ފުރުއްވަމުން ދަނީ ރައްޔިތުންގެ މަޖިލީހުގެ 5 ވަނަ ދައުރެވެ. އަދި އޭނާއަކީ ރާއްޖޭގެ ރިސޯޓު ވިޔަފާރި ދާއިރާގައި ވެސް މަޝްހޫރު ވިޔަފާރިވެރިއެކެވެ.
