ޕްރޮސެކިއުޓަރު ޖެނެރަލް ހުސައިން ޝަމީމް މަގާމުން ވަކިކުރުމަށް ނިންމި މައްސަލަ އިތުރަށް ބެލުމަށް، ރައްޔިތުންގެ މަޖިލީހުގެ ޖުޑީޝަރީ ކޮމިޓީ އަށް އަނބުރާ ފޮނުވާލައިފިއެވެ.
އެ ކޮމިޓީގެ މުގައްރިރު މަނަދޫ ދާއިރާގެ މެންބަރު ހުސްނީ މުބާރިކު ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ފޮނުއްވި ސިޓީއެއްގައި ވިދާޅުވީ، ޝަމީމް ވަކިކުރުމުގެ މައްސަލަ އިތުރަށް ބެލުމަށް ފެންނަ ކަމަށް ކޮމިޓީން ނިންމާފައިވާތީ މަޖިލީހަށް ވަކިކުރުމުގެ މައްސަލަ ހުށަހަޅާ ކަމަށެވެ.
ހުސްނީ ފޮނުއްވި ސިޓީ ރައްޔިތުންގެ މަޖިލީހުގެ އަމީންއާންމު ފާތިމަތު ނިއުޝާ އިއްވަވާ ނިމުމުން، އަބްދުއްރަހީމް ނިންމަވާފައި ވަނީ ޝަމީމް ވަކިކުރުމުގެ މައްސަލަ އިތުރަށް ދިރާސާކުރުމަށް ޖުޑީޝަރީ ކޮމިޓީއަށް އަނބުރާ ފޮނުވާލުމަށް ނިންމައިފައެވެ.
އިއްޔެ ބޭއްވި ޖުޑީޝަރީ ކޮމިޓީގެ ބައްދަލުވުމުގައި ޝަމީމް ވަކިކުރުމަށް ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ. އޭނާ ހުށަހެޅުއްވި ސިޓީގައި ލިޔުއްވާފައިވާ ގޮތުގައި، ޕްރޮސެކިއުޓަރު ޖެނެރަލް ވާން ވާނީ ވަކި ފަރާތަކަށް ބުރަނުވާ، ގާނޫނުއަސާސީ އާއި މަޖިލީހުން ފާސްކުރާ ގާނޫނާ އެއްގޮތްވާ ގޮތުގެ މަތިން އަދާކުރާ، އަދި އެއްވެސް ފަރާތެއްގެ ނުފޫޒުގައި ނެތް ބޭފުޅަކަށެވެ.
މީގެ އިތުރުން، ވަކި ފަރާތްތަކަށް މަންފާއެއް ހޯދައިދިނުމުން އެއްކިބާވެ، ޕްރޮސެކިއުޓަރު ޖެނެރަލް އޭނާގެ މަސައްކަތުގެ އަސާސް ބިނާކުރައްވަން ވާނީ ހަމަހަމަކަމާއި ޖަވާބުދާރީވުމުގެ މައްޗަށް ކަމަށް ވެސް އެ ސިޓީގައި ލިޔުއްވާފައިވެއެވެ.
ނަމަވެސް ޝަމީމް ވަނީ ގާނޫނުއަސާސީ އާ ހިލާފުވެވަޑައިގެންފައި ކަމަށާއި، އަދި ޕްރޮސެކިއުޓަރު ޖެނެރަލްގެ މަގާމާ އެކަށީގެންނުވާ ކަންކަން ކުރައްވާފައިވާ ކަމަށް ވިދާޅުވެ، ޝާހިދު ހުށަހެޅުއްވީ ޝަމީމް ވަކިކުރުމަށެވެ.
އެ ސިޓީގައި ޝަމީމް ވަކިކުރަން ފެންނަ ކަމަށް ލިޔުއްވައި ޝާހިދު ހުށަހެޅުއްވި ސަބަބުތަކަކީ:
- ޖިނާއީ ބޮޑެތި މައްސަލަތަކުގައި ހިމެނޭ، އަދި އަންހެނުންގެ ކަރާމާތް ނަގާލުމަށް ހިންގޭ އެންމެ ބޮޑު އެއް ކުށް ކަމަށްވާ ރޭޕްގެ ދައުވާ ލިބުނު ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލަ ގާނޫނީ ސަބަބެއް ނެތި ފައިލްކުރުން
- މަގާމުގައި ދެމިހުރުމަށް ޖިނާއީ އަދުލުގެ ނިޒާމުގައި ގާއިމްކޮށްފައިވާ އުސޫލުތަކާ ހިލާފަށް ކުރީގެ ޔޫތު މިނިސްޓަރު އަހްމަދު މަހްލޫފްގެ މައްޗަށް ކުރި އެމްއެމްޕީއާރުސީގެ ކޮރަޕްޝަންގެ ދައުވާގެ މައްސަލަ ފައިލްކުރުން
- ސަފާރީއެއްގައި ރޭޕްކުރި މައްސަލައިގައި ދަށު ކޯޓުން ނިންމި ނިންމުން އިސްތިއުނާފްނުކުރަން ނިންމުން
- މިލަންދޫ ދާއިރާގެ ކުރީގެ މެންބަރު އަލީ ރިޒާގެ މައްޗަށް ހުށަހެޅި ހިއުމަން ޓްރެފިކިން ދައުވާ އަނބުރާ ގެނައުން
- އިސްލާމްދީނުގައި ހައްދު ކަނޑައެޅިފައިވާ ކުށްތަކުގެ ތެރޭގައި ހިމެނޭ ބަނގުރާ ބުއިމުގެ މައްސަލަތަކުގެ ދައުވާތައް އަނބުރާ ގެނައުން
- ޕަބްލިކް ޕްރޮސެކިއުޓަރު އަދި އެ އިދާރާގެ ތަރުޖަމާނު އަހްމަދު ޝަފީއު އެއްޖިންސުން ގުޅުން ހިންގައި ޑްރަގް ބޭނުންކޮށް ރަސޫލާ އަށް ފުރައްސާރަކުރި މައްސަލަ ނުބެލުން
- ތަކުރާރުކޮށް ހުށަހެޅުމުން ވެސް ވެންޓިލޭޓަރު މައްސަލައިގައި ކޮރަޕްޝަންގެ ދައުވާނުކުރަން ނިންމުން
- ޕްރޮސެކިއުޓަރު ޖެނެރަލްގެ އިދާރާގައި މަސައްކަތްކުރާ މުވައްޒަފުންގެ މެދުގައި ތަފާތުކުރުން
އިއްޔެގެ ބައްދަލުވުމުގައި ކޮމިޓީން ނިންމީ ޝަމީމް ވަކިކުރުމުގެ މައްސަލަ ދިރާސާކުރުމަށެވެ. އެ މައްސަލަ ޖުޑީޝަރީ ކޮމިޓީގައި ކުރިއަށް ގެންދަން މިއަދު ތާވަލު ވެސް ކޮށްފައިވެއެވެ.
