އުރީދޫ މޯލްޑިވްސްގެ ފުރަތަމަ ބައިނަލްއަގްވާމީ އީސްޕޯޓްސް މުބާރާތް، އުރީދޫ ނޭޝަން ގްލޯބަލް ފޭސްއޮފް ކާމިޔާބު ކަމާއެކު ނިންމާލައިފިއެވެ.
އުރީދޫ އިން ބުނީ ރާއްޖެ އާއި ގަތަރުގެ ހުނަރުވެރި ގޭމަރުންގެ މެދުގައި ރޮކެޓްލީގުގެ ވަރުގަދަ ވާދަވެރިކަމެއް ފެނިގެން ދިޔަ ކަމަށާއި މި މުބާރާތް ކާމިޔާބު ކުރި ގަތަރުގެ ޓީމުން ކަމަށެވެ.
އުރީދޫ ނޭޝަން ގްލޯބަލް ފޭސްއޮފް ކުރިއަށް ގެންގޮސްފައިވަނީ މި މަހުގެ 8 އިން 10 އަކަށެވެ. މިއީ އުރީދޫ އިން ބައިނަލްއަގްވާމީ އީސްޕޯޓްސް ދާއިރާއަށް ތައާރަފްވި ފުރަތަމަ މަސައްކަތެވެ.
އުރީދޫ އިން ވަނީ މި މުބާރާތުގައި 1،919 ޑޮލަރުގެ އިނާމެއް ހުށަހަޅާފައެވެ. މި މުބާރާތް އުރީދޫ ނޭޝަން ޔޫޓިއުބް ޗެނަލް އިން ލައިވް ކޮށްފައި ވާއިރު، އުރީދޫ އިން ބުނީ މި ސަރަހައްދުގެ ގޭމިން ކޮމިއުނިޓީ އަށް މިފަދަ ފުރުސަތުތައް ހޯދައިދިނުމުގައި އަބަދުވެސް އުރީދޫއިން މަސައްކަތް ކުރާނެ ކަމަށެވެ.
އުރީދޫގެ ޗީފް އެގްޒެކެޓިވް އޮފިސަރު ހާލިދު އަލް ހަމާދީ ވިދާޅުވީ މި މުބާރާތަކީ މުސްތަގުބަލުގައި ބައިނަލްއަގްވާމީ އީސްޕޯޓްސް މުބާރާތްތައް ބޭއްވުމަށް މަގު ފަހިކޮށްދިން މުބާރާތެއް ކަމަށާއި ޑިޖިޓަލް ކުޅިވަރުތަކުގައި ދުނިޔެއާ ކުރިމަތިލާން ރާއްޖެ އޮތީ ތައްޔާރަށްކަން ދައްކުވައިދީފައިވާ ކަމަށެވެ. އަދި ގޭމް ކުޅޭ ކުޅުންތެރިންނަށް މިފަދަ ޕްލެޓްފޯމެއް ފަހިކޮށްދީ، ރާއްޖެއާއި ގަތަރާ ދެމެދު އިތުރަށް ގުޅުން ބަދަހިކުރެވިގެން ދިއުމަކީ ލިބޭ ވަރަށް ބޮޑު އުފަލެއް ކަމަށް ހާލިދު ވަނީ ވިދާޅުވެފައެވެ.
އުރީދޫ އިން ބުނީ މިއަހަރުވެސް އަދި ގިނަ މުބާރާތްތައް ރޭވިފައިވާކަމަށެވެ.
