މި ހިނގާ 2024 އަހަރު ނިމުމުގެ ކުރިން ހުރިހާ އަތޮޅު ހޮސްޕިޓަލްތަކުން ޑައިލިސިސްގެ ހިދުމަތް ފެށޭނެ ކަމަށް ހެލްތް މިނިސްޓަރު ޑރ. އަބްދުﷲ ހަލީލް ވިދާޅުވެއްޖެއެވެ.
މިނިސްޓަރު މަޖިލީހަށް ހާޒިރުކޮށް ސުވާލު ކުރުމަށް ހުޅުވާލި ފުރުސަތުގައި ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު (މަޓޭ) ވަނީ އެ ދާއިރާގެ ރަށްތަކުގައި ޑައިލިސިސްގެ ހިދުމަތް ގާއިމްކުރެވޭނެ ތާރީހާކަ ބެހޭ ގޮތުން ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން ހަލީލް ވިދާޅުވީ، މިހާރު ކުރެވޭ މަސައްކަތްތަކަށް ބަލާއިރު މި އަހަރު ނިމުމުގެ ކުރިން ހުރިހާ އަތޮޅު ހޮސްޕިޓަލްތަކެއްގައި ޑައިލިސިސްގެ ހިދުމަތް ފޯރު ކޮށެދެވޭނެ ކަމަށެވެ. އަދި މިހާރުވެސް ދެ ހޮސްޕިޓަލެއްގައި އެ މަސައްކަތްތައް ފެށިގެން ކުރިއަށް ގެންދަވާކަން ފާހަގަ ކުރައްވާ މިނިސްޓަރު އިތުރަށް ވިދާޅުވީ ބައެއް ހޮސްޕިޓަލުތަކުގައި އެ ހިދުމަތް ފެށުމަށް ބޭޏުންވާ މެޝިނަރީޒްތައް ހޯދާފައިވާ ކަމަށެވެ.
ހަމައެހެންމެ ހިދުމަތް ފޯރުކޮށްދިނުމަށް ޖާގަ އިތުރު ކުރުމަަށް ކުރަންޖެހޭ މަސައްކަތްތައް ކުރަންޖެހޭ ހޮސްޕިޓަލްތަކުގައި ކުރިއަށްދާ ކަމަށްވެސް މިނިސްޓަރު ވަނީ ވިދާޅުވެފައެވެ.
މީގެ އިތުރުންވެސް އާބާދީއަށް އެފަދަ ހިދުމަތްތައް ބޭނުންވާ ރަށެއް ނަމަ އެ ރަށަކަށް އެ ހިދުމަތް ފޯރުކޮށްދިނުމުގެ މަސައްކަތް ކުރައްވާނެ ކަމަށްވެސް ހަލީލް ވިދާޅުވިއެވެ.
ޑައިލިސިސްގެ ހިދުމަތް އަތޮޅު ތެރޭގައި ފުޅާ ކުރުމަކީ މި ސަރުކާރުގެ އަމާޒެކެވެ. އަދި މިހާރުވެސް ބައެއް ހޮސްޕިޓަލްތަކުން ގެންދަނީ މި ހިދުމަތްތައް ފޯރުކޮށްދެމުންނެވެ.
އެގޮތުން ރ. އުނގޫފާރު ހޮސްޕިޓަލާއި އައްޑޫ ސިޓީ އިކުއެޓޯރިއަލް ހޮސްޕިޓަލާއި، ހދ. ކުޅުދުއްފުށީ ހޮސްޕިޓަލުގެ އިތުރުން ގދ. ތިނަދޫ ޑރ. އަބްދުއްސަމަދު މެމޯރިއަލް ހޮސްޕިޓަލާއި ބ. އަތޮޅު ހޮސްޕިޓަލާއި ޅ. އަތޮޅު ހޮސްޕިޓަލަކީ މި ހިދުމަތް މިހާރުވެސް ފޯރުކޮށްދެމުންދާ ހޮސްޕިޓަލްތަކެވެ.
