ބަންގްލަދޭޝްގެ ޖަލުގައި ހުރި ކުރީގެ ބޮޑުވަޒީރު އަދި އިދިކޮޅު އެންމެ ވަރުގަދަ އެއް ލީޑަރު ހާލިދާ ޒިއާ މިނިވަންކުރުމަށް އެ ގައުމުގެ ސަރުކާރުން ނިންމައިފިއެވެ.
ހިޔާނާތުގެ މައްސަލައިގައި 17 އަހަރުގެ ޖަލު ހުކުމެއް ތަންފީޒު ކުރަމުން ދިޔަ ހާލިދާ ޒިއާ މިނިވަންކުރުމަށް، ބަންގަލަދޭޝްގެ ރައީސް މުހައްމަދު ޝަހާބުއްދީން، ހޯމަ ދުވަހު އަމުރު ކުރެއްވީ، އޭނާގެ ސިޔާސީ ވާދަވެރިޔާ ޝެއިހް ހަސީނާ ވެރިކަމުން ދުރުކޮށް އަސްކަރިއްޔާއިން ވެރިކަމާ ހަވާލުވިތާ ގަޑިއެއްހާއިރު ފަހުންނެވެ.
ރައީސްގެ ޕްރެސް ޓީމުން ނެރުނު ބަޔާނެއްގައި ބުނެފައިވަނީ ޝަހާބުއްދީން އިސްކޮށް ހުންނަވައިގެން ބޭއްވި ބައްދަލުވުމެއްގައި 'ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) ގެ ޗެއާޕާސަން ބެގަމް ހާލިދާ ޒިއާ ވަގުތުން މިނިވަން ކުރަން މި ބައްދަލުވުމުގެ އިއްތިފާގުން ނިންމާފައިވާ ކަމަށެވެ. މި ބައްދަލުވުމުގައި އަސްކަރިއްޔާގެ ޗީފު ވާކިރުއްޒަމާނު އާއި ކަނޑުގެ ސިފައިންނާ، ވައިގެ ސިފައިންގެ ވެރިޔާގެ އިތުރުން ބީއެންޕީ އާއި ޖަމާއަތް އިސްލާމީ ޕާޓީ ހިމެނޭ ގޮތަށް އިދިކޮޅު ބައެއް ޕާޓީތަކުގެ އިސް ލީޑަރުން ބައިވެރިވެވަޑައިގެންނެވިއެވެ.
މި ބައްދަލުވުމުގައި އިތުރަށް ވަނީ ހަސީނާގެ އިސްތިއުފާ ދެއްވަން މަޖުބޫރުވި، ދަރިވަރުންގެ މުޒާހަރާގައި ހައްޔަރުކުރި އެންމެން ދޫކޮށްލަން ވެސް ނިންމާފައެވެ. އަދި ވީ އެންމެ އަވަހަށް، ބަންގަލަދޭޝްގައި ވަގުތީ ސަރުކާރެއް އެކުލަވާލުމަށްވެސް މި ބައްދަލުވުމުގައި ވަނީ ނިންމާފައެވެ.
2009 އިން ފެށިގެން ބަނގްލަދޭޝްގައި ވެރިކަން ކުރައްވަމުން ގެންދެވި ހަސީނާ އިސްތިއުފާ ދެއްވަން މަޖުބޫރުވެވަޑައިގަތީ، އެގައުމުގައި ސިވިލް ސާވީސްގެ ވަޒީފާ ދިނުމުގައި 1971 ގެ ހަނގުރާމައިގައި ބައިވެރިވި ފަރާތްތަކުގެ އާއިލާތަކަށް ކޯޓާއެއް ކަނޑައަޅާފައި އޮންނަ މައްސަލައިގައި އާންމުން ހިތްހަމަ ނުޖެހި ފެށި މުޒާހަރާތަކުގައި އާންމުންގެ ބަޔަކު މަރުވެފައި ވުމުން އުފެދުނު ރުޅިވެރިކަމުގައެވެ.
