އުރީދޫ ސުޕަނެޓް ބޭނުންކުރާ ކަސްޓަމަރުންނަށް ހާއްސަކޮށް އުރީދޫ މޯލްޑިވްސް އިން އުރީދޫ އާޗާގެ ހާއްސަ ޕެކޭޖެއް ތައާރަފް ކޮށްފިއެވެ.
އުރީދޫން ބުނީ، މި ޕެކޭޖްއަކީ ސުޕަނެޓް އާޗާ 929 ނަމަކަށް ކިޔާ ޕެކޭޖެއް ކަމަށެވެ. ޖުމްލަ 600 ޖީބީގެ މި ޕެކޭޖްއަށް މަހަކު ދައްކަން ޖެހެނީ 929 ރުފިޔާ ކަމަށާއި މި ޕެކޭޖުން ކޮންމެ ދުވަހަކަށް 20 ޖީބީ ބޭނުން ކުރެވޭނެ ކަމަށް އުރީދޫން ބުނެއެވެ.
އުރީދޫން އެންމެ ފުރަތަމަ އާޗާގެ ނަމުން ޑޭޓާ ޕެކޭޖެއް ތައާރަފްކޮށްފައި ވަނީ އާޗާ ޕްރީޕެއިޑްގެ ނަމުގައެވެ. މި ޕެކޭޖްތައް އޭރު ބޭނުން ކުރެވެނީ ހަމައެކި އުރީދޫގެ ޕްރީޕެއިޑް ކަސްޓަމަރުންނަށެވެ.
އާޗާ ޕްރީޕެއިޑް ޕެކޭޖްތައް ތައާރަފްކޮށްފައި ވަނީ، މުޅި ދުނިޔެއަށް ކުރިމަތިވި ކޮވިޑް ބަލިމަޑުކަމުގައި ޕެންޑަމިކްއާ ގުޅިގެން އިންޓަނެޓް ބޭނުން ކުރަންޖެހޭ މިންވަރު ވަރަށް ބޮޑަށް އިތުރުވެފައިވާ ދުވަސްވަރެއްގައެވެ. އެ ދުވަސްވަރު އާންމު ދިރިއުޅުމުގައި އާއިލާ އާއި ރައްޓެހިންނާއި ގުޅުން ބަދަހިކުރުމާއި، އޮފީސް މަސައްކަތާއި، ދަރިވަރުންގެ ކިޔެވުން ކުރިޔަށް ގެންދިއުމާއި އެހެނިހެން ކަންކަމުގައި އިންޓަނެޓްގެ މުހިންމުކަން އެތައް ގުނައެއް އިތުރުވުމުން އުރީދޫން އާޗާ ޕްރިޕެއިޑް ޕްލޭން ތައާރަފް ކޮށްފައި ވަނީ، ޕްރިޕެއިޑް ބޭނުންކުރާ ފަރާތްތަކަށް ހެޔޮ އަގުގައި ގިނަ ފައިދާތަކެއް ފޯރު ކޮށްދިނުމުގެ ގޮތުންނެވެ.
އެ ގޮތުން އެ ދުވަސްވަރު ތައާރަފްކުރި އާޗާ ޕްރީޕެއިޑްއަށް ވަރަށް ބޮޑު ތަރުހީބެއް ވަނީ ލިބިފައެވެ.
