މި ގައުމުގެ ދާހިލީ ކަންކަން ހަމަމަގަށް އެޅެމުން މިދަނީ ރައްޔިތުން ”ގަޓު“ ހުންނެވި ރައީސަކާ ގައުމު ހަވާލު ކުރުމުން ކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.
އިހުސާން ވިދާޅުވީ، މި ސަރުކާރުގެ މިނިސްޓަރުންގެ މަގާމުގައި ތިއްބެވި ބޭފުޅުން ތަންފީޒު ކުރައްވަމުން ގެންދަވާ ކަންކަމަކީ އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވާ ހަރުދަނާ އަދި ޖެހިލުން ކުޑަ ނިންމެވުންތައް ކަމަށެވެ. އެގޮތުން މި ގައުމުގެ ދާހިލީ ކަންކަން ހަމަމަގަށް އެޅުމުން މިދަނީ އެ ސަބަބާ ހުރެ ކަމަށް ވެސް އިހުސާން ވިދާޅުވިއެވެ.
އަދި މި ކަންކަން ތަންފީޒު ކުރެވޭ މައިގަނޑު އެއް ސަބަބަކީ "ގަޓު" ހުންނެވި ރައީސަކާ ގައުމު ހިންގަން ހަވާލު ކުރުމުން ކަމަށް ވެސް އިހްސާން ވިދާޅުވިއެވެ.
މި ގައުމުގައި އެންމެ ގިނަ ދުވަސްވީ މައްސަލަތަކުގެ ތެރެއިން ހައްލު ނުވެ އޮތް އެންމެ ބޮޑު އެއްް ކަމަކީ ބިދޭސީންގެ މައްސަލަތަކެވެ. އެތައް ލައްކަ ބިދޭސީން ރާއްޖޭގައި މަސައްކަތްތެރިންގެ ގޮތުގައި އައިސް އުޅެމުން އަންނަ އިރު، އޭގެތެރެއިން ގިނަ ބަޔަކީ ބިދޭސީން ގެންނަ ފަރާތްތަކުން އިހުމާލު ވުމުގެ ސަބަބުން ނުވަތަ ކޮންމެވެސް ސަބަބަކާ ހުރެ ގަވައިދާ ހިލާފަށް ރާއްޖޭގައި އުޅެމުން އަންނަ މީހުންނެވެ.
އެފަދަ މީސް މީހުން އަމިއްލަ ވިޔަފާރިތައް ހިންގަމުން އަންނަ އިރު ބިދޭސީންގެ އަތްމައްޗަށް ވިޔަފާރިތައް ދާ ކަމުގެ ޝަކުވާ ވެސް އޮތީ ބޮޑުވެފައެވެ. މިކަން ހައްލު ކުރުމަށް ކުރީ ސަރުކާރުން ވެސް ގަދަ އަޅާ މަސައްކަތް ކުރި ނަމަވެސް ފަސް އަހަރު ނިމިގެން ދިޔަ އިރު އެދެވޭ ނަތީޖާއެއް ނުފެނެއެވެ.
މި ސަރުކާރު ވެރިކަމާ ހަވާލުވި ފަހުން ބިދޭސީންގެ މައްސަލަަ ހަމަމަގަށް އަޅުވައި ގަވައިދާ ހިލާފަށް އުޅޭ ބިދޭސީން އަތުލައިގަނެ އެމީހުން އަންނަނީ ޑީޕޯޓް ކުރަމުންނެވެ. ހަމައެއާއެކު އެފަދަ ބިދޭސީ އަތްގަދަކުރަމުން އައި ވިޔަފާރިތައް ވެސް ވަނީ ބަންދުކުރަން ފަށާފައެވެ.
މީގެ އިތުރުން ބިދޭސީން ގެނެސްގެން މަސައްކަތް ކުރަމުން ދިޔަ އެތައް ކުންފުނިތަކެއް ބްލެކްލިސްޓްވެފައި ތިބި ނަމަވެސް އެ ފައިސާތައް ދައުލަތަށް ނުދައްކާ ތިބޭތާ ވަނީ އަހަަރުތަކެއް ވެފައެވެ. ހޯމް މިނިސްޓްރީން ވަނީ މި ވިޔަފާރިތަކުގެ ލިސްޓު ވެސް އާންމު ކޮށްފައެވެ.
ގައުމުގެ ގިނަ ކަންތައްތަކެއް އިސްލާހު ކުރުމަށް މަސައްކަތް ކުރަމުން އަންނަ އިރު، މިނިސްޓަރު އިހްސާން ވިދާޅުވީ، ރައީސް މުއިއްޒުގެ ހާއްސަ އިރުޝާދާއެކު މައްސަލަތައް ހައްލުކުރަން ފަށާ އެ ލިސްޓުގައި އިސްކަންދޭ ބައެއް ކަންކަން އެބަ ހުރި ކަމަށެވެ. އޭގެތެރޭގައި ގަވައިދާ ހިލާފަށް އުޅޭ ބިދޭސީންގެ މައްސަލަ ހަމައަކަށް އެޅުވުމާއި ޑްރަގްސް އާއި ގޭންގު ކުށްތައް ހުއްޓުވުމާއި ކުޑަކުދިން ރެކްރޫޓްކޮށް އެ ކުދިން ލައްވައި ކުށްކުރުން ހުއްޓުވުން ހިމެނެއެވެ.
