ސްކޭމްގެ މައްސަލަތައް ހައްލުކުރުމަށް މިއަހަރުވެސް ގިނަ ފިޔަވަޅުތަކެއް އަޅާފައިވާ ކަމަށް ފުލުހުން ބުނެފިއެވެ.
މަޖިލީހުގެ އެސްއޯއީ ކޮމިޓީގައި ވާހަކަދައްކަވަމުން ފުލުހުންގެ 'އެންޓި ސްކޭމް' ސެންޓަރުގެ ހެޑް އަދި އިންސްޕެކްޓާ އޮފް ޕޮލިސް މަރިޔަމް ރަޝީދާ ވިދާޅުވީ މި އަހަރުގެ މިހާތަނަށް ސްކޭމް މައްސަލަތަކުގައި 500 އަށް ވުރެ ގިނަ ބޭންކް އެކައުންޓް ބްލޮކް ކޮށްފައިވާ ކަމަށެވެ.
ރަޝީދާ ވިދާޅުވި ގޮތުގައި މިދިޔަ އަހަރު ސްކޭމްއާ ގުޅުން ހުރި 1،661 މައްސަލަ ރިޕޯޓްކޮށްފައިވާއިރު އެ ސްކޭމްތަކުގެ އަގު 20 މިލިއަން ރުފިޔާއަށް އަރައެވެ. އަދި މި އަހަރުގެ ޖެނުއަރީ މަހުގެ ނިޔަލަށް ސްކޭމްގެ 1302 މައްސަލަ ރިޕޯޓްކޮށްފައިވާ ކަމަށް އޭނާ ވިދާޅުވިއެވެ.
މީގެ އިތުރުން 782 ޑިވައިސް ނެޓްވޯކް ބޮލޮކް ކޮށް 297 ސިމްކާޑު ޓާމިނޭޓް ކުރުމުގެ އިތުރުން 70 ވެބް ލިންކް ބްލޮކް ކޮށްފައިވާ ކަމަށް އޭނާ ވިދާޅުވިއެވެ. ހަމައެހެންމެ ސްކޭމްގެ މައްސަލަތަކުގެ ތެރެއިން 156 މައްސަލައެއްގައި ދައުވާކުރަން މިހާރު ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވާފައިވާ ކަމަށާއި ގިނަ މައްސަލަތަކުގެ ޝަރީއަތް ކުރިއަށްދާ ކަމަށް މައުލޫމާތު ދިނެވެ.
މޯލްޑިވްސް މަނިޓަރީ އޮތޯރިޓީ، އެމްއެމްއޭގެ ލަފާއާއެކު ހުރިހާ މުއައްސަސާތަކުން މަލްޓި އެޖެންސީ އެޕްރޯޗެއްގައި ކުރީގެ ވިސްނުން ދޫކޮށް އާގޮތަކަށް މަސައްކަތް ފަށާފައިވާކަން ހާމަ ކުރަމުން ފުލުހުން ބުނީ ކޮންމެ އަތޮޅެއްގައި ސްކޭމް ކަންތައްތަކާ ބެހޭ ހާއްސަ އޮފިސަރެއް ހަރަކާތްތެރިވަމުންދާނެ ކަމަށެވެ.
ފުލުހުން ވަނީ ސްކޭމްގެ ޝިކާރައަކަށްވަމުންދާ އާންމުން މަދުކުރުމަށް 'ސްކޭމް ސެންޓާ' އެއްވެސް ގާއިމް ކޮށްފައެވެ. އެ ސެންޓަރު ގާއިމް ކޮށްފައި ވަނީ ދުނިޔޭގެ އެހެން ގައުމުތަކުގައި އަމަލުކުރާ ގޮތް ބަލައިގެން ކަމަށާއި ރާއްޖެއަށް މިހާރު އެޑަޕްޓުކުރަމުން އަންނަނީ ސިންގަޕޫރުގައި ގެންގުޅޭ ސިސްޓަމް ކަމަށް ފުލުހުން ކޮމިޓީގައި ވިދާޅުވެފައި ވެއެވެ.
