ދިވެހިން ބިދޭސީންނާ ކައިވެނި ކުރާތީ ދިވެހިވަންތަކަން ގެއްލޭ ކަމަށް ވިދާޅުވެ ހުޅުމާލެ އުތުރު ދާއިރާގެ މެންބަރު ހުސައިން ޝަރީފް ކަންބޮޑުވުން ފާޅުކުރައްވައިފިއެވެ.
ވަޒީފާއާ ބެހޭ ގާނޫނަށް އިސްލާހު ގެނައުމަށް ސަރުކާރުގެ ފަރާތުން ހުށަހަޅާފައިވާ ބިލަށް ބަހުސް ކުރައްވަމުން ޝަރީފް ވިދާޅުވީ ދިވެހިން ބިދޭސީންނާ ކައިވެނި ކުރުން އިތުރުވެގެން ދާނަމަ މާދަމާ ގައުމުގައި ތިބޭނީ ހާފް މޯލްޑިވިއަން، ހާފް ސްރީ ލަންކަން، ހާފް އިންޑިއަން އަދި ހާފް ބަންގްލަދޭޝް މީހުން ކަމަށެވެ.
މީގެއިތުރުން ޝަރީފް ވިދާޅުވީ މާދަމާ ބޭރު ގައުމަކުން ކިޔަވައިގެން އައިސް މަޖިލީހުގެ ރައީސްކަމުގެ ގޮނޑީގައި ބަސް އިއްވަން އިންނާނީ ކޮން ދިމާލަކުން އަންނަ މީހެއް ކަމާ ދޭތެރޭ ވިސްނަން ޖެހޭ ހާލަތައް ގައުމުގެ ހާލަތު ވެއްޓިއްޖެ ކަމަށެވެ.
މެމްބަރު ޝަރީފް މަޖިލީހުގައި މިއަދު މިފަދައިން ވިދާޅުވެފައި ވާއިރު، އިއްޔެ ވަނީ ދިވެހިންގެ ތެރޭގައި ބިދޭސީން އަތްގަދަ ނުކުރާ އެއްވެސް ދާއިރާއެއް ނެތް ކަމަށާއި ގޭގައި ކައްކާކާއެތިކޮޅު ފޯރުކޮށްދެނީވެސް ގޭގައި ގެންގުޅޭ ބިދޭސީ މީހާ ކަމަށް ވިދާޅުވެފައެވެ. ގޭތެރޭގެ ކަންކަން ބިދޭސީ މީހާއާ ހަވާލު ކުރުމަށްފަހު އަނބިން ތިބެނީ ކަސޯޓީ ބަލަން ކަމަށާއި މިއިން ވެސް ބިދޭސީން ދިވެހިގެން ތެރެއަށް އަތްގަދަކޮށްފައިވާ މިންވަރު ހާމަވެގެންދާ ކަމަށް ޝަރީފް ވިދާޅުވިއެވެ.
ރާއްޖޭގައި ބިދޭސީންގެ މައްސަލަ ހައްލު ކުރުމަށް ސަރުކާރާއި ކަމާ ބެހޭ އިދާރާތަކުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ގަވާއިދާ ހިލާފަށް އުޅޭ ބިދޭސީން ދެނެގަތުމަށް އިމިގްރޭޝަނާއި ފުލުހުން ގުޅިގެން ހާއްސަ އޮޕަރޭޝަންތަކެއް ކުރިއަށް ގެންދާއިރު ގިނަ އަދަދެއްގެ ބިދޭސީން ވަނީ އަނބުރާ ގައުމަށް ފޮނުވާލާފައެވެ.
ބަލަ ބޭރު މީހުންނާއިންނަން ޖެހޭ ސަބަބުވެސް ކަލޭ ވަނީ ހަމަ ތިތަނުގަ ވާހަކަ ދަށްކަމުން ބުނެފަ