މަޖިލިސް މެންބަރުންނަށް މެންދުރު ނަމާދު ޖަމާއަތުގައި ބައިވެރިވެވޭނެ އިންތިޒާމް ހަމަޖައްސާދީފައިވާ ކަމަށް މަޖިލީހުގެ ރައީސް، އަބްދުއްރަހީމް އަބްދުﷲ ވިދާޅުވެއްޖެއެވެ.
މީގެ ކުރިން ހުސްވަގުތު ދެމުން ދިޔައީ މެންދުރު 12:30 ގައެވެ. ނަމަވެސް މިއަދު އެކްސްގައި ހިއްސާ ކުރެއްވި ޕޯސްޓެއްގައި އަބްދުއްރަހީމް ވިދާޅުވީ 20 ވަނަ ރައްޔިތުންގެ މަޖިލީހުގެ ގަވާޢިދު އެކުލަވާލި އިރު މެންދުރު ނަމާދު ވަގުތު ޖަލްސާ ކުރިއަށް ނުގެންދާގޮތަށް ހިމަނާފައިވާ ކަމަށެވެ.
އެގޮތުން މީގެ ކުރިން 12:30 ގައި މެދު ކަނޑާލާގޮތަށް އޮތް އޮތުން 12 ޖަހާއިރު މެދު ކަނޑާލާގޮތަށް ބަދަލުކޮށް 1 ގަޑި އިރުގެ ހުސްވަގުތު ކޮޅަކަށްފަހު އަލުން ޖަލްސާ ފަށާނީ 13:00 ގައި ކަމަށް ނިންމާފައިވާ ކަމަށެވެ. މިއީ މެންދުރު ނަމާދުގެ ޖަމާއަތަށް ފުރުސަތު ލިބޭގޮތަށް ހުސްވަގުތު ދޭން ނިންމި ފުރަތަމަ ފަހަރުކަން ފާހަގަ ކޮށްލެވެއެވެ.
މަޖިލީހުގެ ރައީސް މިފަދައިން ނިންމަވާފައިވާއިރު ދާދި ފަހުން ވަނީ ރައްޔިތުންގެ މަޖިލީހުގެ ތަޅުމުގައި ބަންގީގެ އަޑު އިއްވަންވެސް ފަށާފައެވެ.
މިއީ މަޖިލީހުގެ ތާރީހުގައި ވެސް ތަޅުމުގައި ބަންގީގެ އަޑު އިއްވަން ނިންމި ފުރަތަމަ ފަހަރެވެ. މީގެ ކުރިން ޓީވީތަކުން މަޖިލިސް ލައިވް ގެނެސް، ބަންގިއަށް މެދުކަނޑާލި ނަމަވެސް، ޖަލްސާ މެދު ކަނޑާލާފައި ނުވެއެވެ.
މިފަދައިން ޖަމާއަތުގައި ބައިވެރިވުމުގެ ފުރުސަތު މެންބަރުންނަށް ފަހި ކޮށްދީފައި މިވަނީ މަޖިލީހުގެ ތަޅުމުގައި ބަންގީގެ އަޑު އިއްވި ނަމަވެސް މެންބަރުން ނަމާދުގެ ޖަމާއަތުގައި ބައިވެރި ނުވާތީ ފާޑު ކިޔުން އަމާޒުވެފައިވާ ދަނޑިވަޅެއްގައެވެ.
